މަޖީދީ މަގުން ހިނގާފައި ދިޔަ މީހެއްގެ ގައިގައި ލައިސަންސް ނެތް މީހަކު ދުއްވި ސައިކަލަކުން ޖެހި ލިބުނު ހާނީއްކަތަކަށް އޭޑީކޭގައި ފަރުވާދޭން ފަށައިފި އެވެ.
މަޖީދީ މަގުގައި ހިންގަމުން އަންނަ ރެޑްވޭވު ފިހާރަ ކުރިމަތިން ކަހަލަ ގޮތަކަށް ހިނގި އެ އެކްސިޑެންޓުގައި އަނިޔާވީ 50 އަހަރުގެ ދިވެހި ފިރިހެނަކަށް ކަމަށް ފުލުހުން ބުންޏެވެ. އޭނާއަށް ވެފައި ވަނީ ކިހައިވަރެއްގެ ޒަހަމުތަކެއް ކަމެއް އަދި ސާފެއް ނުވެ އެވެ.
ފުލުހުން ބުނީ ރޭ ފަތިހު 5:00 އެހާއިރު، ހިނގި އެ އެކްސިޑެންޓުގައި ސައިކަލު ދުއްވަން އިނީ 22 އަހަރުގެ ޒުވާނެއް ކަމަށާއި އޭނާ އަތުގައި އެއްގަމު އުޅަނދުފަހަރު ދުއްވުމުގެ ލައިސަންސް ނެތް ކަމަށެވެ.
"އެކްސިޑެންޓުގައި ސައިކަލު ދުއްވި 22 އަހަރުގެ ދިވެހި ފިރިހެން މީހާއަކީ ސައިކަލު ދުއްވުމުގެ ލައިސަންސް ނެތް މީހެއް، މި މައްސަލަ ފުލުހުން ގެންދަނީ ތަހުގީގު ކުރަމުން،" މީޑިއާތަކަށް ފުލުހުން ފޮނުވި މެސެޖުގައި ބުނެފައިވެ އެވެ.
މަގުމަތީ އެކްސިޑެންތުތަކުގައި އަނިޔާވާ މީހުންނާއި މަރުވާ މީހުންގެ އަދަދު އިތުރުވަމުންދާ ދިއުމާ ގުޅިގެން ފުލުހުން ވަނީ ދުއްވާ އެއްޗެހި ދުއްވާއިރު ހިނގާބިނގާވެ އުޅޭއިރު އިތުރަށް ސަމާލުވުމަށާއި މަގުމަތީގެ ރައްކާތެރިކަމަށް ހެދިފައި ހުންނަ ގަވާއިދުތަކަށް ހުރުމަތްތެރިކޮށް ހިތުމަށް އެދިފަ އެވެ.
