އެހެން ޕާޓީތަކުން, ޕީޕީއެމް/ޕީއެންސީގެ ރިޔާސީ ޓިކެޓުގެ ކެންޑިޑޭޓުގެ ވާހަކަ ދައްކަން ޖެހޭ ސަބަބެއް ނެތް ކަމަށް ބުނެ އިދިކޮޅުގެ ބައެއް މެންބަރުން ނުރުހުން ފާޅުކޮށްފި އެވެ.
ޕީޕީއެމްގެ ބައެއް މެންބަރުން ހިތްހަމަނުޖެހުނީ, އެ ޕާޓީ އާއި ދަ ޑިމޮކްރެޓްސްއިން އެއް ކެންޑިޑޭޓެއް ނެރޭނެ ކަމަށް ބުނެ ބައެއް ފަރާތްތަކުން ވާހަކަ ދައްކަމުން ދާތީ އެވެ. އަދި, މިވަގުތު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާތީ އިންތިހާބުގައި ވާދަނުކުރެއްވިއްޖެ ހާލަތެއްގައި ޕީޕީއެމް/ޕީއެންސީން އެހެން ކެންޑިޑޭޓެއްގެ ފަހަތަށް އަރާނެ ކަމަށް ބުނަމުން ދާތީ އެވެ.
"ނަޝީދެއްވެސް ނޫން! ޔާމިނެއްވެސް ނޫން! ގުޅިފައިވާ ޕާޓީތަކުގެ ކެންޑިޑޭޓެއް.." މި ސުރުހީގައި މިއަދު ވަނީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އޯޝަން ވީކްލީ ނޫހުގައި ލިޔުމެއް ވެސް ޝާއިއުކޮށްފަ އެވެ.
މިކަމާ ހިތްހަމަނުޖެހުން ފާޅުކޮށް ޕީޕީއެމްގެ ނައިބު ރައީސް އަހްމަދު ޝިޔާމް ވިދާޅުވީ, ރައީސް ޔާމީނަކީ އެންމެ ފުރަތަމަ ޕާޓީއަކުން މިއަހަރުގެ ރިޔާސީ އިންތިހާބަށް ދެއްކި ކެންޑިޑޭޓު ކަމަށެވެ. އަދި ނިންމުން ބަދަލުނުވާކަން ހާމަކުރައްވަމުން އޭނާ ވިދާޅުވީ މިއަހަރުގެ ރިޔާސީ އިންތިހާބަށް ކެންޑިޑޭޓުން ކުރިމަތިލާއިރު, އެންމެ ފުރަތަމަ އިލެކްޝަން ކޮމިޝަނަށް ވަންނާނެ ކެންޑިޑެސީ ފޯމަކީ ރައީސް ޔާމީންގެ ފޯމު ކަމަށް ވެސް ޕީޕީއެމްގެ ނައިބު ރައީސްކަން ވެސް ކުރައްވާ ޝިޔާމް ވިދާޅުވި އެވެ.
އެ ޕާޓީއަށް ނިސްބަތްވާ ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް (ސެމްބެ) ވިދާޅުވީ, ޕީޕީއެމްގެ ކެންޑިޑޭޓަކީ ރައީސް ޔާމީން ކަމަށެވެ. އަދި, އެހެން ޕާޓީތަކުން ޕީޕީއެމް/ޕީއެންސީގެ ރިޔާސީ ޓިކެޓުގެ ވާހަކަ ދައްކަން ޖެހޭ ސަބަބެއް މެދުވެރިވެފައި ނެތް ކަމަށް ވެސް ވިދާޅުވި އެވެ.
ރިޔާސީ އިންތިހާބުގައި ޕީޕީއެމުން ރައީސް ޔާމީން ނޫން ކެންޑިޑޭޓަކު ނެރެން ގަސްތު ނުކުރާކަމަށް ތަކުރާރުކޮށް އެ ޕާޓީގެ މެންބަރުން ވިދާޅުވަމުން ދިޔަ ނަމަވެސް, އެ ޕާޓީން ވަނީ މިހާރުގެ ރައީސުލްޖުމްހޫރިއްޔާ އެ މަގާމުން ދުރުކުރުމަށް ދަ ޑިމޮކްރެޓްސްއާއެކު އިއްތިހާދުވެފަ އެވެ. އެއާއެކު, ދެ ޕާޓީން ގުޅިގެން ރިޔާސީ އިންތިހާބަށް ކެންޑިޑޭޓަކު ނެރުމުގެ އަޑުތައް ވަނީ ގަދަވެފަ އެވެ.
"ސަރުކާރު ބަދަލުކުރަން ކުރަން ޖެހުނު ހުރިހާ ކަމެއް އަޅުގަނޑުމެން ކުރާނެ ހަމަ އެކުއެކީގައި. އެހެންވީމާ ކޮންމެ ކަމެއް ވެސް އެއީ ހަމަ ޕޮސިބަލް ކަންކަން އިނގޭތޯ،" ދެ ޕާޓީގެ މަޝްވަރާތަކަށްފަހު މީގެ ކުރިން ދެއްވި ނޫސްވެރިންގެ ބައްދަލުވުމެއްގައި ޑިމޮކްރެޓްސްގެ ފަރާތުން އިންނެވި މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވި އެވެ.
ދެ ޕާޓީން އަތުގުޅާލައިގެން ތިބީ, ރައީސް ސޯލިހުގެ ވެރިކަން ނިމުމަކަށް ގެނައުމަށް ކުރަން ޖެހުނު ކޮންމެ ކަމެއް ކުރުމަށެވެ. ނަމަވެސް އެކުގައި މަސައްކަތް ކުރައްވާނީ ދެ ޕާޓީން އެއްބަސްވެވޭ ކަންކަމުގައި ކަމަށް ދަނީ ބުނަމުންނެވެ.
ޕީޕީއެމް އާއި ޑިމޮކްރެޓްސްއިން ގުޅިގެން މަސައްކަތްތަކެއް ފަށާފައިވާއިރު, އެ ދެ ޕާޓީން ވެސް ވަނީ އަންނަ ރިޔާސީ އިންތިހާބުގައި ކެންޑިޑޭޓަކު ނެރެން ނިންމާފަ އެވެ. އެގޮތުން ޕީޕީއެމުން ރައީސް ޔާމީން ނެރެން ނިންމާފައިވާއިރު, ބެލެވޭ ގޮތުގައި ޑިމޮކްރެޓްސްގެ ކެންޑިޑޭޓަށް ވާނީ ރައީސް ނަޝީދެވެ.
