ކުރިއަށް އޮތް ރިޔާސީ އިންތިހާބުގައި އެމްޑީޕީގެ ކެންޑިޑޭޓްގެ ހައިސިއްޔަތުން ވާދަކުރަން ޖެހިވަޑައިގަންނަވާނީ އިދިކޮޅު ޕީޕީއެމްގެ ކެންޑިޑޭޓާ ކަމަށާއި ދަ ޑިމޮކްރެަޓްސް އަކީ ޗެލެންޖެއް ނޫން ކަމަށް ރައީސް އިބްރާހީމް މުހައްމަދު ސޯލިހު އިއްޔެ ވިދާޅުވި އެވެ.
ވ.އަތޮޅަށް ކުރެއްވި ކެމްޕޭން ދަތުރުފުޅުގައި ފުލިދޫގައި ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ ރިޔާސީ އިންތިހާބުގައި ދަ ޑިމޮކްރެޓްސް އިން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަކުރެެއްވިޔަސް، އެމްޑީޕީގެ ޕްރައިމަރީގައި ހޯއްދެވި ފަދަ ކާމިޔާބީއެއް ހޯއްދަވާނެ ކަމަށެވެ. އެމަނިކުފާނު މިހެން ވިދާޅުވީ ނަޝީދު ވާދަކުރައްވާ ނަމަ ކިހާ ބޮޑު ތަފާތަކުން އިންތިހާބު ކާމިޔާބު ކުރެއްވިދާނެތޯ ނޫސްވެރިއަކު ސުވާލުކުރުމުންނެވެ.
"ތިޔަ ބޭފުޅުންނަށް ފެނިވަޑައިގަންނަވާނެ ޕާޓީ އެތެރޭގެ ޕްރައިމަރީގެ ނަތީޖާ. އަޅުގަނޑަށް ގަބޫލުކުރެވޭ ގޮތުގައި ކުރިއަށް މިއޮތް ރިޔާސީ އިންތިހާބުގައި ވެސް ވާދަވެރި ދެ ޕާޓީއަކަށް ވެެގެންދާނީ އެމްޑީޕީއާ ޕީޕީއެމް. އެއަކަށް ތަފާތެއް އައިސްފައި އޮތް ތަނެއް އަޅުގަނޑަކަށް ނުފެނޭ،" ރައީސް ވިދާޅުވި އެވެ.
ދަ ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ނާކާމިޔާބު ވެވަޑައިގެންނެވުމުން، އެމަނިކުފާނު އުފެއްދެެވި "ފިކުރެއްގެ ދިރުން" ފެކްޝަން އެމްޑީޕީން ވަކިވެގެން އުފެއްދި ޕާޓީ އެކެވެ. އެޕާޓީން ރިޔާސީ އިންތިހާބަށް ނެރޭނެ ކެންޑިޑޭޓަކު އަދި ކަނޑައެއް ނާޅަ އެވެ. އެހެން ނަމަވެސް ނޫސްވެރިންގެ ބައްދަލުވުމުގައި ސުވާލުކުރި ނޫސްވެރިއަކު ބުނީ ނަޝީދު ވާދަކުރައްވާނެ ކަމުގެ މައުލޫމާތު ލިބިފައިވާ ކަމަށެވެ.
"ވާދަކުރައްވާނެ ބޭފުޅުންގެ ތެރޭގައި ކުރިން ރައީސްގެ އެންމެ ގާތް އެއް ބޭފުޅެއް ކަމަށްވާ ރައީސް ނަޝީދު ވޭ. މިފަހަރު ރިޔާސީ އިންތިހާބުގައި ރައީސް ނަޝީދާ ވާދަކުރައްވާ ނަމަ ކިހާ ބޮޑު ތަފާތަކުން ކުރި ހޯއްދަވާނަންތޯ؟ ރައީސަށް ކިހާ ބޮޑު ޔަކީންކަމެއް އެބަ އޮތްތޯ ރައީސް ނަޝީދުގެ މައްޗަށް ކުރި ހޯއްދެވޭނެ ކަމުގެ؟" ނޫސްވެރިޔާ ސުވާލުކުރި އެވެ.
އެ ސުވާލުގެ ޖަވާބަކަށް ރައީސް ސޯލިހު ވިދާޅުވީ "ޕާޓީ އެތެރޭގެ ޕްރައިމަރީގެ ނަތީޖާ ތިޔަ ބޭފުޅުންނަށް ފެނިވަޑައިގަންނަވާނެ" ކަމަށެވެ.
އެމްޑީޕީ ބައިބައިވެދާނެ ކަމަށް ދެކެވޭ ވާހަކައަަށް ވެސް އެމަނިކުފާނު މިއަދު ރައްދު ދެއްވި އެވެ.
"ނޫން ނޫން. އެމްޑީޕީއާ އަބަދުވެސް ބައެއް ބޭބޭފުޅުން ވަކިވެގެން ގޮސްފައި އެބަހުރި، ލީޑަޝިޕުން. އެހެން ނަމަވެސް އެމްޑީޕީ އަބަދުވެސް [ދެމި]އޮވެ. އެ ވިސްނުމުގައި ކުރިއަށްދޭ،" ރައީސް ވިދާޅުވި އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
އެމްޑީޕީ ބައިބައިވެދާނެ ކަމަށް ދެކެވޭ ވާހަކަތަކާ ގުޅޭ ގޮތުން، ވ. އަތޮޅުގެ ކެމްޕެއިން ދަތުރުގެ އެންމެ ފަހު މަންޒިލުކަމުގައިވާ ފުލުދީގައި ނޫސްވެރިންނާ ވާހަކަ ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ،
ނޫން ނޫން. އެމްޑީޕީއާ އަބަދުވެސް ބައެއް ބޭބޭފުޅުން ވަކިވެގެން ގޮސްފައި އެބަހުރި، ލީޑަޝިޕުން. އެހެން ނަމަވެސް އެމްޑީޕީ އަބަދުވެސް [ދެމި]އޮވެ. އެ ވިސްނުމުގައި ކުރިއަށްދޭ،"
ދުވަހުގެ ފޮޓޯ
ކެމްޕެއިން ދަތުރުގައި ރައީސް ސޯލިހު އިއްޔެ ވ. ފުލިދު އަށް ވަޑައިގަތް ވަގުތު އެމަނިކުފާނަށް މަރުހަބާ ކިޔުމަށް ގޮސް ހުރި އަންހެނަކު އެ މަނިކުފާނު އަރިހު ވާހަކައެއް ދައްކަނީ. -- ފޮޓޯ: މިރާޝް ނާޝިމް/ އަދަދު
