ދެކުނު އިރުމަތީ އޭޝިއާގައި ދައުރުވަމުންދާ، ކުޑަކުދިންނަށް ދޭ ޕެރަސެޓްމޯލް ސިރަޕަކާއި ކެއްސުމަށާއި ރޯގާއަށް ދޭ ބޭސްތަކެއްގައި ނުރައްކާތެެރި ސިއްހަތަށް ވަރަށް ނުރައްކާތެރި ދެ ކެމިކަލެއް އެކުލެވޭތީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ، އިން އެލާޓެއް ނެރުމުން، ރާއްޖޭން ވެސް ފިޔަވަޅު އަޅައިފި އެވެ.
ޕެރެސެޓަމޯލް އާއި ކެއްސުމާއި ރޯގާއަށް ބޭނުން ކުރާ ބައެއް ވައްތަރުގެ ދިޔާ ބޭހުގައި ނުރައްކާތެރި މާއްދާތަކެއް ހިމެނޭތީ, ދުނިޔޭގެ ބައެއް ގައުމުތަކުގައި ވަނީ ކުޑަކުދިންތަކެއް މަރުވެފަ އެވެ. އެ ދެ މާއްދާއަކީ, "ޑައިއެތިލީން ގްލައިކޯލް" އަދި "އެތިލީން ގްލައިކޯލް" އެވެ.
"ޑައިއެތިލީން ގްލައިކޯލް" އަދި "އެތިލީން ގްލައިކޯލް" އަކީ އިންސާނުންނަށް ވިހަ ދެ މާއްދާ އެވެ. ހަށިގަނޑަށް އެތެރެވެއްޖެ ނަމަ މަރުވުމުގެ ފުރުސަތު ބޮޑެވެ.
މި ދެ މާއްދާ ހިމެނޭ ބޭސް ބޭނުން ކުރެވިގެން ކުޑަކުދިންތަކެއް މަރުވި ހާދިސާއަށް ފަހު ދުނިޔޭގެ ސިއްހަތު ޖަމްއިއްޔާއިން ވަނީ މި މާއްދާތައް ހިިމެނޭ ބޭހުގެ ބެޗުތައް ފާހަގަކޮށް, އެ ބޭނުން ނުކުރުމަށް އެލާޓް ނެރެމުންނެވެ. އެ އެލާޓްތައް ރާއްޖޭގެ ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވެސް ވަނީ މީގެ ކުރިން އެތައް ފަހަރަކު ނެރެފަ އެވެ.
ރާއްޖެއަށް އެތެރެކުރާ ބޭހުގައި "ޑައިއެތިލީން ގްލައިކޯލް" އަދި "އެތިލީން ގްލައިކޯލް" ނެތްކަން ކަށަވަރު ކުރުމަށްޓަކައި, ރާއްޖެ އެތެރެކުރާ ބޭހާއެކު އޭގައި ޑަބްލިއުއެޗްއޯގެ ޕްރީކޮލިފައިޑް ލެބޯޓްރީއަކުން މި ދެ މާއްދާ ނެތްކަން ކަށަވަރުކޮށް ހަދާފައިވާ ތަހުލީލު ރިޕޯޓު ހުށަހަޅަން ޖެހޭ ގޮތަށް އެމްއެފްޑީއޭއިން ވަނީ ހަދައިފަ އެވެ.
މި ފިޔަވަޅު އަޅަން ނިންމާ އިއުލާން ކުރި ނަމަވެސް, ބޭސް އެތެރެކުރާއިރު ތަހުލީލު ރިޕޯޓު ހުށަހަޅަން ޖެހެނީ އަންނަ ޖުލައި މަހުން ފެށިގެންނެވެ.
"ޑައިއެތިލީން ގްލައިކޯލް" އަދި "އެތިލީން ގްލައިކޯލް" ހިމެނޭ ބޭސް ބޮއެގެން ކުޑަކުދިންތަކެއް ވިހަވިއިރު, އެލާޓް ނެރުނު އެއްވެސް ބޭހަކީ ރާއްޖެ އެތެރެކޮށް ވިއްކާ ބޭސްތަކެއް ނޫނެވެ.
ނުރައްކާތައް
ޑަބްލިއުއެޗްއޯގެ އެލާޓްގައިވާ ގޮތުން އެ ކެމިކަލްތަކަކީ ބޭނުންކުރަން އެއްގޮތަކަށް ވެސް ރައްކާތެރި ނޫން އަދި ކުޑަކުދިންނަށް އޭގެ ނުރައްކާ މާ ބޮޑު ބާވަތްތަކެކެވެ. އެއީ ބޮޑެތި ގެއްލުންތައް ލިބި ފުރާނައަށް ނުރައްކާވެދާނެ ބާވަތްތައް ކަމަށް ވެސް އެ އެލާޓްގައި ބުންޏެވެ.
އެ ބާވަތްތައް ބޭނުން ކުރެވިއްޖެ ނަމަ ވެދާނެ ގޮތްތަކުގެ ތެރޭގައި ބަނޑުގައި ރިއްސުމާއި ބޭރަށް ހިންގުން އަދި ކުޑަކަމުދާން އުނދަގޫވުން ހިމެނެ އެވެ. ބޮލުގައި ރިއްސުމާއި ހެޔަށް ގޮތްވުމާއި ކިޑްނީ ހަލާކުވުމަކީ ވެސް އެ ބާވަތްތަކުން ލިބިދާނެ ގެއްލުންތަކެވެ.
