ކެމްޕެއިން ދަތުރުފުޅުގައި ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހް ބޭނުންކުރައްވަނީ އަމިއްލަ އުޅަނދެއް ކަމަށް ވެރިކަން ހިންގާ އެމްޑީޕީއިން ބުނެފި އެވެ.
އެމްޑީޕީގެ ހަރަކާތްތެރިއަކު ކުރެއްވި ޓްވީޓްއެއްގައި ބުނެފައިވަނީ ކެމްޕެއިނު ދަތުރުފުޅުގައި ރައީސް ސޯލިހު ބޭނުންކުރައްވަނީ އަމިއްލަ ލޯންޗެއް ކަމަށާއި އަދި ކުރީގެ ރައީސުން މިފަދަ ދަތުރުތަކުގައި ބޭނުންކުރީ ސަރުކާރުގެ އުޅަނދުތައް ކަމަށެވެ.
ރައީސް ދަތުރުކުރައްވާ ލޯންޗުގެ ފޮޓޯއެއް ވެސް އެ ޓްވީޓުގައި ވަނީ ހިއްސާކޮށްފަ އެވެ.
ކެމްޕޭނުގެ ފުރަތަމަ ދަތުރުފުޅަށް ރައީސް ފުރާވަޑައިގެންނެވީ މިއަދު ހެދުނެވެ. އެ ދަތުރުފުޅުގައި ރައީސް ށ. އަތޮޅު ކޮމަންޑޫ، މަރޮށި، ނޫމަރާ އަދި ފޯކައިދޫ އަށް ވަޑައިގަތުމަށް ހަމަޖެހިފައިވާ ކަމަށް އެމްޑީޕީން ވަނީ ބުނެފަ އެވެ.
އެ ދަތުރުފުޅުގައި ރައީސްގެ އިތުރުން، މިހާތަނަށް އެމްޑީޕީއާއެކު ކޯލިޝަން ހަދާފައިވާ އަދާލަތު ޕާޓީގެ ލީޑަރު އިމްރާން އަބްދުﷲ އަދި އެމްޑީއޭގެ ލީޑަރު އަހުމަދު ސިޔާމް މުހައްމަދު ވެސް ބައިވެރިވެވަޑައިގަންނަވަ އެވެ. ފޮރިން މިނިސްޓަރު އަބްދުﷲ ޝާހިދާއި އެމްޑީޕީގެ އިސްވެރިން ވެސް މި ދަތުރުފުޅުގައި ރައީސާއެކު ށ. އަތޮޅަށް ވަޑައިގެންފައިވެ އެވެ.
