ކުރިއަށް އޮތް ރިޔާސީ އިންތިހާބު ގާތްވަމުން އަންނަ އިރު ޕީޕީއެމް/ޕީއެންސީގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީން މިިނިވަންވާނެ ކަމަށް ދެކިގެން ތިބޭތީ ހިތްހަމަނުޖެހުން ފާޅުކުރި ބައެއް ސެނެޓަރުންގެ މައްސަލަ ބަލަމުންދާ ކަމަށް ދެކެވޭ ވާހަކަތައް ލީޑާޝިޕުން ދޮގުކޮށްފި އެވެ.
ސެޕްޓެމްބަރު 9، ގައި އޮންނަ އިންތިހާބަށް ބާކީ 98 ދުވަސް އޮތް އިރު ޔާމީން ހުންނެވީ 11 އަހަރުގެ ޖަލު ހުކުމެއް ތަންފީޒުކުރައްވަން މާފުށީ ޖަލުގަ އެވެ. ޖަލު ހުކުމް ހައި ކޯޓުގައި އިސްތިއުނާފުކޮށްފައިވީ ނަމަވެސް މައްސަލަ ނުފަށަ އެވެ. އަދި, ކްރިމިނަލް ކޯޓުގައި އިތުރު ދައުވާތަކެއްގެ މައްސަލަ ދަނީ ބަލަމުންނެވެ.
ރައީސް ޔާމީން މިނިވަންވާނެ ކަމަށް ދެކިގެން ލީޑާޝިޕް ހިމޭންކޮށް އޮތް ކަމަށް ބުނެ ޕީޕީއެމްގެ އެތެރޭގެ ސޯޝަލް މީޑިއާ ބައެއް ގްރޫޕްތަކުގައި ޖޮއިންޓު ސެނެޓުގެ ބައެއް މެންބަރުން ނުރުހުން ފާޅުކޮށް ހިޔާލުފާޅުކޮށްފައިވެ އެވެ.
އެތެރޭގެ ހިޔާލު ކަފިވުން ބޮޑުވެފައިވަނިކޮށް ސެނެޓުގެ ހަ މެންބަރަކާއި ލީޑާޝިޕްގެ ތިން ބޭފުޅަކު ވަނީ ބައްދަލުކުރައްވައިފަ އެވެ. އެއީ ޖޮއިންޓު ކޯލިޝަންގެ އެކްޓިން ލީޑަރު އަބްދުލްރަހީމް އަބްދުﷲގެ އިތުރުން، ޕީޕީއެމްގެ ނައިބު ރައީސް އަހުމަދު ޝިޔާމާއި، ޕީއެންސީގެ ނައިބު ރައީސް އާދަމް ޝަރީފް އެވެ.
އެ ބައްދަލުވުންތަކާ ގުޅުވައި ހަ މެންބަރުންގެ ސުލޫކީ މައްސަލައެއް ބަލަން ފެށި ކަމަށް ބައެއް މީޑިއާތަކުން ރިޕޯޓްކުރި ނަމަވެސް އެއްވެސް ސެނެޓަރެއްގެ މައްސަލަ ނުބަލާ ކަމަށާއި ފިޔަވަޅު ނާޅާ ކަމަށް، އެ ބައްދަލުވުންތަކުގައި ބައިވެރިވެވަޑައިގެންނެވި ލީޑާޝިޕްގެ ބޭފުޅުން "އަދަދު" ނޫހަށް ވިދާޅުވި އެވެ.
ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ، ރައީސް ޔާމީންގެ މައްޗަށް ހިންގަމުންދާ ޝަރީއަތްތަކާ ގުޅިގެން ސައްހަ ނޫން މައުލޫމާތުތަކެއް ވެސް ސަޕޯޓަރުންގެ މެދުގައި ފެތުރޭތީ، ސެނެޓަރުންގެ ތެރެއިން ވެސް ބައެއް ބޭފުޅުންގެ ކަންބޮޑުވުންތަކެއް އޮތް ކަމަށެވެ.
"ނޫން، ނޫން، މައްސަލައެއް ބެލީކީ ނޫން، ފިޔަވަޅެއް އަޅާކަށް އުޅޫނީކީ ވެސް ނޫން، ރައީސްގެ ކޭސްތަކުގެ ބައެއް ޓެކްނިކަލް ކަންކަމާ ގުޅޭ ގޮތުން އޮޅުން ނުފިލާ ހުރި ކަންކަން ހުރުމުން، އޭގެ މައުލުމާތު އަޅުގަނޑުމެން އެ ސެނެޓަރުންނަށް އެރުވީ، ކަންކަން އޮތް ގޮތް ސާފުކޮށްދިނީ،" ޝިޔާމް ވިދާޅުވި އެވެ.
އާދަމް ޝަރީފް ވިދާޅުވީ އެ ބައްދަލުވުމަކީ ސެނެޓަރުންގެ މެދުގައި ތަފާތު ހިޔާލުތައް ހުރުމުން، ސެނެޓަރުންގެ ކަންބޮޑުވުންތައް އަޑުއަހަން ލީޑާޝިޕުން ބޭނުން ވެގެން ބޭއްވި ބައްދަލުވުމެއް ކަމަށެވެ.
"ސެނެޓަރުންގެ މެދުގައި ހިޔާލުތަފާތުވުން އޮންނައިރުން ލީޑާޝިޕުން މަސައްކަތް ކުރާނެ ހިޔާލުތައް އެއް ގޮތް ކުރަން، ކަންބޮޑުވުންތައް އަޑުއަހަން، މަޝްވަރާކުރަން، އެ ކަން ކޮށްފައި ތަސައްލީއެއް ހޯދަން، ލިޑާޝިޕަށް ވެސް، ސެނެޓަށް ވެސް، އާންމު މެންބަރުންނަށް ވެސް،" އާދަމް ޝަރީފް ވިދާޅުވި އެވެ.
އާދަމް ޝަރީފް ވިދާޅުވީ ވާހަކަ ދެކެވުނު ކޮންމެ މީހަކީ ވެސް ޔާމީންގެ ވަފާތެރި ސަޕޯޓަރުން ކަމަށެވެ. އެއިން ކޮންމެ މީހަކު ވެސް ބޭނުންވަނީ ރިޔާސީ އިންތިހާބުގައި ޕީޕީއެމްގެ ކެންޑިޑޭޓެއް ހުރުން ޔަގީންކުރަން ކަމަށާއި، ހާއްސަކޮށް އެ ކެންޑިޑޭޓަކީ ޔާމީނަށް ވުން ކަމަށް އާދަމް ޝަރީފް ވިދާޅުވި އެވެ.
ޔާމީނަށް ކުރިމަތިވެފައިވާ ގާނޫނީ ހުރަސް
ޔާމީނަށް 11 އަހަރުގެ ޖަލު ހުކުމެއް އިއްވީ، އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ މައްސަލާގައި ހިމެނޭ ވ. އާރަށް ކުއްޔަށް ދިނުމުގައި ރިޝްވަތު ނަންގަވައި ފައިސާ ލޯންޑަކުރެއްވި ކަމުގެ ތުހުމަތުގައި އުފުލާފައިވާ ދައުވާތައް ސާބިތުވެއްޖެ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ.
އެ ހައި ކޯޓުގައި އިސްތިއުނާފުކޮށްފައިވީ ނަމަވެސް އަދި މައްސަލައިގެ މިހާތަނަށް އެންމެ އަޑުއެހުމެއް ވެސް ބޭއްވޭ ގޮތެއް ނުވެ އެވެ. އަދި ރ. ފުއްގިރި ކުއްޔަށް ދިނުމުގައި ހިޔާނާތް ހިންގި ކަމަށް ބުނާ މައްސަލާގައި ޔާމީންގެ މައްޗަށް އުފުލާފައިވާ ދައުވާތަކުގެ އަޑުއެހުން ކައިރިކައިރި ގެންދިޔައީ ބާއްވަމުންނެވެ. އެއާއެކު، ޔާމީނަށް އިންތިހާބުގައި ވާދަނުކުރެވިދާނެ ކަމުގެ ކަންބޮޑުވުން ސަޕޯޓަރުންގެ މެދުގައި އެބަ އޮތެވެ.
ޖަލު ހުކުމް ދެމިއޮތްހާ ހިނދަކު ރިޔާސީ އިންތިހާބުގައި ވާދަކުރުމުގެ ފުރުސަތު ޔާމީނަކަށް ނެތެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
ޔާމީނަށް އިންތިހާބުގައި ވާދަނުކުރެވޭ ހާލަތުގައި، ދެން އަމަލުކުރާނެ ގޮތުގެ ވާހަކަ ދައްކަން ޕީޕީއެމް/ޕީއެންސީ ލިޑާޝިޕުން ބޭނުމެއް ނުވެ އެވެ.
