ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި، ޖަލު ހުކުމެއްގައި ހުރި ކުރީގެ ރައީސް އަބްދުﷲ ޔާމީނަށް ވާދަނުކުރެއްވޭނެ ކަމަށް ބައެއް ފަރާތްތަކުން ބުނަމުން އަންނައިރު، އިދިކޮޅު މެމްބަރުން މާޔޫސް ނުވުމަށާއި، އިދިކޮޅުގެ ރިޔާސީ ކެންޑިޑޭޓެއްގެ ގޮތުގައި ވާދަ ކުރައްވާނީ ޔާމީން ކަމަށް، އެ ކޯލިޝަންގެ ވަގުތީ ލީޑަރު، ޕީއެންސީގެ ރައީސް އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.
އިދިކޮޅު އާޓިފިޝަލް ސަރަހައްދުގައި ބޭއްވި އެއްވުމުގައި އަބްދުއްރަހީމް ވިދާޅުވީ ރިޔާސީ އިންތިހާބުގައި ޕީޕީއެމްއިން އެހެން އެއްވެސް ޕާޓީއެއްގެ ފަހަތަށް ނާރާނެ ކަމަށެވެ.
އޭނާ މިހެން ވިދާޅުވިއިރު، ދަ ޑިމޮކްރެޓްސްއިން މަސައްކަތް ކުރަމުން ދަނީ އިދިކޮޅުން އެއް ކެންޑިޑޭޓެއް ނެރުމަށެވެ. ނަމަވެސް އަބްދުއްރަހީމްގެ މި ވާހަކައިން އެކަން ކާމިޔާބު ނުވާނެ އެވެ.
"ޕީޕީއެމް ނުކުންނާނީ ރައީސް ޔާމީނާ އެކީގައި ވެރިކަން ހޯދަން. އެއްގޮތަކަށް ވެސް މާޔޫސްވެވަޑައިގަންނަވާނެ ކަމެއް ނެތް،" އޭނާ ވިދާޅުވި އެވެ.
ޔާމީން ޖަލުގައި ހުންނެވުމަކީ ރައްޔިތުންނަށްވާ ވަރަށް ބޮޑު ގުރުބާނީއެއް ކަމަށާއި އެ އަގު އަދާކޮށް ދެވޭނީ ޕީޕީއެމް/ޕީއެންސީގެ މެމްބަރުންގެ "ހިތްވަރެއް، ތެދުވެރިކަމެއް އެކުވެރިކަމެއް، އެއްބައިވަންތަ ކަމެއް ހުރެގެން" ކަމަށް އޭނާ ވިދާޅުވި އެވެ.
"އަޅުގަނޑުމެން ރޫޅާލާކަށް އެއްގޮތަކަށް ވެސް މި ސަރުކާރުން މަސައްކަތް ކުރައްވާނެ ކަމެއް ނެތް. ޕީޕީއެމް/ޕީއެންސީ ރޫޅައެއް ނުލެވޭނެ. ރައީސް ޔާމީންގެ ސަޕޯޓަރުން ބައިބައެއް ނުކުރެވޭނެ. އެއަށް ވުރެ މާ ވަރުގަދަ ޓީމެއް ރައީސް ޔާމީނާއެކު އޮތީ،" ރިޔާސީ ޓިކެޓުގެ ވާދަ އިދިކޮޅު ކޯލިޝަންގެ ތެރޭގައި ބޮޑުވެ، ޕާޓީގެ އެއްބައިވަންތަކަށް އަސަރުކޮށްފާނެ ކަމަށް ބައެއް ފަރާތްތަކުން ބުނަމުންދަނިކޮށް އަބްދުއްރަހީމް ވިދާޅުވި އެވެ.
ޝަރީއަތެއްގެ އަޑުއެހުމަށް ފަހު ޔާމީން އަނބުރާ މާފުށީ ޖަލަށް ގެންދިޔުމަށް ލޯންޗަށް އަރުވަނީ. -- ފޮޓޯ: މުހައްމަދު ޝާބިން/ އަދަދު
ރައީސް ސޯލިހުގެ ރިޔާސީ ކެމްޕެއިންގެ ޝިޔާރެއްގެ ގޮތުގައި "އުފާވެރި އަމާން ރާއްޖެ" ކަނޑައަޅާފައިވާއިރު، އަބްދުއްރަހީމް ވިދާޅުވީ ދިވެހި ރައްޔިތުންނަކީ އަމާންކަމާއި ސުލުހަ އަށް އަދި ތަރައްގީ އަށް ލޯބިކުރާ ބައެއް ކަމަށާއި އެހެންވެ ދިވެހިރައްޔިތުން ބޭނުންވަނީ ޔާމީން ވެރިކަމަށް ގެނައުމަށް ކަމަށެވެ. އިގުތިސޯދު ކޮޅަށް ޖެހޭނީ ޔާމީން ވެރިކަމަށް ގެނެސްގެން ކަމަށް އޭނާ ވިދާޅުވި އެވެ.
އެމްއެމްޕީއާރުސީގެ ހިޔާނާތުގައި މަނީލޯންޑެރިންނާއި ރިޝްވަތުގެ ދައުވާ ސާބިތުވެ 11 އަހަރަށް ޔާމީން ހުރީ ޖަލަށް ލައިފަ އެވެ. އެ މަނިކުފާނަށް ރިޔާސީ ޓިކެޓު ހަވާލުކުރީ ތުހުމަތުތައް ކުރެވި، ޝަރީއަތް ހިނގަމުން ދަނިކޮށެވެ.
ރިޔާސީ އިންތިހާބު ބޯމަތިވެފައިވާއިރު ވެސް ޔާމީން މިނިވަން ނުކޮށް ޖަލުގައި އޮތުން އަބްދުއްރަހީމް ސިފަ ކުރެއްވީ އަނިޔާއެއްގެ ގޮތުގަ އެވެ. އެހެންވެ، "ޔާމީނަށް ކުރާ އަނިޔާގެ ބަދަލު ގާނޫނީ އިމުގެ ތެރެއިން އިފާނެ" ކަމުގެ އިންޒާރު އޭނާ ދެއްވި އެވެ. އަދި ރައީސް ސޯލިހަށް އެންމެ ރަނގަޅު ގޮތަކީ އިސްތިއުފާ ދެއްވުން ކަމަށް ވެސް އޭނާ ވިދާޅުވި އެވެ.
"ރައީސް ޔާމީންގެ ފިކުރުގައި މި ގައުމުގައި ތިއްބެވި ސަޕޯޓަރުންނާއި އެ މަނިކުފާނަށް ތާއިދު ކުރައްވާ ހުރިހާ ބޭފުޅުންނާ އެއްކޮށްލީމާ އެއް ލައްކަ އެތައް ހާސް މީހުންނެއް އެބަ އަރައޭ. ރައީސް ޔާމީން ގިނިކަންޏާ ނުކުމެވަޑައިގެން އިރާދަކުރެއްވިއްޔާ މި އިންތިހާބު ކާމިޔާބު ކާމިޔާބު ކުރައްވާނީ އިންތިހާބުގެ ފުރަތަމަ ބުރުން،" އަބްދުއްރަހީމް ވިދާޅުވި އެވެ.
ޔާމީން މިނިވަންކުރުމަށް އިތުރު ގިޔަރަކަށް މަސައްކަތް ޖައްސަންޖެހޭ ކަމަށާއި، ސަރުކާރު ދެކެ ބިރު ނުގަންނަކަން ދެއްކުމަށްޓަކައި މަގުމައްޗަށް ނުކުމެ، އޮފީސްތަކަށް ގޮސް، ރައީސް އޮފީހަށް ވަދެ ސަރުކާރު ހިންގުން ހުއްޓުމަކަށް ގެންނަންވީ ކަމަށް ވެސް އަބްދުއްރަހީމް ވިދާޅުވި އެވެ.
