ސިއްހީ ދާއިރާ ޑިޖިޓަލައިޒް ކުރަން 56 މިލިއަން ރުފިޔާގެ ތަކެތި ހަވާލުކޮށްފި އެވެ.
ސިއްހީ ދާއިރާ ޑިޖިޓަލައިޒްކޮށް އައިޓީ އިންފްރާންސްޓްރަކްޗާ ހަރުދަނާ ކުރުމަށް ބޭނުންވާ ސާމާނު ހަވާލުކުރުމަށް ބޭއްވި ރަސްމިއްޔާތުގައި, އެތަކެތި ހަވާލުކުރީ ފަސް ރީޖަނަލް ހޮސްޕިޓަލާއި, 15 އަތޮޅު ހޮސްޕިޓަލް އަދި 163 ސިއްހީ މަރުކަޒަކަށެވެ. ހަވާލުކުރީ 608 ކޮމްޕިއުޓާ ސިސްޓަމާއި, 44 ލެޕްޓޮޕާއި 500 ޓެބްލެޓާއި 551 ޕްރިންޓަރާއި 14 ވީޑިއޯ ކޮންފަރެންސް ސިސްޓަމެވެ.
ދައުލަތުގެ ބަޖެޓުން 56 މިލިއަން ރުފިޔާ ހަރަދުކޮށްގެން ހިންގާ އެ މަޝްރޫއަކީ ރާއްޖޭގައި ހިންގާ އައިސީޓީ ހާޑްވެއާގެ އެންމެ ބޮޑު އެއް މަޝްރޫއު އެވެ.
މިއާއެކު, އެއް ސިސްޓަމަކުން ގުޅާލުމަށް ކުރާ މަސައްކަތަށް އިތުރު ކުރިއެރުމެއް ލިބި, ފާފު އަތޮޅުގައި ފަށާފައިވާ ޕްރައިމަރީ ހެލްތްކެއާ ޕްރިޖެކްޓު މުޅި ރާއްޖެއަށް ފުޅާކުރެވިގެންދާނެ ކަމަށް ހެލްތް މިނިސްޓްރީން ބުނެ އެވެ.
އެ ތަކެތި ހަވާލު ކުރުމަށް ބޭއްވި ރަސްމިއްޔާތުގައި ހެލްތު މިނިސްޓަރު އަހުމަދު ނަސީމް ވިދާޅުވީ, މިއަދު ހަވާލުކުރި ސާމާނުތަކަކީ ކުރިމަގުގައި ހިދުމަތަށް ބޭނުންވާ އެހެން ސިސްޓަމްތަކާއި އެޕްލިކޭޝަންތަކަށް ބޭނުންވާނެ ފުރިހަމަ އައިޓީ ޕެކޭޖެއް ކަމަށެވެ. އަދި މިއީ ދުރާލާ ރާވައިގެން ކުރި މަސައްކަތްތަކެއްގެ ނަތީީޖާގެ ގޮތުގައި އޭނާ ފާހަގަކުރެއްވި އެވެ.
"ސިއްހީ ހިދުމަތްތައް އެއް ނެޓްވޯކަކުން ގުޅާލުމުން ރާއްޖޭގެ ކޮންމެ ސިއްހީ މަރުކަޒަކުން ހިދުމަތް ހޯދަން ދިޔަޔަސް، ތިމާގެ ހެލްތު ރެކޯޑް އަދި ޓެސްޓުތަކުގެ ނަތީޖާ ކިހިލިޖަހައިގެން ދާންޖެހުން ނިމުމަކަށް އައިސް، އެމީހާގެ މައުލޫމާތު ކޮންމެ މަރުކަޒަކުން ވެސް ބެލެން ހުރުމަކީ ރައްޔިތުންނަށް ވަރަށް ބޮޑަށް ފަސޭހަވެގެންދާނޭ ކަމެއް" ސިއްހީ ދާއިރާ ޑިޖިޓަލައިޒް ކުރުމުގެ ފައިދާތައް ފާހަގަކޮށްލަމުން ނަސީމް ވިދާޅުވި އެވެ.
ކަރުދާހާ ވޯކީޓޯކީގެ ޒަމާނުން ޑިޖިޓަލް ޓެކްނޮލޮޖީއާ އާޓިފިޝަލް އިންޓެލިޖެންސާ ހަމައަށް ވަސީލަތްތައް ތަރައްގީވީ ނަމަވެސް ހެޔޮ ބަދުގެނެވޭނީ ދުރު ވިސްނުމާއި އަޒުމާ އެކުގައި ކަމަށް ވެސް އޭނާ ވިދާޅުވި އެވެ. ކުރީގެ ދަތި ހާލުގައި ވެސް އޭރުގެ ސިއްހީ ހިދުމަތްތެރިގެ އަޒުމް ކަމަށްވާ ކޮންމެ ހާލެއްގައިވެސް ކުރަންޖެހޭ މަސައްކަތްތައްކޮށް، ރައްޔިތުންނަށް ދޭންޖެހޭ ހިދުމަތްތައް ދެމެހެއްޓުމުގެ އަޒުމަކީ، ބަލައިގަނެ، އާލާކޮށް ދިރުވަންޖެހޭ އަޒުމެއް ކަމަށް ވެސް މިނިސްޓަރު ވިދާޅުވި އެވެ.
