މާލެ-ހުޅުމާލެ ހައިވޭގައި ހަރުކުރުމަށް އެ ސަރަހައްދުގައި ބަހައްޓާފައި ހުރި ސޯލާ ޕެނަލްތަކެއް، ވައިގަދަވެ މޫދަށް ވިއްސައިގެން ދިޔުމުން އެ މަސައްކަތް ކުރިއަށް ގެންދިޔަ ގޮތް ބަލަން ތަހުގީގެއް ހިންގަން ސަރުކާރުން ނިންމައިފި އެވެ.
މިއަދު ހަވީރު ހަރުކުރަން މަސައްކަތް ކުރި ހަތަރު ސޯލާ ޕެނަލެއް ވިއްސައިގެން ގޮސް މޫދަށް ވެއްޓުނެވެ. އެ މައްސަލާގައި މާލޭގެ މޭޔަރު މުހައްމަދު މުއިއްޒު ކުރެއްވި ޓްވީޓެއްގައި ވަނީ ނުރައްކާތެރި ހާދިސާއެއް ހިނގައިދާނެތީ އެ ކަމަށް ސަމާލު ވުމަށް އެދިވަޑައިގެން ކަންބޮޑުވުން ފާޅުކުރައްވައިފަ އެވެ.
އެ މަޝްރޫއުގެ ކޮމިއުނިކޭޝަންސް ސްޕެޝަލިސްޓް އިފާދު ވަހީދު ވިދާޅުވީ ވިއްސައިގެން ދިޔަ އެއްވެސް ޕެނަލްއަކީ ބްރިޖްގައި އެ ކަމަށް ގާއިމުކޮށްފައިވާ ސްޓްރަކްޗާގައި ހަރުކޮށްފައި ހުއްޓާ ވިއްސައިގެންދިޔަ ޕެނަލްތަކެއް ނޫން ކަމަށެވެ. އަދި އެ ތަކެތި މިހާރު މޫދުން ނަގާފައިވާ ކަމަށް އޭނާ ވިދާޅުވި އެވެ.
"މިހާތަނަށް ބެލިބެލުމުން ސްޓްރަކްޗާއަކަށް ގެއްލުމެއް ނުވޭ، އަދި ޑިޒައިން ފޯލްޓެއް ފާހަގަ ކުރެވިފައެއް ނުވޭ، ހައިވޭގައި ދަތުރު ކުރުމަށް ނުރައްކާވާ ފަދަ އެއްވެސް ހާދިސާއެއް ނުވަތަ އެފަދަ ނުރައްކަލެއް އޮތް ކަމަކަށް މިހާތަނަށް ބެލި ބެލުމުން ފާހަގަ ކުރެވިފައެއް ނެތް،" އިފާދު ވިދާޅުވި އެވެ.
މިނިސްޓްރީން ކޮންޓްރެކްޓަރު މަސައްކަތް ކުރިއަށް ގެންދިޔަ ގޮތާ ގުޅޭ ގޮތުން އިތުރު އިންޓާނަލް އިންވެސްޓިގޭޝަނެއް ކުރިއަށް ގެންދާނެ ކަމަށާއި އިތުރަށް މަސައްކަތް ކުރިއަށް ދާނީ އަޅަންޖެހޭ ސަލާމަތީ ފިޔަވަޅުތައް އަޅާފައިވޭތޯ ޔަގީން ކުރުމަށް ފަހު ކަމަށް އޭނާ ވިދާޅުވި އެވެ.
"މިކަމާ ގުޅިގެން ހަރުކުރުކޮށްފައިވާ އެއްވެސް ޕެނަލެއްގައި މައްސަލައެއް ހުރިތޯ ބަލާ މައްސަލައެއް ނެތްކަން ޔަގީން ކުރާނެ، އަދި މި މަސައްކަތް ކުރުމުގައި ސުޕަވައިޒް ކުރުން އިތުރުކޮށް ރިޕީޓްކޮށް އިންސްޕެކްޓް ކުރަމުން ގެންދާނެ،" އޭނާ ވިދާޅުވި އެވެ.
"އެކްސެލެރޭޓިންގް ސަސްޓެއިންބަލް ޕްރައިވެޓް އިންވެސްޓްމަންޓް އިން ރިނިއުވަބަލް އެނާޖީ (އެސްޕަޔާ)" ޕްރޮޖެކްޓުގެ ދަށުން މާލެ-ހުޅުމާލެ ހައިވޭގައި ހަރުކުރާ ސޯލާ ޕެނަލްތަކުގެ މަސައްކަތުގެ އަދި ނިމިފައި ވަނީ 70 ޕަސެންޓު މަސައްކަތެވެ. މިހާރު ކުރިއަށްދަނީ ހައިވޭގެ މޫދާވީ ފަޅީގައި ސްޓީލް ސްޓްރަކްޗާ ހަރުކުރުމުގެ މަސައްކަތާއި ސޯލާ ޕެނަލްތައް ހަރުކުރުމުގެ މަސައްކަތެވެ.
ވޯލްޑް ބޭންކުގެ އެހީގައި އެމްވަޔަރަމެންޓް މިނިސްޓްރީން ހިންގާ އެ މަޝްރޫ ކުރިއަށް ގެންދަނީ ތައިލެންޑުގެ "އެންސިސް ކޯ" ކުންފުނިންނެވެ.
އެ މަޝްރޫއުގެ ދަށުން އުފައްދާ ކަރަންޓް ސްޓެލްކޯއަށް ވިއްކުމަށް ހަމަޖެހިފައިވާ ރޭޓަކީ ކަރަންޓް ޔުނިޓަކަށް 10.09 ޔޫއެސް ސެންޓެވެ. އެއީ ދިވެހި ރުފިޔާއިން ކަރަންޓް ޔުނިޓަކަށް އެއް ރުފިޔާ 68 ލާރި އެވެ. އެސްޕަޔާ ގެ ފުރަތަމަ ފިޔަވަހީގެ ދަށުން ހުޅުމާލޭގައި 1000 ހައުސިން ޔުނިޓްތަކުގައި ގާއިމްކޮށްފައިވާ 1.5 މެގަވޮޓްގެ ސޯލާ ޕީވީގެ ނިޒާމުން އުފައްދާ ކަރަންޓް ސްޓެލްކޯއަށް ވިއްކަމުން ދަނީ 21 ޔޫއެސް ސެންޓަށެވެ.
އެ މަޝްރޫއު ނިމުމުން އަހަރަކަށް އުފައްދާ 7.3 މިލިއަން ކަރަންޓް ޔުނިޓުން ދައުލަތުން ކަރަންޓް އުފެއްދުމަށް ޓަކައި ތެލަށް ކުރާ ހޭދައިން ގާތްގަނޑަކަށް 15 އާއި 20 މިލިއަން ދިވެހި ރުފިޔާ ސަލާމަތްކުރެވޭނެ އެވެ.
