ޖަލްސާއަށް ހާޒިރުވި މީހުންގެ އަދަދު މަދުވެ، ޖުމްހޫރީ ޕާޓީގެ ރިޔާސީ ޓިކެޓު ހަވާލުކުރުމުގެ ޖަލްސާ ފެށުން ވަރަށް ބޮޑަށް ލަސްވެއްޖެ އެވެ.
ޖޭޕީ ލީޑަރު ގާސިމް އިބްރާހިމާ ޓިކެޓު ހަވާލުކުރުމަށް މިރޭ ކާނިވަލުގައި ބާއްވާ ރަސްމިއްޔާތު ފަށަން ހަމަޖެހިފައި އޮތީ 08:30 ގަ އެވެ. އެހެންނަމަވެސް 10:00 ޖަހަން ކުޑަތަންވިއިރު ވެސް މި ޖަލްސާ ފަށާފައިނުވެ އެވެ.
މި ޖަލްސާއަށް ކާނިވާ ސަރަހައްދު ތައްޔާރުކޮށް ގޮނޑި ޖަހާފައިވާއިރު، ގިނަ ގޮނޑިތައް އަދިވެސް ހުރީ ހުސްކޮށެވެ. އަދި, އޭގެ ތެރެއިން ގިނަ އަދަދެއްގެ ގޮނޑިތަކެއް ވަނީ ނަގާފަ އެވެ.
ބެލެވޭ ގޮތުގައި ޖަލްސާ ފަށާފައިނުވަނީ ހާޒިރުވީ މީހުންގެ އަދަދު މަދުވުމުގެ ސަބަބުންނެވެ. އަދި, ޖަލްސާއަށް ޖޭޕީގެ ރިޔާސީ ކެންޑިޑޭޓު ގާސިމް ހާޒިރުވުން ވެސް ވަރަށް ބޮޑަށް ލަސްވެގެންދިޔަ އެވެ.
މިރޭގެ ޖަލްސާއާ ގުޅިގެން އިއްޔެ އެ ޕާޓީން ބޭއްވި ނޫސްވެރިންގެ ބައްދަލުވުމެއްގައި ގާސިމްގެ ސްޕެޝަލް އެޑްވައިޒަރު ރިޔާޒް ރަޝީދު ވަނީ ޖަލްސާގައި 4000 މީހުން ބައިވެރިވާނެ ކަމަށް ވިދާޅުވެފަ އެވެ.
މި ޖަލްސާއަށް މާލެއިން ބޭރުން މީހުން ނުގެންނާނެ ކަމަށާއި ޖަލްސާ ވެގެން ދާނީ މިހާތަނަށް ބޭއްވީ އެންމެ ބޮޑު އެއް ޖަލްސާއަށް ކަމަށް އޭނާ ވިދާޅުވި އެވެ.
