ރައްޔިތުންގެ މަޖިލީހުގެ މެޖޯރިޓީ އޮންނަ އެމްޑީޕީން މެމްބަރުންތަކެއް ވަކިވެފައި ވާތީ، މަޖިލީހުގެ ކޮމިޓީތަކުގެ އެކުލެވުމަށް ބަދަލު ގެނައުމުގެ މަޝްވަރާތައް މިއަދު ފަށާނެ ކަމަށް އެމްޑީޕީން ބުނެފި އެވެ.
އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް "އަދަދު" އަށް ވިދާޅުވީ މަޖިލީހުގެ އިދާރާގައި މިއަދު ކުރާ މަޝްވަރާތަކަށް ފަހު ކޮމިޓިތަކާ މެދު މިއަދު ގޮތެއް ނިންމާނެ ކަމަށެވެ.
މަޖިލީހުގެ ދާއިމީ ކޮމިޓީތައް އެކުލަވައިލަނީ މަޖިލީހުގައި ތަމްސީލުކުރާ ސިޔާސީ ޕާޓީތަކުގެ މެމްބަރުން ތިއްބަވާ ނިސްބަތުންނެވެ. ކޮމިޓީތަކުގެ މެޖޯރިޓީ އެގޮތުން ލިބެނީ މަޖިލީހުގެ މެޖޯރިޓީ އޮންނަ އެމްޑީޕީއަށެވެ. އެހެން ނަމަވެސް އެޕާޓީން 13 މެމްބަރަކު ވަކިވެވަޑައިގެން، ދަ ޑިމޮކްރެޓްސްގެ ނަމުގައި އާ ޕާޓީއެއް ހެދުމުގެ މަސައްކަތް ފެށިއިރު، އެޕާޓީން ކޮމިޓީތަކަށް ލާފައިވާ މެމްބަރުން އޭގެ ތެރޭގައި ހިމެނިވަޑައިގެންނެވި އެވެ. އެމްޑީޕީން ވަކިވެވަޑައިގެންނެވި މެމްބަރުންގެ ތެރޭގައި ބައެއް ކޮމިޓީތަކުގެ މުގައްރިރުން ވެސް ހިމެނިވަޑައިގެންނެވި އެވެ.
ކޮމިިޓީތަކުގެ އެކުލެވުން އެހެންވެ ބަދަލުކުރަން ޖެހޭ އިރު، ކޮމިޓީތަކުގައި މުހިއްމު ގިނަ މައްސަލަތަކެއް ވެސް ނުނިމި އެބަ ހުއްޓެވެ. ސަރުކާރުގެ ފަރާތުން މަޖިލީހަށް ހުށަހަޅާފައިވާ ބައެއް ބިލުތައް އޭގެ ތެރޭގައި ހިމެނެ އެވެ.
ދެކުނުގެ އީއީޒެޑްގެ މައްސަލައިގައި ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގައި ޖަވާބުދާރީވަނިކޮށް މެމްބަރަކު ނެގި އިމްތިޔާޒުގެ މައްސަލަ ވެސް ނުބެލި އޮތީ ކޮމެޓީ އެކުލަވާނުލެވި އޮތުމުންނެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް ވެސް ހުށަހަޅާފައިވާއިރު އެކަން ކުރިއަށް ގެންދަން ބާއްވާ ޖަލްސާގައި ވެސް ކޮމެޓީތަކުން މުހިންމު ރޯލެއް އަދާ ކުރަންޖެހެ އެވެ.
