މާލެއިން ފުރައިގެން ރ. ރަސްގެތީމަށް ދަތުރުކުރި ދޯންޏެއްގެ އިންޖީނު ރޫމްގައި އަލިފާން ރޯވެ، ކޮންޓްރޯލް ނުވެގެން އުޅަނދު އަނދައި ހުލިވެއްޖެ އެވެ.
އެ ދޯނިން ދަތުރު ކުރި 10 މީހުން ވަނީ ފޯސީޒަންސް ރިސޯޓުގެ ލޯންޗަކަށް ނަގައިފަ އެވެ. ދަތުރު ކުރި މީހަކަށް އަނިޔާވިކަން މިހާތަނަށް އެނގިފައެއް ނުވެ އެވެ. އަލިފާން ރޯވީ "ހޮރައިޒިޔާ 2" ކިޔާ ބޯޓެއްގަ އެވެ.
އެ ދޯނީގައި އަލިފާން ރޯވެފައި ވަނީ ފޯ ސީޒަން ރިސޯޓުގެ އުތުރުން 3.04 ނޯޓިކަލް މޭލުން ކަމަށާއި އެކަމުގެ ރިޕޯޓު ލިބިފައި ވަނީ މިރޭ 7:16 ހާއިރު ކަމަށް އެ އެމްއެންޑީއެފުން ބުނެ އެވެ.
އަލިފާން ރޯވި ދޯނީގެ ވީޑިއޯއެއް ވަނީ ސޯޝަލް މީޑިއާގައި އާންމުވެފަ އެވެ. އެ ވީޑިއޯއިން ފެންނަ ގޮތުގައި މުޅި ދޯނީގައި އަލިފާން ހިފައި ދަނީ ވަރަށް ގަދައަށް އަނދަމުންނެވެ. ދޯނީގައި އަލިފާން ރޯވާން މެދުވެރިވި ސަބަބެއް ވެސް އަދި އެއީ ކޮންބައެއްގެ ދޯންޏެއްކަން ވެސް މިހާތަނަށް އަދި ކަށަވަރުވެފަ އެއް ނުވެ އެވެ.
ކޯސްޓްގާޑް މެރިޓައިން ރެސްކިއު ކޯޑިނޭޝަން ސެންޓަރ (އެމްއާރުސީސީ) އިން ހަރަކާތްތެރިވާން ފަށައިފި. މި ބޯޓްގައި އަލިފާން ރޯވެފައި ވަނީ ބ.އަތޮޅު ފޯ ސީޒަން ރިސޯޓް (ލަނޑާ ގިރާވަރު) އުތުރުން 3.04 ނޯޓިކަލް މޭލު ބޭރުން. މިހާދިސާގެ ރިޕޯޓް ލިބިފައި ވަނީ މިރޭ 7:15 ހާއިރެވެ.
އެ ބޯޓުގައި ތިބި ހުރިހާ އެންމެން ސަލާމަތް ކޮށްފައިވީ ނަމަވެސް އެ ސަރަހައްދަށް ދިއުމަށްޓަކައި ބ. އޭދަފުށީ ސީއެމްބިއުލާންސާއި ޅ. މާފިލާފުށިން އެމްއެންޑީއެފުގެ ކޯސްޓްގާޑު ހާބާ ކްރާފްޓު ލޯންޗު ދަނީ ދަތުރުކުރަމުން ކަމަށް އެމްއެންޑީއެފުން ބުނެ އެވެ.
