އިދިކޮޅު ޕީޕީއެމް/ޕީއެންސީގެ ލީޑާޝިޕުން ޖުމްހޫރީ ޕާޓީގެ ލީޑަރު އަދި ރިޔާސި ކެންޑިޑޭޓު ގާސިމް އިބްރާހިމާ މިއަދު ބައްދަލުކުރައްވައިފި އެވެ.
ގާސިމްގެ ރިސޯޓެއްގައި މިއަދު އޭނާއާ ބައްދަލުކުރެއްވީ، އިދިކޮޅުގެ ލީޑާޝިޕާ ހަވާލުވެގެން ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ، ފަރެސްމާތޮޑާ ދާއިރާގެ ޕީޕީއެމް މެމްބަރު ހުސެއިން މުހައްމަދު ލަތިފާއި، ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމްގެ އިތުރުން މަހިބަދޫ ދާއިރާގެ މެމްބަރު މުހައްމަދު ތޯރިގެވެ.
ޕީޕީއެމް/ޕީއެންސީއިން މިއަދު ބުނި ގޮތުގައި ގާސިމްއާއެކު ބޭއްވި ބައްދަލުވުމުގައި މަޝްވަރާކޮށްފައި ވަނީ "ގައުމުގައި ހުރި ބޮޑެތި މައްސަލަތަކާ" ގުޅޭގޮތުންނެވެ. އެހެންނަމަވެސް، އެ ވާހަކަތަކުގެ ތަފްސީލުތަކެއް ނުދެ އެވެ.
އެ ކޯލިޝަނުން ބުނި ގޮތުގައި ގާސިމާއެކު މަޝްވަރާ ކުރީ އެ ކޯލިޝަނުގެ ރިޔާސީ ކެންޑިޑޭޓު ކުރީގެ ރައީސް އަބްދުﷲ ޔާމީންގެ އިރުޝާދުގެ ދަށުން ކަމަށެވެ.
މިދިޔަ ރިޔާސީ އިންތިހާބުގައި އެމްޑީޕީއާއެކު ކޯލިޝަން ހެދުމުން ޖުމްހޫރީ ޕާޓީ އޮތީ ސަރުކާރުގައި ހިއްސާވާ ޕާޓީއެއްގެ ގޮތުގަ އެވެ. އޭރު ސަރުކާރުގެ ދިފާއުގައި ވާހަކަ ދެއްކެވި ނަމަވެސް، އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވާދަކުރައްވާނެކަން އިއުލާނުކުރައްވައި ގާސިމް ގެންދަވަނީ ސަރުކާރަށް ފާޑުވިދާޅުވަމުންނެވެ.
ގާސިމް ރިޔާސީ އިންތިހާބުގައި ވާދަކުރައްވަން އިއުލާނު ކުރެއްވުމުން އެމްޑީޕީ ތެރެއިން އުފެދުނު ޑިމޮކްރެޓްސް ފެކްޝަނުން ވެސް ގާސިމާއެކު މަޝްވަރާތަކެއް ކުރި އެވެ.
އެކަމަކު، މިހާރު ޑިމޮކްރެޓްސްއިން ސިޔާސީ މަސައްކަތް ކުރަމުންދަނީ ޕީޕީއެމް/ޕީއެންސީއާ ގުޅިގެންނެވެ. އެއީ ވެރިކަމުން ރައީސް އިބްރާހިމް މުހައްމަދު ސޯލިހު ދުރުކުރަން ކުރާ މަސައްކަތެއް ކަމަށް އެ ދެ ޕާޓީން ވެސް ބުނެ އެވެ. އަދި, ޕީޕީއެމް/ޕީއެންސީން އެ މަސައްކަތް ކުރަނީ ޔާމީންގެ އިރުޝާދުގެ ދަށުން ކަމަށް އެ ކޯލިޝަނުން ބުނެ އެވެ.
ޕީޕީއެމް/ޕީއެންސީގެ ކެންޑިޑޭޓެއްގެ ގޮތުގައި ޔާމީން ހަމަޖެއްސި ފަހުން، ވ. އާރަށުގެ މައްސަލައިގައި ކުރި 11 އަހަރުގެ ޖަލު ހުކުމާއެކު ރިޔާސީ ކެންޑިޑޭޓަކަށް ވުމަށް ޔާމީނަށް އޮތީ ހުރަސްއެޅިފަ އެވެ. އެކަމަކު، އެ ކޯލިޝަނުގެ ކެންޑިޑޭޓަކީ ޔާމީން ކަމަށާއި އެމަނިކުފާނުގެ ނަން ވޯޓު ކަރުދާހުގައި އޮންނާނެ ކަމަށް އިދިކޮޅުން ބުނެ އެވެ.
އާރަށުގެ މައްސަލައިގައި އެމަނިކުފާނުގެ މައްޗަށް ކޮށްފައިވާ ހުކުމް ހައި ކޯޓުން ބާތިލު ކުރާނެ ޕީޕީއެމް/ޕީއެންސީގެ ލީޑާޝިޕުން ބުނެ އެވެ. އެ މައްސަލަ ހައި ކޯޓުގައި އޮތް އިރު، ވ. ފުއްގިރީގެ މައްސަލައިގައި އެމަނިކުފާނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ދަނީ ކުރިއަށެވެ.
