ދިހަ ބުރީގެ އިމާރާތެއް އަޅަން ރާވާފައިވާ ހ. ސީސްޕީޑް ގޭގެ ގޯތި ތެރެއަށް، އެ ގޯއްޗާ އިންވެގެން އޮންނަ ހ. ނައިޝާގައި ހުރި ހަ ބުރީގެ އިމާރާތެއްގެ ބައެއް ވަދެފައިވާތީ ހ. ސީސްޕީޑް ގޭގެ ވެރިފަރާތުން ދައުވާ ކުރި މައްސަލައެއްގައި އިމާރާތުގެ އެ ބައި ތަޅާލަން ސިވިލް ކޯޓުން މިދިޔަ ބުރާސްފަތި ދުވަހު ހުކުމްކޮށްފި އެވެ.
ހ. ސީސްޕީޑް ގޭގައި ޓެރަސްއެއް ހިމެނޭ ގޮތަށް 10 ބުރީގެ އިމާރާތެއް އަޅަން މާލޭ ސިޓީ ކައުންސިލުން އެ ގޭގެ ވެރިފަރާތަށް ހުއްދަ ދިނީ ޖެނުއަރީ 22، 2020ގަ އެވެ. ގޯތީގެ ތެރެއަށް އިމާރާތް ވަދެފައިވާކަން އެނގުނީ، ހ. ސީސްޕީޑް ގޯތީގެ އިން ހަމަ ކުރުމުގެ މަސައްކަތް ސިޓީ ކައުންސިލުގެ މުވައްޒަފުން ކުރި އިރު އެވެ.
އެ ގޯއްޗާ އިންވެގެން އޮންނަ ހ. ނައިޝާގައި ހުރި ހަ ބުރީގެ އިމާރާތުގެ ތިން ވަނަ ބުރިން ފެށިގެން މައްޗަށް ހުރި ބައިތައް ހ. ސީސްޕީޑް ގޭގެ ގޯތި ތެރެއަށް ހުރީ ވެދަފަ އެވެ. އެއީ އެ އިމާރާތުގެ މަތީ ހަތަރު ބުރިން ޖުމްލަ ގާތްގަނޑަކަށް 36 އަކަފޫޓެވެ.
އެކަން ރަނގަޅު ކުރަން ސިޓީ ކައުންސިލުން މާޗު 18، 2021ގައި ހ. ނައިޝާ ގޭގެ ވެރިފަރާތަށް ދިން ދެ މަހުގެ މުއްދަތު ހަމަވެ، އިތުރު ތިން މަސް ހަމަވި ފަހުން ވެސް އެކަން ރަނގަޅުކޮށްފައި ނުވާތީ އެކަން ރަނގަޅު ކުރުމަށް އެ ގޭގެ ވެރިފަރާތަށް އަންގަން އެދި ހ. ސީސްޕީޑް ގޭގެ ވެރިފަރާތުން ހ. ނައިޝާ ގޭގެ ވެރިފަރާތާ ދެކޮޅަށް ސިވިލް ކޯޓުގައި ދައުވާ ކުރީ ސެޕްޓޭމްބަރު 16، 2021ގަ އެވެ.
އެ މައްސަލައިގައި މިދިޔަ ބުރާސްފަތި ދުވަހު ސިވިލް ކޯޓުން ކުރި ހުކުމުގައި ފާހަގަކުރީ، ހ. ނައިޝާގެ އިމާރާތުން ބައެއް ހ. ސީސްޕީޑް ގޯތީގެ ތެރެއަށް ވަދެފައިވާކަން ހުށަހަޅާފައިވާ ލިޔުންތަކުންނާއި ދެ ފަރާތުގެ ބަހުން ވެސް އެނގެން އޮންނަ ކަމެވެ. ދައުވާ ލިބޭ މީހާގެ ފަރާތުން ދައުވާއަށް އިންކާރު ކުރި ނަމަވެސް އިމާ ގުޅޭ މައްސަލައެއް އުޅޭ ކަމަށް އިންކާރެއް ނުކުރެ އެވެ.
ހުކުމުގައިވާ ގޮތުން ދައުވާ ކުރި ހ. ސީސްޕީޑް ގޭގެ ވެރިފަރާތުން ބޭނުންވަނީ ހަ ބުރީގެ އިމާރާތުން ވަދެފައިވާ ބައި ތަޅައި އިސްލާހު ކުރުމަށެވެ.
އަގެއް ކަނޑައަޅައި ބަދަލު ދިނުމަށް ދައުވާ ލިބޭ މީހާ ހުށަހެޅިޔަސް، ދައުވާކުރި ފަަރާތުގެ ނުރުހުމުގައި ދައުވާކުރި މީހާގެ މައްޗަށް ބަދަލުދީ، އެ ހައްގުގެ މަތީގައި ދައުވާލިބޭ ފަރާތް ހުރުމުގެ ހައްގު އޭނާއަށް ލިބިގެންނުވާ ކަމަށް ހުކުމުގައިވެ އެވެ.
އިމާރާތުން އެތެރެއަށް ވަދެފައިވާ މިންވަރު އަގުކޮށް ފައިސާ ދިނުމަށް ދައުވާލިބޭ މީހާ ބޭނުންވި ނަމަވެސް އެ ބަދަލު ލިބިގަތުމަށް ދައުވާ ކުރި މީހާ ބޭނުންނުވާކަން ވެސް ހުކުމުގައި ފާހަގަކުރި އެވެ.
އެހެންވެ، ގާޒީ އަލީ އަބްދުﷲ ކުރެއްވި ހުކުމުގައި އެންގެވީ، ހ. ނައިޝާގައި ހުރި ހަ ބުރީގެ އިމާރާތުން ހ. ސީސްޕީޑް ގޯތީގެ ތެރެއަށް ވަދެފައިވާ ބައި އިން ހަމަވާ ގޮތަށް ތަޅާލައި އިސްލާހު ކުރުމަށެވެ. އެކަމަށް ދިނީ ފަސް މަސް ދުވަހުގެ މުއްދަތެކެވެ.
އެ މައްސަލައިގައި ދައުވާ ލިބުނު ހ. ނައިޝާ ގޭގެ ވެރިފަރާތުން ކޯޓުގައި ބުނެފައި ވަނީ އެހެން ގޯއްޗެއްގެ ތެރެއަށް އިމާރާތް ވަދެފައިވާކަން ސިޓީ ކައުންސިލުން ސަމާލުކަމަށް ގެނައުމުން، އިމާރާތުގެ މަތިން ތަޅާލައިގެން މައްސަލަ ހައްލު ކުރަން ކަމާ ބެހޭ ފަރާތްތަކާ ވާހަކަ ދެއްކި ކަމަށެވެ.
އެކަމަކު، އިމާރާތުގެ މަތިން ބިމާއި ތަނބުތަކުން ތަޅާލައިފި ނަމަ އިމާރާތަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބޭނެ ކަމަށާއި، ބައެއް ކަނޑައިގެން ވެއްޓި ފުރާނައަށް ވެސް ގެއްލުންވެދާނެ ކަމަށް އޭނާ ކޯޓުގައި ބުނެފައިވެ އެވެ.
