ޕާޓީއާ އެކު ކުރިއަށް ދިއުމަސް އެކަށީގެންވާ ފަދަ މާހައުލެއް ނެތް ކަަމަށް ބުނެ މާލެ ސިޓީގެ މޭޔަރު، ޑރ. މުއިއްޒުގެ ދެބެންގެދެދަރި ކޮއްކޮ، އަހުމަދު ގާލިބް ޕީޕީއެމުން ވަކިވުމަށް އެދި އަމިއްލައަށް ހުށަހަޅައިފި އެވެ.
ޕީޕީއެމުން ވަކިވުމަށް އެދި ހުށަހަޅާފައި ވާކަމަށް ގާލިބު ވިދާޅުވީ ސޯޝަލް މީޑިއާގައި މިއަދު ލިޔުނު މެސެޖެއްގަ އެވެ.
"މި ވަގުތު ޕާޓީއާއި އެކު ކުރިއަށް ދިއުމަށް އެކަށީގެންވާ ހާލަތެއް / މާހައުލެއް އަޅުގަނޑަށް ނެތަތީވެ، ޕްރޮގްރެސިވް ކޮންގްރެސް ކޯލިޝަން ކެލާ ދާއިރާ ރައީސް ކަމުންނާއި، ޕާޓީގެ ސެނެޓުން މިއަދުން ފެށިގެން އިސްތިއުފާ ދިނުމަށްފަހު ޕާޓީން ވަކިވުމަށް އެދި ހުށަޅައިފިން،" ގާލިބުގެ ޓުވީޓުގައި ލިޔެފައިވެ އެވެ.
ގާލިބް އެ ނިންމުން ނިންމި ސީދާ ސަބަބެއް މިހައިތަނަށް އަދި ސާފެއް ނުވެ އެވެ. ނަމަވެސް ޕީޕީއެމް/ޕީއެންސީ ކޯލިޝަނުގެ ތެރޭގައި ރިޔާސީ ޓިކެޓާ މެދު ހިޔާލުތަފާތުވުން އުފެދި މަސްލަހަތު ގޯސްވެފައިވާ ކަމަށް ވަނީ އަޑުފެތުރިފަ އެވެ.
އެގޮތުން ގާލިބުގެ ބޭބެ، މުއިއްޒަކީ އިދިކޮޅު ކޯލިޝަނުގެ ބައެއް ބޭފުޅުން ތުހުމަތުގެ އިނގިލި ދިއްކުރައްވާ އެއް ބޭފުޅެކެވެ. އެހެނަސް ޑރ. މުއިޒު ވަނީ އެކަން ދޮގު ކުރައްވައި، އެ މަނިކުފާނު ހުންނެވީ ރައީސް ޔާމީންގެ ފަހަތްޕުޅުގައިކަން ލައިވް ޕްރެސް ކޮންފަރެންސެއްގައި ކަށަވަރުކޮށްދެއްވައިފަ އެވެ.
އަހުމަދު ގާލިބު ޕާޓީން ވަކިވުމަށް އެދި ހުށަހެޅިއިރު، އޭނާއަކީ ޕީޕީއެމްގެ ސެނެޓުގައި ވެސް ހިމެނިލައްވާ ބޭފުޅެކެވެ. އޭނާ ވަނީ މީގެ ކުރިން ވަށަފަރު ކައުންސިލުގެ ނައިބު ރައީސްގެ މަގާމު ވެސް ފުރުއްވައިފަ އެވެ. ޕާޓީން ވަކިވުމަށް އެދި ހުށަހެޅުމާ ހަމައަށް އޭނާ ހުންނެވީ އިދިކޮޅު ކޯލިޝަންގެ، ކެލާ ދާއިރާގެ ރައީސްގެ މަގާމުގަ އެވެ. އެ މަގާމަށް އޭނާ އިންތިހާބުވީ މިދިޔަ ނޮވެމްބަރު، 6 ގަ އެވެ.
