ސެޕްޓެމްބަރު މަހު ބާއްވާ ރިޔާސީ އިންތިހާބު އޮބްޒާވްކުރަން އިލެކްޝަންސް ކޮމިޝަން (އީސީ) އިން ދައުވަތުދިން ގައުމުތަކާމެދު އިދިކޮޅު ޕީޕީއެމް ކޯލިޝަނުން ކަންބޮޑުވުން ފާޅުކޮށްފި އެވެ.
ޕީޕީއެމް އިން ރޭ ނެރުނު ބަޔާނެއްގައި ވަނީ އީސީން ދައުވަތުދީފައިވާ ފަރާތްތައް ދައުވަތުދިނުމުގައި ބެލި މިންގަނޑުތަކާއި ސިޔާސަތުތައް ހާމަކުރުމަށް ގޮވާލާފަ އެވެ. އީސީން ވަނީ މި މަހުގެ 27 ގައި ވަނީ ބޭރުގެ 15 ގައުމެއްގެ އިންތިހާބީ އިދާރާތަކަށް ދައުވަތު ދީފަ އެވެ.
އިދިކޮޅުން ވަނީ މި ވެރިކަމުގައި ބޭއްވި އިންތިހާބުތަކުގައި ދައުލަތުގެ ވަސީލަތްތަކާއި ބާރުތައް ނަހަމަގޮތުގައި ބޭނުންކޮށްފައިވާކަން ފާހަގަކޮށްފަ އެވެ. ހާއްސަކޮށް ދައުލަތުގެ މުއައްސަސާތަކާއި ސަރުކާރު ހިއްސާވާ ކުންފުނިތައް ބޭނުންކޮށްގެން، ވޭތުވެދިޔަ ފަސް އަހަރުގެ ތެރޭގައި ބޭއްވުނު ބައި އިލެކްޝަންތަކުގައި ސަރުކާރުން ނަހަމަ ފައިދާތައް ނަގާފައިވާކަން ޕީޕީއެމުން ވަނީ ފާހަގަކޮށްފަ އެވެ.
އޭގެ އިތުރުން، ރާއްޖޭއާ އެކު ގާތް ގުޅުން އޮންނަ، މިފަދަ ކަންކަމުގައި ދިވެހި ދައުލަތާއެކު އެކި މަޝްވަރާތައް ކޮށްފައިވާ ގައުމުތަކުގެ އިންތިހާބީ އިދާރާތަކަށް ރިޔާސީ އިންތިހާބު އޮބްޒާވްކުރުމުގެ ފުރުސަތު ދީފައިނުވާކަން އެ ބަޔާނުގައި ވަނީ ފާހަގަކޮށްފަ އެވެ.
ވަކި ގައުމެއްގެ ނަން ހިމަނާފައި ނުވި ނަމަވެސް، އީސީން ހާމަކުރި 15 ގައުމުގެ ލިސްޓުގައި، އިދިކޮޅާ އެންމެ ގާތް ގުޅުމެއް އޮންނަ ޗައިނާގެ ނަން ނެތްކަން ފާހަގަވެ އެވެ. އެކަމަކު، މި ސަރުކާރާ އެންމެ ގާތް ހާރިޖީ ގުޅުމެއް އޮންނަ އިންޑިއާ ވެސް އެ ލިސްޓުގައި ހިމަނާފައެއް ނުވެ އެވެ.
އިދިކޮޅުގެ ބަޔާނުގައި ވަނީ މިހާރު ދައުވަތުދީފައިވާ 15 ގައުމުގެ އިދާރާތަކުން، ސެޕްޓެމްބަރު މަހުގެ އިންތިހާބަކީ އިންސާފުވެރި އަދި އޮމާން އިންތިހާބެއްގެ ގޮތުގައި ބަލައިގަތުމުގައި އިންސާފުވެރިވާނެ ކަމާމެދު ވެސް ސުވާލު އުފައްދާފަ އެވެ. އަދި، މިފަދަ ބޮޑު އިންތިހާބެއްގައި މިހާރު އޮތް ލިސްޓު ފުޅާކޮށް އިތުރު ގައުމުތަކުގެ އިދާރާތަކަށް ފުރުސަތު ދިނުމަށް ވެސް ޕީޕީއެމުން ވަނީ ގޮވާލާފަ އެވެ.
