ޕީޕީއެމް/ޕީއެންސީގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމުގެ އިސްތިއުނާފްގެ ޝަރީއަތަށް ހުރަސް އެޅޭ ގޮތަށް ދަށު ކޯޓުގައި ކުރިއަށްދާ ޝަރީއަތް ގެންދާތީ ހިތްހަމަނުޖެހުން ފާޅުކުރައްވައިފި އެވެ.
ޔާމީން ޖަލަށް ލުމަށް ހުކުމްކުރީ، ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެއްޖެ ކަމަށް ކަނޑައެޅުމަށް ފަހުގަ އެވެ. އެ މައްސަލަ ވެސް ވަނީ ހައި ކޯޓުގައި އިސްތިއުނާފުކޮށްފަ އެވެ.
ޔާމީންގެ ވެރިކަމުގައި ހިންގި އެމްއެމްޕީއާރުސީ ބޮޑު ހިޔާނާތުގެ މައްސަލާގައި ހިމެނޭ އެ މުއާމަލާތުގެ މައްސަލާގައި ޖަލު ހުކުމެއް ތަންފީޒުކުރައްވަމުން ގެންދަވާ ޔާމީންގެ މައްޗަށް، ރ. ފުއްގިރި މުއާމަލާތުގެ މައްސަލާގައި އުފުލާފައިވާ ދައުވާތަކުގެ ޝަރީއަތް ވެސް ކްރިމިނަލް ކޯޓުގައި ކުރިއަށް އެބަ ގެންދެ އެވެ.
އެ މައްސަލާގާއި މިއަދު ހެނދުނު ނުވައެއް ޖެހިއިރު ފެށި އަޑުއެހުން ނިމުނީ މިރޭ ދިހައެއް ޖެހި ފަހުންނެވެ. މިއަދު ކުރިއަށް ގެންދިޔައީ ދައުލަތުގެ ފަރާތުން ހެކިންގެ ގޮތުގައި ހުށަހަޅާފައިވާ ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ހެކިބަސް އަދާކުރުމެވެ.
މާދަމާ ހެނދުނު ނުވައެއް ޖަހާއިރު ވެސް އަޑުއެހުމެއް ތާވަލުކޮށްފައިވާއިރު މާ ކައިރިކައިރި ގިނަ އަޑުއެހުންތަކެއް ބާއްވާތީ ޔާމީން ކަންބޮޑުވުން ފާޅުކުރެއްވި އެވެ. ޔާމީން ވިދާޅުވީ މާދަމާ ހައި ކޯޓުގައި އިސްތިއުނާފުގެ އަޑުއެހުމެއް ވެސް ނުބޭއްވުނީ ކްރިމިނަލް ކޯޓުގެ އަޑުއެހުން އޮތުމުން ކަމަށެވެ.
"އަދަދު" ނޫހަށް ވެސް އެނގިފައިވާ ގޮތުގައި ހައި ކޯޓުގައި އިސްތިއުނާފުކޮށްފައިވާ ޔާމީންގެ ޖަލު ހުކުމުގެ މައްސަލައިގެ އަޑުއެހުމެއް މާދަމާ ބޭއްވުމަށް ހައި ކޯޓުން މަސައްކަތްކޮށްފައިވެ އެވެ. ނަމަވެސް މާ ކުރިން ކްރިމިނަލް ކޯޓުން އަޑުއެހުމުގެ ނޯޓިސް ފޮނުވާފައިވާތީ، މިހާރު އޮތީ ބުރާސްފަތި ދުވަހު ބާއްވާ ގޮތަށެވެ.
ޔާމީންގެ އިތުރުން މައްސަލާގައި ދައުވާކުރާ އެހެން ފަރާތްތަކުގެ ދިފާއީ ވަކީލުން ވެސް އެ މީހުން އިތުރު މައްސަލަތަކަށް ވެސް ވަގުތު ދޭން ޖެހޭތީ މާދަމާ އަޑުއެހުމެއް ނުބާއްވާ ކުރިއަށް ގެންދިޔުމަށް އެދިފަ އެވެ. ކޮންމެ ގޮތަކަށް އަމަލުކުރި ނަމަވެސް ދައުލަތުގެ އިއުތިރާޒެއް ނެތް ކަމަށް ދައުލަތުގެ ވަކީލުން ބުންޏެވެ.
މައްސަލައާ ހަވާލުވެ ހުންނެވި ކްރިމިނަލް ކޯޓުގެ ގާޒީ އަލީ ނަދީމް ވިދާޅުވީ މާދަމާ ބާއްވާ އަޑުއެހުން ކެންސަލް ކުރުމަށް ޝަރީއަތުން ބޭނުން ނުވާ ކަމަށެވެ. އަދި އެ ގޮތަށް އިއުލާން ކުރެއްވުމަށްފަހު މިއަދުގެ އަޑުއެހުން ނިންމަވާލެއްވި އެވެ.
މާދަމާގެ އިތުރުން ބުދަ ދުވަހު ވެސް އަޑުއެހުމެއް ބާއްވަން ވަނީ ތާވަލުކޮށްފަ އެވެ.
ޔާމީންގެ މައްޗަށް އިއްވާފައިވާ ޖަލު ހުކުމް ދެމިއޮތްހާ ހިނދަކު ޔާމީނަށް ކުރިއަށް އޮތް ރިޔާސީ އިންތިހާބުގައި ވާދައެއް ނުކުރެވޭނެ އެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
ޔާމީން މިނިވަންކުރުމަށް ގޮވާލައި، ޕީޕީއެމް/ޕީއެންސީގެ ސަޕޯޓަރުން ގެންދަނީ ސިލްސިލާކޮށް ކޮންމެ ރެއަކު ވެސް މާލޭގެ މަގުތައް މަތީގައި މުޒާހަރާ ކުރަމުންނެވެ.
