މާލޭގެ ގެއަކަށް ވަދެ މީހަކަށް ތޫނު އެއްޗަކުން ބިރުދައްކާ، މާރާމާރީ ހިންގި މީހަކު ހޯދުމަށް ފުލުހުން އާންމުންގެ އެހީތެރިކަމަށް އެދިއްޖެ އެވެ.
ފުލުހުން މިއަދު ބުނި ގޮތުގައި ހޯދަމުންދާ ރ. މަޑުއްވަރީ، ދެތަނޑިމާގެ، އިބްރާހިމް ސަމީން، 34، އަކީ މި 2، މެއި ގައި ގެއެއްގެ އެޕާޓްމަންޓަކަށް ގްރޫޕެއްގެ ބަޔަކު ވަދެ އެތަނުގައި ދިރިއުޅެމުންދާ މީހަކަށް ތޫނު އެއްޗަކުން ބިރުދައްކައި، ނުރައްކާތެރި ހަތިޔާރު ބޭނުންކޮށްގެން ހަމަލާދީ މާރާމާރީ ހިންގުމަށްފަހު އެއެޕާޓްމަންޓްގައި ހުރި މުދަލަށް ގެއްލުން ދީފައިވާ މައްސަލައާ ގުޅިގެން ހޯދަމުންދާ މީހެކެވެ.
އޭނާ ހޯދަނީ ކޯޓު އަމުރެއްގެ ދަށުން ކަމަށްވެސް ފުލުހުން ވަނީ ބުނެފަ އެވެ. މި މައްސަލާގައި ސަމީންގެ އިތުރުން އިތުރު ބަޔަކު ހޯދަމުންދާ ކަމެއް ނުވަތަ އިތުރު ބަޔަކު ހައްޔަރުކޮށްފައިވާ ކަމެއް ފުލުހުން ބުނެފައެއް ނުވެ އެވެ.
އާންމު ގޮތެއްގައި މިފަދަ މައްސަލަތަކުގައި ހޯދާ ފަރާތްތަކުގެ ވަނަވަރު އާންމުކޮށް އާންމުންގެ އެހީތެރިކަމަށް އެދެނީ އެ އިދާރާއިން ކުރާ މަސައްކަތުން އެ މީހަކު ނުހޯދުމުންނެވެ.
ފުލުހުން ވަނީ ސަމީން އާ ބެހޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ސީރިއަސްް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި ހިއްސާކުރެއްވުން އެދިފަ އެވެ.
