އަންނަ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ނެރޭ ކެންޑިޑޭޓު, އެ ޕާޓީގެ ލީޑަރު ގާސިމް އިބްރާހިމްއަށް ރިޔާސީ ޓިކެޓު ހަވާލުކުރުމުގެ ޖަލްސާ އަންނަ މަހު ނުވަ ވަނަ ދުވަހު ބާއްވަން ހަމަޖެހިއްޖެ އެވެ.
ޓިކެޓު ހަވާލު ކުރުމުގެ ޖަލްސާ ބާއްވަން ހަމަޖެހިފައިވަނީ އެރޭ ކާނިވަލް ސަރަހައްދުގައި ކަމަށް ޖޭޕީން ބުނެ އެވެ. ޖޭޕީން ބުނީ މި ޖަލްސާ ބާއްވާނީ މާލެ ސަރަހަައްދުގައި ތިބި ސަޕޯޓަރުންނާއެކު ކަމަށެވެ.
ޖޭޕީގެ ފަރާތުން ރިޔާސީ އިންތިހާބަށް ނިކުންނަ އެ ޕާޓީގެ ލީޑަރު ގާސިމް އިބްރާހިމްގެ ކެމްޕޭނުގެ ހުރިހާ ކަމެއް ކުރިއަށް ގެންދިއުމަށްޓަކައި އޭނާގެ ސްޕެޝަލް އެންވޯއީ އިލްހާމް އަހުމަދާއި ޖޭޕީގެ ޑެޕިއުޓީ ލީޑަރު އަމީން އިބްރާހިމް ވަނީ ހަމަޖައްސާފަ އެވެ.
ޕާޓީގެ ރިޔާސީ ޓިކެޓު ހަވާލު ކުރުމާއި ކެމްޕެއިން ލޯންޗިން އިވެންޓާ ގުޅޭ ހުރިހާ ކަމެއް ޕާޓީގެ ސެކްރެޓޭރިއަޓް ގުޅިގެން ކުރިއަށް ގެންދާނީ ވެސް އަމީނާއި އިލްހާމެވެ.
ކެމްޕޭން މެނޭޖަރުންގެ ގޮތުގައި ހަމަޖެއްސި އަމީނާއި އިލްހަމަށް ވަނީ ރާއްޖޭގެ އަތޮޅުތައް ދެބައިކޮށް ހަވާލުކޮށްފަ އެވެ.
އެގޮތުން, ދެކުނުގެ ކެމްޕެއިން މެނޭޖަރަކަށް ހަމަޖައްސާފައި ވަނީ އިލްހާމެވެ. އިލްހާމްއާ ހަވާލުކުރި އަތޮޅުތަކަކީ ވ. އަތޮޅާއި, މ. އަތޮޅާއި, ފ. އަތޮޅާއި, ދ. އަތޮޅާއި, ތ. އަތޮޅާއި, ލ. އަތޮޅާއި, ގއ. އަތޮޅާއި, ގދ. އަތޮޅާއި, އައްޑޫ ސިޓީ އެވެ. އަދި, މާލޭގެ ދެބައިކުޅަ އެއްބައި އިލްހާމްއާ ވަނީ ހަވާލުކޮށްފަ އެވެ.
އުތުރުގެ ކެމްޕެއިން މެނޭޖަރަކަށް ހަމަޖައްސާފައި ވާ އަމީންއާ ހަވާލުކުރި އަތޮޅުތަކަކީ ހއ. އަތޮޅާއި, ހދ. އަތޮޅާއި, ށ. އަތޮޅާއި, ނ. އަތޮޅާއި, ރ. އަތޮޅާއި, ބ. އަތޮޅާއި, ޅ. އަތޮޅާއި, ކ. އަތޮޅާއި, އއ. އަތޮޅާއި, އދ. އަތޮޅާއި މާލޭގެ ދެ ބައިކުޅަ އެއްބައެވެ.
ގާސިމްގެ ރިޔާސީ ދަތުރު
މި އަހަރުގެ ރިޔާސީ އިންތިހާބުގައި އެމްޑީޕީގެ ރައީސް އިބްރާހިމް މުހައްމަދު ސޯލިހު އެކުގައި ކުރިއަށް ދިއުމަށް އެދިވަޑައިގެންފައި ވަނިކޮށް ޖޭޕީން ވަކިން ވާދަކުރަން ނިންމީ މާޗު 14 ގަ އެވެ. އެގޮތަށް އެ ޕާޓީއިން ނިންމީ ރައީސް, ގާސިމްއާ ބައްދަލު ކުރައްވާފައި ވަނިކޮށެވެ.
އެއާކު ސަރުކާރުގެ އިސް މަގާމުތަކުގައި ތިބި ބައެއް ބޭފުޅުން ވަނީ ޕާޓީއާ ދުރަށް ޖެހުމަށް ނިންމާ ގާސިމަށް ތާއިދުނުކުރާކަން ހާމަކޮށްފަ އެވެ.
އެގޮތުން, އެންމެ ފުރަތަމަ ޕާޓީއާ ދުރަށް ޖެހި އިސްތިއުފާދެއްވީ ރައީސް އޮފީހުގެ މިނިސްޓަރު އަހުމަދު ސަމީރެވެ. އޭނާ ވިދާޅުވީ ގާސިމަށް ރިޔާސީ އިންތިހާބު ކާމިޔާބުވާތަން ނުފެންނަ ކަމަށެވެ. އެއަށްފަހު އިމިގްރޭޝަން ކޮންޓްރޯލާ މުހައްމަދު އަހްމަދު (ހަނަފީ) އާއި އިސްދޫ ދާއިރާގެ މެމްބަރު އަލީ ހަމީދު ވެސް ވަނީ ޕާޓީ ދޫކުރެއްވި އެވެ. އޭގެއިތުރުންވެސް, ޖޭޕީގެ ތެރޭގައި ތިއްބެވި ރައީސް ސޯލިހަށް ތާއީދުކުރައްވާ ގިނަ ބޭފުޅުން ވަނީ ޕާޓީއާ ދުރަށް ޖެހިފަ އެވެ.
ނަމަވެސް، ޖެޕީން ވަނީ ރިޔާސީ ކެންޑިޑޭޓެއް ކަނޑައެޅުމަށް ޕްރައިމަރީއަށް ހުޅުވާލާ ރިޔާސީ އިންތިހާބުގެ ތައްޔާރީތައް ކުރިއަށް ގެންގޮސްފަ އެވެ. ރިޔާސީ ޓިކެޓު ގާސިމަށް ލިބުނީ ޕްރައިމަރީގައި ގާސިމްއާ ވާދަކުރާނެ އިތުރު ފަރާތެއް ނެތުމުންނެވެ.
ޖޭޕީން ރިޔާސީ ރޭހަށް ވަކިން ވާދަކުރުމަށް ނިންމުމާ އެކު ރައީސް ސޯލިހު ވެސް ވަނީ ވަރުގަދަ ރައްދުތަކެއް ދެއްވާފަ އެވެ. އެމަނިކުފާނު މާޗު 21 ގައި ވިދާޅުވީ މިހާރު ވެރިކަންކުރާ ކޯލިޝަނުގައި ހިމެނޭ ޕާޓީތަކުން ކުރިއަށް އޮތް ރިޔާސީ އިންތިހާބާ ހަމައަށް އެކުގައި ސަރުކާރާ އެކު ނުތިބެވޭނަމަ ކޯލިޝަން އެއްބަސްވުން ނިމުމަކަށް ގެންނަން ޖެހޭ ކަމަށެވެ.
