ވެރިކަން ހިންގާ މާލޭ ސަރަހައްދަށް ކަރަންޓު ފޯރުކޮށްދިނުމުގައި މައްސަލައެއް ދިމާވެއްޖެ ހާލަތެއްގައި ބޭނުން ކުރުމަށް ހެދި އެމަޖެންސީ އިންޖީނުގޭގެ މަސައްކަތް ނިންމާލައިފި އެވެ.
އެ އިންޖީނުގެ ހެދީ ހުޅުމާލޭ ބާ އިންޖީނު ގޭގަ އެވެ. އެ ޕަވާޕްލާންޓަކީ 20.2 މެގަވޮޓު ކެޕޭސިޓީގެ ޕަވާޕްލާންޓެއް ކަމަށް ސްޓެލްކޯއިން ބުނެ އެވެ.
ކުއްލި ހާލަތްތަކުގައި ބޭނުން ކުރުމަށް ހާއްސަކޮށްގެން ހެދި އިންޖީނުގޭގެ ސަބަބުން މައްސަލައެއް ދިމާވި ނަމަވެސް ހުއްޓުމެއް ނެތި ކަރަންޓު ފޯރުކޮށްދެވޭނެ ކަމަށް ސްޓެލްކޯގެ މެނޭޖިން ޑައިރެކްޓަރު އަހުމަދު ޝަރީފް ވިދާޅުވި އެވެ.
"މިހާރު ހުރި ތިން ޕަވަޕްލާންޓުގެ ކެޕޭސިޓީއަށްވުރެ އިތުރަށް ކަރަންޓު ބޭނުންވާ ނަމަ ނުވަތަ އެމެޖެންސީއެއް ދިމާވެއްޖެ ނަމަ އަޅުގަނޑުމެން މި ޕަވަޕްލާންޓުގެ ބޭނުން ހިފާނީ. އެމެޖެންސީއޭ މި ދެންނެވީ އިންޖީނެއް ހުއްޓި، މެއިންޓެނަންސަށް ނަގާ އިންޖީނުތަކަށް ފޫބެއްދުމަށް ވެސް އަޅުގަނޑުމެން މި ޕަވާޕްލާންޓުގެ ބޭނުން ހިފާނެ،" ޝަރީފް ވިދާޅުވި އެވެ.
ހުޅުމާލޭގައި ގާއިމްކުރި އެމެޖެންސީ ޕަވާޕްލާންޓުގެ މަސައްްކަތް ނިންމާލީ އެއް މަސް ދުވަހުން ކަމަށް އެކުންފުނިން ބުނެ އެވެ.
"މިތާ އެތެރޭގައި ހުންނާނީ 10 އިންޖީނު. އޭގެ އިތުރަށް ކޮންޓޭނަރައިޒްޑް ހަތަރު އިންޖީނު އެބަހުރި. އަދި އަލަށް ގެނެސްފަ ހުރި ތިން އިންޖީނު އިންސްޓޯލްކުރުމުގެ މަސައްްކަތް ކުރަމުން ދަނީ،" ޝަރީފް ވިދާޅުވި އެވެ.
ކަރަންޓު ބޭނުންކުރާ މިންވަރު އިތުރުވަނީ އާންމުކޮށް ހޫނު ދުވަސްދުވަހު ކަމަށް ސްޓެލްކޯއިން ބުނެ އެވެ. ހޫނު ދުވަހަކު މާލެ ސަރަހައްދުގައި 90 މެގަވޮޓާާ ހަމައަށް ކަރަންޓު ބޭނުންކުރާ ކަމަށާއި ވިއްސާރަ ދުވަހެއް ވިޔަސް ކަރަންޓު ބޭނުން ކުރާ މިންވަރު 65 މެގަވޮޓަށްވުރެ ދަށް ނުވާ ކަމަށް ސްޓެލްކޯއިން ބުނެ އެވެ.
