އަންނަ ސެޕްޓެމްބަރު މަހު ރާއްޖޭގައި ބާއްވާ ރިޔާސީ އިންތިހާބުގައި ވާދަކުރައްވަން ޖުުމްހޫރީ ޕާޓީ (ޖޭޕީ)ގެ ޓިކެޓް ލިބިވަޑައިގެންނެވި ނަމަވެސް ކެމްޕޭން ނުކުރައްވައި ހުންނެވި ހުންނެވުން އެޕާޓީގެ ލީޑަރު ގާސިމް އިބްރާހީމް މިއަދު ދިފާއުކުރައްވައިފި އެވެ.
ޖުމްހޫރީ ޕާޓީގެ ޓިކެޓް ރަސްމީކޮށް ގާސިމަށް އެރުވީ ނޫން 11 ގައި އެޕާޓީން ބޭއްވި ޖަލްސާއެއްގަ އެވެ. އެހެން ނަމަވެސް ރިޔާސީ އިންތިހާބަށް ކުރާ ކެމްޕޭން ހަރަކާތެއްގައި އޭނާ އަދި މިހައިތަނަށް ބައިވެރިވެވަޑައެއް ނުގަންނަވަ އެވެ. އެހެންވެ، މި އިންތިހާބުގައި ގާސިމް ވާދަ ކުރައްވައިފާނެ ކަމާ މެދު ބައެއް ފަރާތްތަކުން ސުވާލު ވެސް އުފައްދަ އެވެ. އެގޮތަށް ދައްކާ ވާހަކަތަކަށް ގާސިމް ރައްދު ދެއްވީ ޖޭޕީގެ ރަސްމީ ޓްވިޓާ ހޭންޑުލް އިން މިއަދު އާއްމުކުރެއްވި ވީޑިއޯ މެސެޖެއްގަ އެވެ.
""މިހާރުން ކެންޑިޑެންސީވެސް މިއޮތީ ލާން ވަރަށް ކައިރިވެފަ. މިމަހުގެ 23 ވަނަ ދުވަހުން ފެށިގެން މިއޮތީ އެކަން ކުރަންޖެހޭ ގޮތަށް. އެހެންވީމަ ހަމަގައިމުވެސް އެއަށްވުރެ ލަސްވެގެނެއް ނުވާތާ ދެއްތޯ. އަޅުގަނޑުމެން ކެންޑިޑެންސީ ލީމަ، ބަލައިގަންނަ ކަމެއް، ނުގަންނަކަމެއްވެސް އެނގޭނީ ލީމާ،" ވީޑިއޯ މެސެޖްގައި ގާސިމް ވިދާޅުވި އެވެ.
އޭނާ އެ ވިދާޅުވީ ރަސްމީކޮށް ކެމްޕޭން ފެށުން އެއަށް ވުރެ ލަސް ނުވާނެ ވާހަކަކަން އެނގެނީ މެސެޖް ނިންމަވައިލެއްވި އިރު އެވާހަކަ އަށް ވަޑައިގެންނެވީ މަ އެވެ. ވިދާޅުވީ އުތުރާއި ދެކުނުގައި ތިއްބެވި ކެމްޕޭން މެނޭޖަރުން މިހާރު ވެސް ކެމްޕޭން ކުރައްވާ ކަމަށެވެ.
"އެކަމާއި ބާރަށް ނޫޅެވިފައި މިތިބެނީ ޔަގީންކަން ނެތީމާއެއް ނޫން. ޔަގީންކަން އެބައޮތް. އެހެންނަމަވެސް، އަދި ކަންތައްތައް ހުރިގޮތުން މިހާރު މަޑުކޮށްލައިގެން މިހުރީ އަޅުގަނޑުގެ އަމިއްލަ ނަފްސުން އެކަން ނުކުރިއަސް އަޅުގަނޑުގެ ޕާޓީން އެކަން ކުރަމުން އެބަގެންދޭ،" ގާސިމް ވިދާޅުވި އެވެ.
ކެމްޕޭން އަވަހަށް ފެށުމަކީ މޮޅުކަމެއް ނޫން ކަމަށް ވިދާޅުވެ، ރައީސް އިބްރާހީމް މުހައްމަދު ސޯލިހަށާއި ޕީޕީއެމަށް ވެސް ނުސީދާ ގޮތެއްގައި ގާސިމް ބަހުގެ ހަމަލާއެއް ދެއްވި އެވެ.
"ކޮންމެހެން މިބާވަތުގެ ކަމެއްގައި އިސްނެގުމަކީ މޮޅުވުމެއްވެސް ނޫން. އެހެން މުސްކުޅިންވެސް ބުނެެއުޅޭ. ވިސްނުންތެރިކަމާއިއެކު ކަމެއް ކުރީމައިކަން މޮޅުކަމަކަށް މިވަނީ،" އޭނާ ވިދާޅުވި އެވެ.
ވީޑިއޯ މެސެޖް ނިންމަވައިލައްވަމުން ގާސިމް ވިދާޅުވީ އިންތިހާބު ކާމިޔާބުކުރެއްވޭނެ ކަމުގެ ޔަގީންކަން އެބަ އޮތް ކަމަށެވެ.
ޖޭޕީގެ އަސާސީ ގަވައިދު ކުރިން އޮތް ގޮތުން އެޕާޓީގެ ރިޔާސީ ޓިކެޓް، ޕާޓީގެ ލީޑަރުގެ ހައިސިއްޔަތުން އޮޓަމެޓިކުން ގާސިމަށް ލިބިވަޑައިގަންނަވަ އެވެ. އެެހެން ނަމަވެސް މިފަހަރު އެޕާޓީން ރިޔާސީ ޕްރައިމަރީއެއް ބާއްވަން މާޗް 16، ގައި ހުޅުވައިލި އެވެ. އެހެން ނަމަވެސް އެކަމަށް ހުޅުވައިލި މުއްދަތު 30 މާޗްގައި ހަމަ ވި އިރު ގާސިމް ފިޔަވައި އެހެން ބޭފުޅަކު ކުރިމައްޗެއް ނުލައްވަ އެވެ. ގާސިމަށް ރިޔާސީ ޓިކެޓް ލިބިވަޑައިގެންނެވީ އެހެންވެ އެވެ.
ރާއްޖޭގައި މިހާރު އަމަލުކުރާ ގާނޫނުއަސާސީގެ ދަށުން 2008 ވަނަ އަހަރު ބޭއްވި ފުރަތަމަ މަލްޓިޕާޓީ ރިޔާސީ އިންތިހާބުގައި ވެސް ގާސިމް ވާދަކުރެއްވި އެވެ. އެެ ގާނޫނުއަސާސީގެ ދަށުން ދެވަނައަށް ބޭއްވި ރިޔާސީ އިންތިހާބުގައި 2013 ވަނަ އަހަރު ވެސް ގާސިމް ވާދަކުރެއްވި އެވެ. ދެ އިންތިހާބުގައި ވެސް އޭނާ އަށް ލިބިވަޑައިގެންނެވީ ތިންވަނަ އެވެ. އެހެންވެ ދެވަނަ ބުރަށް ވަޑައިގެންނެވުނު ކެންޑިޑޭޓުންނާ އެކު ކޯލިޝަން ހައްދަވައި ވެރިކަން ކުރާ ކޯލިޝަނުގައި ދެފަހަރު ވެސް ހިމެނިވަޑައިގެންނެވި އެވެ.
