ދިވެހިރާއްޖޭގެ ދެކުނުން އިން ކަނޑައެޅި މައްސަލައިގައި އެއްވެސް ކަމެއް ސިއްރު ކުރުމުގެ ނިޔަތެއް އަދި މަސްލަހަތެއް ވެސް ސަރުކާރުގެ ނެތް ކަމަށް ބަންޑާރަ ނައިބު އިބްރާހިމް ރިފްއަތު މިއަދު ވިދާޅުވެއްޖެ އެވެ.
އިން ކަނޑައެޅި މައްސަލައިގައި ސިއްރު މަސައްކަތްތަކެއް ސަރުކާރުން ކުރި ކަމަށް އިދިކޮޅުން ތުހުމަތު ކުރަމުން ދަނިކޮށް، އޭނާގެ އިތުބާރު ނެތްކަމުގެ މައްސަލަ ހުށަހެޅުމުން އޭގެ ދިފާއުގައި މަޖިލީހުގައި މިއަދު ވާހަކަ ދައްކަވަމުން ރިފްއަތު ވިދާޅުވީ ސަރުކާރުން ކަމެއް ސިއްރުނުކުރާކަމުގެ ޔަގީންކަން ރައްޔިތުންނަށް އަރުވާ ކަމަށެވެ.
"މި މައްސަލައިގައި އެއްވެސް ކަމެއް ސިއްރު ކުުރުމުގެ ނިޔަތެއް، މަސްލަހަތެއް ނެތްކަން ދިވެހި ސަރުކާރުގެ ނެތްކަން ރައްޔިތުންނަށް ޔަގީންކޮށްދެން،" ބަންޑާރަ ނައިބު މިއަދު ވިދާޅުވި އެވެ.
އޭނާ އިތުރަށް ވިދާޅުވީ އިން ކަނޑައެޅި މައްސަލަ ބަޔަކު އޮޅުވާލައިގެން އުޅެނީ ސިޔާސީ މަންފާތަކެއް ހާސިލު ކުރުމަށް ކަމަށެވެ.
"ތަކުރާރުކޮށް މި ދަންނަވަނީ އިޓްލޮސްގެ މައްސަލައިގައި ކާމިޔާބު ލިބުނީ ދިވެހިރާއްޖެއަށް،" ރިފްއަތު ވިދާޅުވި އެވެ. "ދުވާލުގެ އިރު ފެންނަ ފަދައިން ސާފު ކަމެއްގައި ސިޔާސީ ބޭނުމެއްގައި [އޮޅުވާލަނީ]."
ރިފްއަތުގެ އިތުބާރު ނެތްކަމުގެ މައްސަލަ ހުށަހަޅައި ފެށި ނަމަވެސް މެމްބަރުން ނިޒާމީ ނުކުތާ ނަގައި އެޖެންޑާ ކުރިއަށް ގެންދިއުމަށް ހުރަސްއަޅާތީ އަދި ވޯޓާ ހަމައަށް ދެވޭވަރު ވަނީ ނުވެފަ އެވެ. މެމްބަރުންގެ މައިގަނޑު ޝަކުވާއަކީ ކުރިން ލިޔުމަކުން މައްސަލައަށް ޖަވާބު ދިނުމަށްފަހު މިއަދު ހާޒިރުވި މައްސަލަ އެވެ.
މިއަދު މަޖިލީހުގައި ވާހަކަ ދައްކަވަމުން ބަންޑާރަ ނައިބު ވިދާޅުވީ އިން ކަނޑައެޅި މައްސަލައިގައި އޭނާ އިސްކުރެއްވީ ދައުލަތުގެ އެންމެ މަތީ މަސްލަހަތު ކަމަށާއި ނަމަވެސް ކުރީގެ ސަރުކާރުތަކުން އެ މައްސަލައިގައި އިހުމާލުވެފައިވާ ކަމަށެވެ.
"ދެކުނުގެ އީއީޒެޑްގެ މައްސަލައިގައި ކުރީގެ އެއްވެސް ސަރުކާރަކުން އެ މައްސަލަ ހައްލުކޮށްފައިނުވާކަން ފާހަގަ ކުރަން. ނަތީޖާއަކަށްވީ މޮރިޝަސް އިން ރާއްޖެއަށް 2019 ވަނަ އަހަރު ދައުވާ ކުރުން،" ބަންޑާރަ ނައިބު ވިދާޅުވި އެވެ.
އިޓްލޮސްގެ ނިންމުން
ރާއްޖެ އާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮވެ އެވެ. ޗާގޯސްގެ ސިޔާދަތީ ބާރުގެ މައްސަލަ ޒަމާނުއްސުރެ ފެންމަތިވެފައިވާތީ، އެތަނުގެ އިން އެއްވެސް އިރެއްގައި ވަކިކޮށްފައެއް ނުވެ އެވެ.
ސަރަހައްދީ އިން ވަކިކުރުމުގައި ދެ ގައުމަށް އެއްބަސްނުވެވޭ ހާލަތުގައި، ބައިނަލްއަގުވާމީ ހަމަތަކުގައި ބުނަނީ އިން ވަކިކުރާނީ "އިކުއިޑިސްޓަންސް"އަށް ބަލައިގެންނެވެ. އިޓްލޮސްގައި ދެ ގައުމުގެ މެދުގައި މައިގަނޑު ގޮތެއްގައި ހިލާފު އުފެދިގެން އުޅެނީ އިން ވަކިކުރަން ފަށާ ހިސާބާ ގުޅޭގޮތުންނެވެ.
މޮރިޝަސްގެ ފަރާތުން ހުށަހަޅާފައިވާ ހުށަހެޅުމުގައި ބޭސް ޕޮއިންޓް ކަނޑައަޅަން ފަށާނެ ހިސާބަކީ ތިލަ ދިޔަވަރުގައި ފެންނަން އޮތް ބްލެންހެމް ރީފް އިން ފެށިގެން ކަމުގައި ވަނީ ބަޔާންކޮށްފަ އެވެ. ރާއްޖޭން ދެކޮޅު ހެދީ އެވެ. ބައިނަލްއަގުވާމީ ހަމަތަކަށް ބަލާއިރު، ތިލަ ދިޔަވަރުގައި ފެންނަން އޮންނަ ފަރަކުން ބޭސް ޕޮއިންޓު ކަނޑަނޭޅޭނެ ކަމަށް ބުނެ އެވެ.
އެ މައްސަލައިގައި އިޓްލޮސްއިން ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފަ އެވެ. އިޓްލޮސްގެ ސްޕެޝަލް ޗޭމްބަރުން އިއްވި ނިންމުމުގައި ބުނީ، ތިލަ ދިޔަވަރުގައި ފެންނަ އޮންނަ ފަރަކުން، އިން ވަކި ކުރުމަށް ޓަކައި އިކުއިޑިސްޓަންސް ރޮނގު ދެމޭނެ އެއްވެސް ހަމައެއް ނެތް ކަމަށެވެ.
އެއާއެކު، އިޓްލޮސް އިން ކުރި ހުކުމުގައި ވަނީ ދެ ގައުމުގެ މެދުގައި ފުށުއަރާ 92،563 އަކަކިލޯމީޓަރުގެ ސަރަހައްދުގެ ތެރެއިން ރާއްޖެއަށް 47،232 ކިލޯމީޓަރު އަދި މޮރިޝަސްއަށް 45،331 ކިލޯމީޓަރު ސަރަަހައްދެއް ލިބިގެންވާ ކަމަށެވެ.
އަދި އުތުރު ޗާގޯސްގެ އައުޓާ ކޮންޓިނެންޓަލް ޝެލްޕް މޮރިޝަސްއަށް ހައްގުވާ ކަމަށް ސާބިތުކޮށްދީފައިނުވާތީ، މޮރިޝަސްއިން އެދިފައިވާ ގޮތަށް، ރާއްޖެއާއި މޮރިޝަސްއާ ދެމެދުގައިވާ އައުޓާ ކޮންޓިނެންޓަލް ޝެލްފް ޑީލިމިޓުނުކުރުމަށް ވެސް ޓްރައިބިއުނަލްގެ ފަނޑިޔާރުންގެ އިއްތިފާގުން ވަނީ ނިންމައިފަ އެވެ.
