ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތް ކަމަށް ގާނޫނު ހަދާ މަޖިލީހަށް ހުށަހަޅާފައިވާ މައްސަލައިގެ ބަހުސްގެ ތެރެެއިން ވަކީލުންގެ ޓީމެއްގެ އެހީހާއެކު ދިފާއުވުމުގެ ފުރުސަތު ދޭން މަޖިލީހުގެ އިދާރާއިން ދެކޮޅު ހަދައިފި އެވެ.
ޗާގޯސްއާ ދިމާލުން ރާއްޖޭގެ އިން ކަނޑައެޅި މައްްސަލައިގައި ބަންޑާރަ ނައިބު އަމަލުކޮށްފައިވާ ގޮތުން އިތުބާރު ގެއްލިފައިވާ ކަމަށް ބުނެ އިދިކޮޅުން ހުށަހެޅި މައްސަލައިގައި ދިފާއުވުމަށް ރިފްއަތު ބޭނުންވެވަޑައިގެންނެވީ އޭޖީ އޮފީހުގެ ތިން ވަކީލުން ހިމެނޭ ޓީމެއްގެ އެހީހާއެކު އެވެ.
އެކަމަކު، މަޖިލީހުގެ އިދާރާއިން އެންގީ ރިފްއަތާއެކު މަޖިލީހަށް ހާޒިރުވެވޭނީ ދެ މީހަކަށް ކަމަށެވެ. އަދި އޭގެ ތެރެއިން ރިފްއަތަށް އެހީތެރިވެދިނުމަށް ކައިރީގައި އިނދެވޭނީ އެއް ވަކީލަށް ކަމަށާއި ދެން ހާޒިރުވި ވަކީލު އިންނަންޖެހޭނީ ދުރުގައި ކަމަށް މަޖިލީހުން ވަނީ އަންގައިފަ އެވެ.
އިތުބާރު ނެތް ކަމަށް ހުށަހަޅާފައި އޮތް މައްސަލައިގައި ދިފާއުވުމަށް މިއަދު ރިފްއަތު ވަޑައިގެން އިންނެވި ނަމަވެސް އިދިކޮޅު މެމްބަރުން ދަނީ އެޖެންޑާގައިވާ މަސައްކަތް ކުރިއަށް ގެންދިއުމަށް ހުރަސް އަޅަމުންނެވެ. އެގޮތުން, ބައެއް މެމްބަރުން ތެދުވެ ރިޔާސަތުގެ މޭޒު ކައިރިއަށް ގޮސް ހަޅޭއްލެވި އެވެ. އަދިވެސް އަސްލު މައްސަލަ ހިންގޭ ގޮތެއް ނުވެ އެވެ.
އެ މައްސަލައިގައި ރިފްއަތު އެންމެ ފުރަތަމަ މަޖިލީހަށް ޖަވާބު ދެއްވީ ލިޔުމަކުންނެވެ. އެކަމަކު، އެ ޖަލްސާ ކުރިއަށް ނުގެންގޮސް ރިޔާސަތުން މެދުކަނޑާލީ އެވެ. ގާނޫނު ހަދާ މަޖިލީހަށް ހާޒިރުވެ ދިފާއުވެވަޑައިގަތުމުގެ ފުރުސަތުގެ ބޭނުން ހިއްޕަވާނެ ކަމަށް ރިފްއަތު ވިދާޅުވީ އޭގެ ފަހުންނެވެ.
ވަޒީރުންގެ އިތުބާރު ނެތް ކަމުގެ މައްސަލައެއް ހުށަހެޅުމުން އަމަލު ކުރާނެ ގޮތުގެ އިޖުރާއަތުތައް ރައްޔިތުންގެ މަޖިލީހުގެ ގަވާއިދުގައި ސާފުކޮށް ބުނެފައެއް ނުވެ އެވެ. މަޖިލީހުން އެކި ފަހަރު އަމަލުކޮށްފައި ވަނީ އެކި ގޮތަށެވެ.
އެގޮތުން، ފޮރިން މިނިސްޓަރު ޑރ. އަހުމަދު ޝަހީދުގެ އިތުބާރު ނެތް ކަމުގެ މައްސަލައެއް 2009 ވަނަ އަހަރު މަޖިލީހަށް ވެއްދުމުން އޭނާ ދިފާއުވެވަޑައިގެންނެވުމަށް ފަސް މެމްބަރުން ހިމެނޭ ގާނޫނީ ވަކީލުންގެ ޓީމަކަށް ފުރުސަތު ދިނެވެ. އެއިރު ރައްޔިތުންގެ މަޖިލީހުގެ ރައީސަކަށް އިންނެވީ މިހާރުގެ ފޮރިން މިނިސްޓަރު އަބްދުﷲ ޝާހިދެވެ.
