ރައްޔިތުންގެ މަޖިލިސް ރަނގަޅަށް މަސައްކަތް ނުކުރާތީ ހައްގުތައް ހޯދަން ރައްޔިތުންނަށް ހުރަސްއެޅޭ ކަމަށް ބުނެ ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން މިއަދު ފާޑުކިޔައިފި އެވެ.
ރައްޔިތުންގެ މަޖިލީހުގެ ދެ ވަނަ ދައުރު ނިންމައި މިއަދު ޗުއްޓީއަށް ދިޔުމުން، އެޗްއާރްސީއެމުން ނެރުނު ބަޔާނެއްގައި ބުނެފައި ވަނީ ރައްޔިތުންގެ މަޖިލީހުގެ މަސައްކަތްތައް މަޑުޖެހިފައިވާތީ އެއީ ގާނޫނީ ނިޒާމުގެ ތެރެއިން ހައްގުތައް ކަށަވަރު ކުރަން އެޅޭ ހުރަހެއް ކަމަށެވެ.
"ރައްޔިތުންގެ މަޖިލިސް ފުރިހަމަށް ހިނގަމުންނުދާ ކަމީ މި ކޮމިޝަނުން ނުހަނު ކަންބޮޑުވާ ކަމެއް ކަމުގައި ދަންނަވަން،" އެ ކޮމިޝަނުން ބުނެފައިވެ އެވެ. "ހައްގުތަކާ ގުޅުންހުރި މުހިންމު ބިލުތަކުގެ މަސައްކަތް އެންމެ ފުރިހަމައަށް ކުރިއަށްނުދިޔުމަކީ ގާނޫނީ ނިޒާމުގެ ތެރެއިން ހައްގުތައް ކަށަވަރު ކުރުމަށް އެޅިގެންދާ ހުރަހެއް."
ރައްޔިތުންގެ ހައްގުތަކާ ގުޅޭ ބިލުތަކެއް މަޖިލީހުގައި މަޑުޖެހިފައި އޮތް ކަމަށް އެޗްއާާރްސީއެމުން ބުނި ނަމަވެސް އެއީ ކޮން ބިލުތަކެއްކަން އެ ކޮމިޝަނުގެ ބަޔާނުގައި ނުބުނެ އެވެ.
ރައްޔިތުންގެ މަޖިލީހަކީ ދައުލަތުގެ އެހެން ބާރުތަކާއި ވުޒާރާތައް ޒިންމާދާރު ކުރުވަން ހުރި ގުނަވަން ކަމަށްވާއިރު މަޖިލިސްގެ މަސައްކަތް މަޑުޖެހުމަކީ "އެއް ބާރު އަނެއް ބާރަށް ފާރަވެރިވެ، ޖަވާބުދާރީ ކުރުވުމަށް އޮތް ހުރަހެއް" ކަމަށް ވެސް އެޗްއާރްސީއެމުން ބުނެ އެވެ.
އޭގެ އިތުރުން، އިލެކްޝަންސް ކޮމިޝަނުގެ މެމްބަރެއްގެ ދައުރު ޖުލައި 25، އަށް ހަމަވާތީ މެމްބަރަކު ފާސް ކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަން ފާސްނުކޮށް ދައުރު ނިންމައި ޗުއްޓީއަށް ދިޔުމުން އެކަމާމެދު ވެސް އެޗްއާރްސީއެމުން ކަންބޮޑުވުން ފާޅު ކުރި އެވެ.
ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގައި ބުނެފައިވާ ގޮތުން ރައްޔިތުންގެ މަޖިލީހުގެ ދެ ވަނަ ދައުރުގެ ހިނގާނީ ޖޫން މަހުގެ އެންމެ ފަހު ބުރާސްފަތި ދުވަހާ ހަމައަށެވެ. މިއަދަކީ ދެ ވަނަ ދައުރުގެ އެންމެ ފަހު ޖަލްސާ ބާއްވަންޖެހޭ ދުވަހެވެ. އެހެން ނަމަވެސް ދައުރުން ބޭރުން ޖަލްސާ ބޭއްވުމަށް މަޖިލީހުގެ ގަވާއިދު ހުއްދަ ކުރެ އެވެ.
