ދަ ޑިމޮކްރެޓްސްގެ ރިޔާސީ ޕްރައިމަރީގައި ވާދަކުރައްވާނެ ކަން ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު އިއުލާން ކުރައްވައިފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފައްދަވާ "ޑިމޮކްރެޓްސް" ގެ ޕްރައިމަރީއަށް ކުރިމަތިލާން ހުޅުވާލީ މިއަދު ހަވީރެވެ. ހުޅުވާލީ ހޮނިހިރު ދުވަހުގެ ހަވީރު 4:00 އާ ހަމައަށެވެ.
"ރިޔާސީ އިންތިހާބުގައި މި ޕާޓީގެ ފަރާތުން ވާދަކުރާނެ ކެނޑިޑޭޓަކު ހޮވުމަށް ޓަކައި ބާއްވާ ޕްރައިމަރީގައި ވާދަކުރުމަށް މާތްاللهގެ ވާގިފުޅާއެކު އަޅުގަނޑު ގަސްދުކުރާ ވާހަކަ ދެންނެވީމެވެ. މެންބަރުންގެ ތާއީދަށް އެދެމެވެ." އިލްޔާސް ލަބީބު ދެންމެ ކުރެއްވި ޓްވީޓުގައި ލިޔުއްވާފައިވެ އެވެ.
ޑިމޮކްރެޓްސްގެ އިންތިގާލީ ކައުންސިލުން މި ވަގުތަށް ބައެއް ކޮމިޓީތައް އެކުލަވާލިއިރު އެ ޕާޓީގެ މެނިފެސްޓޯގެ މަސައްކަތް އިސްކޮށް ބަލަހައްޓަން ހަވާލުކުރި ދެ ބޭފުޅުންގެ ތެރެއިން އެކަކަކީ އިލްޔާސެވެ. ދެން ހަވާލުކުރެއްވި ބޭފުޅަކީ އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރެވެ.
"އަދަދު" އަށް އެނގިފައިވާ ގޮތުގައި ރިޔާސީ ޕްރައިމަރީއަށް އިލްޔާސާއި އަމްރުގެ ތެރެއިން ކޮންމެ ވެސް އެއް ބޭފުޅަކު ނުކުންނެވުމަށް ނަޝީދު ލަފާ ދެއްވާފައިވެ އެވެ. އިލްޔާސް ޕްރައިމަރީގައި ވާދަކުރައްވާނެ ކަން އިއުލާން ކުރެއްވިއިރު، އަމްރު އަދި އެ ކަމުގައި ވަކި އެއްޗެއް ވިދާޅެއް ނުވެ އެވެ.
އާ ސިޔާސީ ޕާޓީ އުފެއްދުމަށް ފަހު ރިޔާސީ އިންތިހާބުގައި ނަޝީދު ވާދަކުރައްވާނެ ކަމަށް ވެސް ބެލެވުނެވެ. އެހެން ނަމަވެސް ނަޝީދު އިއްޔެ ވަނީ އެ ކަމަށް އެމަނިކުފާނުގެ ޝައުގެއް ނެތް ކަމަށް ވިދާޅުވެފަ އެވެ.
ނަޝީދު ވަނީ އިދިކޮޅު ސިޔާސީ ހުރިހާ ޕާޓީއަކުން ގުޅިގެން އެއް ކެންޑިޑޭޓަކު ނެރުމުގެ ހިޔާލު ވެސް ކުރިއަށް ނެރުއްވައިފަ އެވެ. އެ ކަމަށް އަދި އެއްބަސްވީ ޖުމްހޫރީ ޕާޓީއާއި މޯލްޑިވްސް ނޭޝަނަލް ޕާޓީ (އެމްއެންޕީ) އެވެ. އެ ކަމުގައި ޕީޕީއެމްގެ ރުހުން ވެސް އެ ޕާޓީތަކުން ބޭނުންވެ އެވެ.
ޕީޕީއެމުން އެ ކަމުގައި ބުނަމުން އަންނަ ވާހަކަ އަކީ އެ ޕާޓީގެ ރިޔާސީ ކެންޑިޑޭޓް އަބްދުﷲ ޔާމީން އެ ކެންޑިޑޭޓުގެ ގޮތުގައި ހަމަޖެއްސުމަށެވެ. ނަމަވެސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެ ހުކުމް ދެމިއޮތްހާ ހިނދަކު ޔާމީނަށް ވާދައެއް ނުކުރެވޭ އެވެ.
ޑިމޮކްރެޓްސް އުފެއްދުމުގެ އިސްކޮށް ހުންނެވި އަދި އެމްޑީޕީގެ އެއް ބާނީ ނަޝީދަކީ މީގެ ކުރިން 2008، 2013، އަދި 2018 ގައި ވެސް އެމްޑީޕީގެ ޕްރައިމަރީން ކަނޑައެޅި އެ ޕާޓީގެ ރިޔާސީ ކެންޑިޑޭޓެވެ. ނަމަވެސް 2018 ގައި އެމަނިކުފާނުގެ މައްޗަށް ޖަލު ހުކުމެއް އިއްވާފައި އޮތުމުން، އެމްޑީޕީގެ ކޮންގްރެސް މެދުވެރިކޮށް އޭރުގެ އެމްޑީޕީގެ ޕާލިމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހަށް ޓިކެޓު ދިނުމަށް ނިންމީ އެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން އެމްޑީޕީގެ އެތެރޭގެ ގުނަންތައް އޮތީ އެމަނިކުފާނުގެ ބާރުގެ ދަށުގަ އެވެ. އަދި އެމްޑީޕީގެ އެތެރޭގައި ބޭއްވި ބޮޑެތި އިންތިހާބުތައް ވެސް ކާމިޔާބު ކުރެއްވީ އެމަނިކުފާނެވެ. އަދި ރިޔާސީ ޕްރައިމަރީ ކާމިޔާބު ކުރައްވައި، މި ފަހަރުގެ ރިޔާސީ އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް ރައީސް ސޯލިހެވެ
