ކުރިއަށް އޮތް ރިޔާސީ އިންތިހާބަށް ރައީސް އިބްރާހިމް މުހައްމަދު ސޯލިހުގެ ކެމްޕޭން ފަށައިގެން ކުރިއަށްދާއިރު, އަދި ރަނިންމޭޓެއް ކަނޑަނާޅުއްވާ ކަމަށާއި އެއީ "އުނދަގޫކަމެއް" ކަމަށް އެމަނިކުފާނު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕޭނުގައި ރައީސް ވަނީ މިހައިތަނަށް ހަތަރު އަތޮޅަކަށް ވަޑައިގެންފަ އެވެ. ވ.އަތޮޅުގެ ކެމްޕޭން ނިންމަވައިލެއްވުމަށް ފަހު, ނޫސްވެރިންނާ ބައްދަލުކުރައްވި އިރު ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ ރަނިން މޭޓަކު ކަނޑައެޅުއްވުމަކީ ނިންމަވަން ޖެހިވަޑައިގެންފައި އޮތް އުނދަގޫ ނިންމެވުމެއް ކަމަށެވެ.
"އަޅުގަނޑު ސިކުނޑީގައި މިވަގުތި އިން އެންމެ ބޮޑު މައްސަލަ. މައްސަލައޭ މި ދެންނެވީ ޑިސިޝަނެއް ނަގަން ޖެހިފައި އޮތް މައްސަލަ. އަޅުގަނޑު ވަކިވަކިން ޕާޓީގެ އިސްބޭފުޅުންނާ އެބަ ވާހަކަދައްކަން. އެ ބޭފުޅުންގެ ވިސްނުމާ ހިޔާލު އަޅުގަނޑު އެބަ ހޯދަން. ކޮންމެ ދުވަހަކު ކޮންމެ ރެއަކު ކަހަލަ ގޮތަކަށް ވަކިވަކިން އަޅުގަނޑު އެބަ ބައްދަލުކުރަން. އެކި ނަންތައް އެބަ އާދޭ." ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ވިދާޅުވި އެވެ.
މިފަހަރު އެމްޑީޕީން ކެމްޕޭން ކުރަމުން ދަނީ އަދާލަތު ޕާޓީ އަދި އެމްޑީއޭ ހިމެނޭހެން ގުޅިފައިވާ ޕާޓިތަކުގެ ކޯލިޝަނަކުންނެވެ. ކެމްޕޭނުގެ 21 ވަނަ މަންޒިލުގައި ހުންނަވާ, ނޫސްވެރިއެއްގެ ސުވާލަށް ޖަވާބުދެއްވަމުން ރައީސް ވިދާޅުވީ ކޯލިޝަނުގެ ތެރެއިން ރަނިންމޭޓެއް ނެރުމުގެ ފުރުސަތު ވެސް އެބަ އޮތް ކަމަށެވެ.
ރައީސް ސޯލިހާ އެކުގައި ނިކުންނަވާނެ ރަނިންމޭޓަކު އަދި ކަނޑައަޅާފައި ނުވާއިރު, ގާތް ބައެއް ބޭފުޅުން ވަނީ އެކަމަށް ޝައުގުވެރިކަން ފާޅުކުރައްވާފަ އެވެ.
އަންނަ ސެޕްޓެމްބަރުމަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބުގައި ވާދަކުރައްވާނެކަން އިއުލާނުކުރައްވާފައިވާ ބޭފުޅުންގެ ތެރެއިން މިހައިތަނަށް، ފުޅާ ދާއިރާގައި ކެމްޕޭން ކުރައްވަން ފެށްޓެވީ ހަމަ އެކަނި ރައީސް ސޯލިހެވެ. އެ އިންތިހާބަށް އިދިކޮޅު ޕީޕީއެމުން ރިޔާސީ ޓިކެޓް އަރުވާފައިވާ ކުރީގެ ރައީސް އަބްދުﷲ ޔާމީނު ހުންނެވީ ކްރިމިނަލް ކޯޓުން ކުރި ހުކުމެއް ތަންފީޒުކުރައްވަން ޖަލުގަ އެވެ. ޖުމްހޫރީ ޕާޓީގެ ޓިކެޓް އެޕާޓީގެ ލީޑަރު ގާސިމް އިބްރާހީމަށް ދީފައި ވިޔަސް އޭނާ އަދި ސީދާ ކެމްޕޭނެއް ނުފަށްޓަވަ އެވެ.
އެމްއެންޕީއިން ކޮންމެވެސް ވަރަކަށް ކެމްޕޭންކުރަމުން އަންނަ އިރު ދަ ޑިމޮކްރެޓްސް އިން އަދި ކެންޑިޑޭޓަކު ކަނޑައެއް ނާޅަ އެވެ.
ރިޔާސީ އިންތިހާބުގެ ކެމްޕޭން ފަށައިގެން ކުރިއަށް ދާއިރު, އިންތިހާބަށް ކުރިމަތިލާ, ކެންޑިޑެސީ ފޯމު އިލެކްޝަން ކޮމިޝަނަށް ހުށަހަޅަން ހުޅުވާލާނީ އަންނަ އާދިއްތަ ދުވަހު އެވެ. މިފަހަރުގެ އިންތިހާބަށް އަށް ކެންޑިޑޭޓަކު ކުރިމަތިލާނެ ކަމަށް ބުނެފައިވާއިރު, އަދި އެއްވެސް ކެންޑިޑޭޓެއްގެ ފަރާތުން ރަނިންމޭޓަކު ދައްކާފައެއް ނުވެ އެވެ.
