ސައުދީ އަރަބިއްޔާގެ ސަރުކާރުން ދިވެހި ދަރިވަރުންނަށް 350 އަށްވުރެ ގިނަ ސްކޮލަޝިޕްގެ ފުރުސަތު ދިނުމަށް ނިންމާފައިވާ ކަމަށް ރާއްޖޭގައި ހުންނަ އެ ގައުމުގެ އެމްބަސީން ބުނެފި އެވެ.
ސައުދީ އެމްބަސީން ބުނީ ދިވެހިން ދަރިވަރުންނަށް ހާއްސަކޮށް ދޭ ސްކޮލާޝިޕްތަކަކީ އެ ގައުމުގެ ސަރުކާރުން ފުލްކޮށް ފަންޑުކުރާ ސްކޮލާޝިޕްތަކެއް ކަމަށެވެ. ސްކޮލާޝިޕް ބޭނުންވާ ދަރިވަރުންނަށް އެ ދަރިވަރަކު ބޭނުންވާ ޔުނިވަސިޓީއެއްގައި ކިޔެވުމުގެ ފުރުސަތު ލިބޭނެ އެވެ.
ސްކޮލާޝިޕްތަކަށް އެދުމަށް ސައުދީ ސަރުކާރުން އިފްތިތާހުކޮށްފައިވާ ހާއްސަ ވެބްސައިޓު ބޭނުންކުރެވޭނެ ކަމަށްވެސް ސައުދީ އެމްބަސީން ބުނެ އެވެ.
އޭގެއިތުރުން, ސައުދީ އެމްބަސީން ވަނީ ބައިނަލްއަގުވާމީ މަތީ ތައުލީމު އެނަލައިޒް ކުރާ ކުންފުންޏެއް ކަމަށްވާ 'ކިއު އެސް' އިން ތައްޔާރުކުރި މި އަހަރަށް ލިސްޓުކުރި ދުނިޔޭގެ އެންމެ ރަނގަޅު 100 ޔުނިވަސިޓީގެ އެ ގައުމުގާ ހިންގާ 27 ޔުނިވަސިޓީއެއް ހިމެނިފައިވާކަން ފާހަގަކޮށްފަ އެވެ. މިއީ ދުނިޔޭގެ 93 ސަރަހައްދެއްގައި ހިންގޭ 15،700 ޔުނިވަސިޓީއެއް އެނަލައިޒް ކުރުމަށްފަހު ހެދިފައިވާ ލިސްޓެކެވެ.
އެގޮތުން، އެ ގައުމުގެ ކިންގް އަބްދުލްއަޒީޒް ޔުނިވާސިޓީ، ކިންގް އަބްދުﷲ ޔުނިވާސިޓީ އޮފް ސައިންސް އެން ޓެކްނޮލޮޖީ، އިމާމް އަބްދުލްރަހްމާން ބިން ފައިސަލް ޔުނިވާސިޓީ، އަދި ކިންގް ފަހުދު ޔުނިވާސިޓީ އޮފް ޕެޓްރޯލިއަމް އެންޑް މިނަރެލްސް އިން އެކި ދާއިރާތަކުން ބައިނަލްއަގުވާމީ ތައުލީމީ ދާއިރާގައި ހޯދަމުންދާ ކުރިއެރުންތައް އެ ގައުމުން ވަނީ ފާހަގަކޮށްފަ އެވެ.
ސައުދީ އެމްބަސީން ބުނި ގޮތުގައި މި ޔުނިވާސިޓީތަކުން ދަނީ ފާމަސީ، ފާމަކޮލަޖީ، ޑެންޓިސްޓްރީ، މިނެރަލް އެންޑް މައިނިން އިންޖިނޭރިން، ޕެޓްރޯލިއަމް އިންޖިނޭރިން، މެތަމެޓިކްސް، ކެމިސްޓްރީ އަދި ކޮމްޕިއުޓާ ސައިންސް ފަދަ ދާއިރާތަކުން ދުނިޔޭގެ އެންމެ އުހުގައި ކާމިޔާބު ހޯދަމުން ކަމަށެވެ.
