ރާއްޖޭގެ ސިޔާސީޕާޓީތަކުން ފައިސާ ހޯދުމާއި ހަރަދުކުރުމުގެ ކަންތައްތައް ހުރީ ގާނޫނޫނުގައި ކަނޑައަޅާފައިވާ އުސޫލުތަކާ ގާތްކުރާ ވަރަށް ވުރެ ވެސް ގޯސްކޮށް ކަމަށް އިލެކްޝަންސް ކޮމިޝަން (އީސީީ)ގެ ރައީސް ފުއާދު ތައުފީގު ވިދާޅުވެއްޖެ އެވެ.
"އަދަދު"ގެ "އެތެރެފުށް" ޕްރޮފްރާމްގައި ކުރި ސުވާލަކަށް ޖަވާބު ދެއްވަމުން ފުއާދު ވިދާޅުވީ ސިޔާސީ ޕާޓީތަކުން މާލީ ހިސާބުތައް ބަލަހައްޓާފައިވާ ގޮތް ބެލި އިރު ގޯސްކޮށް ހުރުމުން އެކަންތައްތައް އިސްލާހުކުރަން އީސީން އަންގާފައިވާނެ ކަމަށެވެ. އޭނާ ވިދާޅުވީ މާލީ ހިސާބުތައް ބެލެހެއްޓުން ހުރިހާ ޕާޓީއެއްގައި ވެސް އޮތީ ގޯސްކޮށް ކަމަށެވެ.
"[މާލީ ހިސާބުތައް ބެލެހެއްޓުން] އެހާ ރަނގަޅަކަށް ނޫން ހުރީ. ހުންނަން ވާ ވަރާ ގާތަށް ވެސް ރަނގަޅަކަށް ނޫން ހުރީ. އެހެންވީމާ އެ ބޭފުޅުންނަށް އެކަންތައްތައް ފާހަގަކޮށްދީފައި މިއަންނަ އަހަރު، މި ކުރިއަށް އޮތް އަހަރު އަޅުގަނޑުމެން [ބަލަން] އަންނަން ވާއިރު އެ ހުރި އުނިކަންތައްތައް އިސްލާހުކުރަން އަޅުގަނޑުމެން ނަސޭހަތްދީ އިރުޝާދުދީފައި ވާނީ،" ފުއާދު ވިދާޅުވި އެވެ.
ފުއާދު ވިދާޅުވި ގޮތުގައި މާލީ ހިސާބުތައް ހުރިހާ ޕާޓީތަކަކުން ވެސް ކޮންމެވެސް ގޮތަކަށް ބަލަހައްޓަ އެވެ. އެހެން ނަމަވެސް އެކަން އޮތީ އޭނާ ވިދާޅުވި ގޮތުގައި ވަރަށް ދޯދިޔާ ކޮށެވެ. ޕާޓީތަކަށް ފައިސާ ހޯދުމާއި ހަރަދުކުރުން ފަދަ ކުރަން ޖެހޭނީ ބޭންކިން ނިޒާމުގެ ތެރެއިން ކަމަށް ގާނޫނުގައި އޮތް ނަމަވެސް އެނޫން ގޮތް ގޮތަށް ޕާޓީތަކުން އަމަލުކުރަމުން ގެންދާ ކަމަށް ވެސް އޭނާ ވިދާޅުވި އެވެ.
ގާނޫނުގައި އެގޮތަށް އެކަން ކަނޑައަޅާފައި އޮތީ މަނީ ލޯންޑާ ކުރުން ފަދަ ކަންތައްތައް ހުއްޓުވަން ކަމަށާއި އެހެން ނަމަވެސް އެފަދަ ކުށްތައް ކުރާ މީހުން މިހާރު ވެސް އެކަން އެގޮތަށް ކުރާ ކަމަށް ވެސް ފުއާދު ވިދާޅުވި އެވެ.
"ބޭންކްގެ ނިޒާމުގެ ތެރެއިން ނޫން ގޮތަކަށް ކޮށްގެން ނުވާނޭ [ޕާޓީތަކުގެ ފައިސާގެ މުއާމަލާތްތައް ކޮށްގެން ނުވާނޭ ގާނޫނުގައި އޮތަކަސް] ލޯންޑާ ކުރުމާ އެކަހަލަ ކަންތައްތައް ކުރާ މީހުން، [އެކަންތައްތައް] އެބަ ކުރޭ،" ފުއާދު ވިދާޅުވި އެވެ.
އޭނާ ވިދާޅުވީ ޕާޓީތަކުން މާލީ މުއާމަލާތް ކުރުމުގައި ގާނޫނާ ހިލާފުވާ މައްސަލަ އަކީ ހައްލުކުރަން އުނދަގޫ ކަމެއް ކަމަށެވެ.
