ސެޕްޓެމްބަރު މަހު ބާއްވާ ރިޔާސީ އިންތިހާބުގައި ދަ ޑިމޮކްރޭޓްސްގެ ފަރާތުން ވާދަކުރާނެ ކެނޑިޑޭޓަކު ހޮވަން ބާއްވާ ޕްރައިމަރީއަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ފިޔަވައި އެހެން ބޭފުޅަކު ކުރިމަތި ނުލެއްވުމުން، ކެންޑިޑޭޓު ކަނޑައަޅަން ފެންނަ ވޯޓަކަށް ދާން ޖެހިއްޖެ އެވެ.
އެޕާޓީގެ ފަރާތުން ރިޔާސީ އިންތިހާބުގައި ވާދަކުރުމަށް ޝައުގުވެރިވާ ފަރާތްތަކުން އެކަމަށް އެދި ފޯމު ހުށަހެޅުމަށް ހުޅުވާލީ ބުރާސްފަތި ދުވަހު އެވެ. އެ ފުުރުސަތު މިއަދު 4:00 ގައި ހަމަ ވި އިރު މިހާތަނަށް ފޯމު ހުށަހެޅުއްވީ އިލްުޔާސް އެކަންޏެވެ.
ޑިމޮކްރޭޓްސްގެ އަސާސީ ގަވައިދުގައި ބުނާ ގޮތުން ޕްރައިމެރީގައި ވާދަކުރަން އެއް ކެނޑިޑޭޓަށް ވުރެ އިތުރަށް ކުރިމަތިނުލައިފި ނަމަ އެމީހަކު ހޮވާނީ ޕާޓީގެ އާންމު މެންބަރުންގެ މެދުގައި ނަގާ ފެންނަ ނުފެންނަ ވޯޓަކުންނެވެ.
ޕްރައިމެރީގައި ވާދަކުރާ ކެނޑިޑޭޓަށް ރިޔާސީ ޓިކެޓު ދޭނީ ޕާޓީގެ ހުރިހާ މެންބަރުންގެ މެދުގައި ނެގޭ ފެންނަ ނުފެންނަ ވޯޓުން 10 އިންސައްތަ މެންބަރުން ފެންނަ ކަމަށް ވޯޓު ދީގެންނެވެ. ޑިމޮކްރޭޓްސް އިން އާންމުކުރި މެންބަރުންގެ ލިސްޓުގައިގައިވާގޮތުން އެޕާޓީގައި މިވަގުތު ތިބީ 4000 މެންބަރުންނެވެ.
ޑިމޮކްރޭޓްސްގެ ޕްރައިމެރީގައި ވާދަކުރާ ހަމައެކަނި ކެނޑިޑޭޓު އިލްޔާސް ލަބީބު ޕްރައިމެރީ އިންތިހާބު ކާމިޔާބުކުރުމަށް ބޭނުންވާނީ ވޯޓުލާ މީހުންގެ 10 ޕަސެންޓެެވެ.
އާ ސިޔާސީ ޕާޓީ އުފެއްދުމަށް ފަހު ރިޔާސީ އިންތިހާބުގައި ރައީސް މުހައްމަދު ނަޝީދު ވާދަކުރައްވާނެ ކަމަށް ވެސް ބެލެވުނެވެ. އެހެން ނަމަވެސް ނަޝީދު އިއްޔެ ވަނީ އެ ކަމަށް އެމަނިކުފާނުގެ ޝައުގެއް ނެތް ކަމަށް ވިދާޅުވެފަ އެވެ.
ނަޝީދު ވަނީ އިދިކޮޅު ސިޔާސީ ހުރިހާ ޕާޓީއަކުން ގުޅިގެން އެއް ކެންޑިޑޭޓަކު ނެރުމުގެ ހިޔާލު ވެސް ކުރިއަށް ނެރުއްވައިފަ އެވެ. އެ ކަމަށް އަދި އެއްބަސްވީ ޖުމްހޫރީ ޕާޓީއާއި މޯލްޑިވްސް ނޭޝަނަލް ޕާޓީ (އެމްއެންޕީ) އެވެ. އެ ކަމުގައި ޕީޕީއެމްގެ ރުހުން ވެސް އެ ޕާޓީތަކުން ބޭނުންވެ އެވެ.
ދެން އެ އިންތިހާބުގައި ވާދަކުރާނެކަމަށް ބެލެވުނު ކުރީގެ އެސްޓީއޯ އެމްޑީ ހުސެން އަމްރު ވެސް ވަނީ ޕްރައިމެރީގައި ވާދަނުކުރަން ނިންމާފަ އެވެ.
ޕީޕީއެމުން އެ ކަމުގައި ބުނަމުން އަންނަ ވާހަކަ އަކީ އެ ޕާޓީގެ ރިޔާސީ ކެންޑިޑޭޓް އަބްދުﷲ ޔާމީން އެ ކެންޑިޑޭޓުގެ ގޮތުގައި ހަމަޖެއްސުމަށެވެ. ނަމަވެސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެ ހުކުމް ދެމިއޮތްހާ ހިނދަކު ޔާމީނަށް ވާދައެއް ނުކުރެވޭ އެވެ.
ޑިމޮކްރެޓްސް އުފެއްދުމުގެ އިސްކޮށް ހުންނެވި އަދި އެމްޑީޕީގެ އެއް ބާނީ ނަޝީދަކީ މީގެ ކުރިން 2008، 2013، އަދި 2018 ގައި ވެސް އެމްޑީޕީގެ ޕްރައިމަރީން ކަނޑައެޅި އެ ޕާޓީގެ ރިޔާސީ ކެންޑިޑޭޓެވެ. ނަމަވެސް 2018 ގައި އެމަނިކުފާނުގެ މައްޗަށް ޖަލު ހުކުމެއް އިއްވާފައި އޮތުމުން، އެމްޑީޕީގެ ކޮންގްރެސް މެދުވެރިކޮށް އޭރުގެ އެމްޑީޕީގެ ޕާލިމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހަށް ޓިކެޓު ދިނުމަށް ނިންމީ އެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން އެމްޑީޕީގެ އެތެރޭގެ ގުނަންތައް އޮތީ އެމަނިކުފާނުގެ ބާރުގެ ދަށުގަ އެވެ. އަދި އެމްޑީޕީގެ އެތެރޭގައި ބޭއްވި ބޮޑެތި އިންތިހާބުތައް ވެސް ކާމިޔާބު ކުރެއްވީ އެމަނިކުފާނެވެ. އަދި ރިޔާސީ ޕްރައިމަރީ ކާމިޔާބު ކުރައްވައި، މި ފަހަރުގެ ރިޔާސީ އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް ރައީސް ސޯލިހެވެ.
