އީ-ސިނގިރެޓާ މެދު އޮންނަ ރަނގަޅު ނޫން ގަބޫލުކުރުން ދޮގުކޮށް، ހެލްތު ޕްރޮޓެކްޝަން އެޖެންސީ (އެޗްޕީއޭ) އެެކަމުގެ ނުރައްކާތެރިކަން ހަނދާންކޮށްދީފި އެވެ.
ބައިނަލްއަގުވާމީ ގޮތުން ފާހަގަކުރާ ދުންފަތުގެ އިސްތިއުމާލުނުކުރާ ދުވަހާ ގުޅުގައި، އާއްމުކުރި ތަފާސްހިސާބުތަކާ އެކު އެޗްޕީއޭއިން ބުނި ގޮތުގައި ދުންފަތުގައި ވެސް އެކުލެވޭ އެންމެ ގެއްލުން ބޮޑު އެއް މާއްދާ ކަމަށްވާ ނިކޮޓިން، އީ-ސިނގިރެޓްތަކުން ވެސް ލިބެ އެވެ. އެއާ އެކު އެތައް ކެމިކަލްތަކެއް ހަމަ އެ ބާވަތުގައި ވެސް އެކުލެވޭކަމަށް އެ އެޖެންސީން ބުންޏެވެ.
"އީ-ސިނގިރެޓަކީ ދުންފަތުގެ ބަދަލުގައި ބޭނުންކުރެވޭނެ ރައްކާތެރި އެއްޗެއް ނޫން،" ތަފާސްހިސާބުތައް އާއްމު ކުރަން އެޗްޕީއޭއިން ސޯޝަލް މީޑިއާއަށް ދޫކޮށްލި ލިއުންކޮޅުގައި ބުންޏެވެ.
އެއާ އެކު އާއްްމުކުރި ތަފާސްހިސާބްތަކުގައިވާ ގޮތުން ރާއްޖޭގައި އުމުރުން 13 އަހަރާ 15 އަހަރާ ދޭތެރޭގެ އުމުރުގެ ފިރިހެން ކުދިންގެ ތެރެއިން ގާތްގަނޑަކަށް ކޮންމެ ހަތަރު ކުއްޖަކުން އެއް ކުއްޖަކު އީ-ސިނގިރެޓް ބޭނުންކުރެ އެވެ. ދެޖިންސްގެ ކުދިން އެކުގައި ބަލާ ނަމަ އެ އުމުރުގެ ކުދިންގެ 17.1 ޕަސެންޓްގެ ކުދިން އެ ބާވަތް ބޭނުންކުރެ އެވެ.
ރާއްޖޭގައި ދުންފަތުގެ އިސްތިއުމާލުކުރުމުގެ ނުބައި އާދަ އޮތް މިންވަރު އެޗްޕީއޭއިން އާއްމުކުރި ހިސާބުތަކުން ފެނެ އެވެ. އެ ހިސާބުތަކުގައިވާ ގޮތުން ރާއްޖޭގެ އެ އުމުރުގެ ކުދިންގެ 45 ޕަސެންޓަށް ވުރެ ގިނަ ކުދިން ދުންފަތުގެ އިސްތިއުމާލުކުރެ އެވެ. އޭގެ ތެރެއިން 48 ޕަސެންޓަކީ ފިރިހެން ކުދިންނެވެ. އަދި, އެ އުމުރުގެ އަންހެން ކުދިންގެ ތެރެއިން 43 އަށް ވުރެ ގިނަ ކުދިންގެ އެ ނުބައި އާދަ އެބަ އޮތެވެ.
