ކުރީގެ ރައީސް އަބްދުﷲ ޔާމީންގެ ދިފާއުގައި ކޯޓުގައި ވަކާލާތު ކުރައްވަން ނުކުމެ ހުންނެވި އެމަނިކުފާނުގެ އިސް ވަކީލު ޑރ. މުހައްމަދު ޖަމީލަކީ އެމަނިކުފާނުގެ ވެރިކަން ނިންމުމަށް އުފެދުނު އިދިކޮޅު ސިޔާސީ ހަރަކާތުގައި އެންމެ އިސްކޮށް އުޅުއްވި އެކަކެވެ.
ޔާމީންގެ ނައިބު ރައީސް ކަމުގައި ޖަމީލު ހުންނަވަނިކޮށް އެ މަގާމުން ދުރުކުރީ ރައްޔިތުންގެ މަޖިލީހުން އޭނާގެ އިތުބާރު ނެތް ކަމަށް ފާސްކޮށްފަ އެވެ. ޕީޕީއެމާއި ޕީއެންސީގެ އިސް ސަފުގައި މިއަދު ތިއްބެވީ އޭގައި ވޯޓު ދެއްވި ބައެއް މެންބަރުންނެވެ. އިދިކޮޅު ފަރާތްތަކާ ޖަމީލު ގުޅިވަޑައިގަތީ އޭގެ ފަހުންނެވެ.
މާޒީގައި ހިނގައިދިޔަ މި ހުރިހާ ކަމަކާ އެކު ވެސް އިދިކޮޅު ލީޑާޝިޕްގެ ބޭފުޅުން ޖަމީލަށް އިތުބާރު ކުރައްވާނެތޯ އެއީ އަބަދުވެސް އާންމުންގެ ތެރޭގައި އޮތް ސުވާލެކެވެ. އެ ސުވާލު އޮވެފައި، ރިޔާސީ އިންތިހާބު ވެސް ބޯމަތިވަމުން އަންނަ އިރު ޔާމީން އަަދިވެސް މިނިވަން ނުވެ އެވެ.
ޔާމީންގެ ސަޕޯޓަރުންގެ ޕްރެޝަރާ ވެސް ޖަމީލު އެ ދަނީ ކުރިމަތިލުންނެވެ. އެންމެ ފަހުން ބޭއްވި ޕާޓީ ޖަލްސާއެއްގައި ޖަމީލު ދެއްކެވި ވާހަކައިގެ އިހުސާސްތަކުން އެ ކަން ސާފުކޮށް ފެންނާން ހުއްޓެވެ.
ޖަމީލު "އަދަދު" ނޫހަށް ދެއްވި އިންޓަވިއުގައި ވިދާޅުވީ ރާއްޖޭގެ ސިޔާސީ މަސައްކަތުގައި އިސްކޮށް އުޅުއްވާ ބޭފުޅުންނަކީ ވަރަށް ވެސް ތަޖުރިބާ މަދު ޒުވާން ޅަ ބޭފުޅުން ކަމަށެވެ. ޒުވާން ހަޔާތުގައި ވަކި ގޮތަކަށް މަސައްކަތް ކުރެވިފައި އޮތުމަކީ އުމުރު ދުވަހަށް އެ ލޭބަލް އޮވެގެން ނުވާނެ ކަމަށް ވިދާޅުވި އެވެ.
"ޕީޕީއެމަށް ވެސް ބޮޑު އެއް ފިލާވަޅެއް ލިބެންޏާ، އެ ފިލާވަޅު އެ ވަނީ ލިބިފައި، އެއީ ޕީޕީއެމަށް ހެޔޮ ނޭދޭ ބަޔަކަށް ބަރޯސާވެގެން ކަން ރައީސް ޔާމީން މިއަދު ތަކުލީފުތަކެއް ތަހައްމަލް ކުރަން މި ޖެހެނީ، [އެމްއެމްޕީއާރުސީ ހިޔާނާތުގައި އިސްކޮށް ހުންނެވި] އަދީބު ޖެހި ސަކަރާތުންކަން،" ޖަމީލު ވިދާޅުވި އެވެ.
މާޒީން ލިބުނު ފިލާވަޅުތަކާއެކު ޖަމީލު އަދި ޕީޕީއެމްގެ ލީޑާޝިޕާއި އާންމު މެންބަރުން ވެސް ތިބީ އެއް އަމާޒަކަށް ދަތުރުކުރަން ކަން އޭނާ ފާހަގަ ކުރެއްވި އެވެ. އެއީ ޔާމީން މިނިވަންކޮށް، މި އަހަރުގެ ރިޔާސީ އިންތިހާބު އެމަނިކުފާނަށް ކާމިޔާބުކޮށްދިނުމަށް ކުރެވެން ހުރި ހުރިހާ މަސައްކަތެއް ކުރުމަށެވެ.
"ރައީސް ޔާމީނަށް އެ ބޭފުޅުން [ލީޑާޝިޕް] ވެސް މަސައްކަތް ކޮށްދެއްވަނީ، ރައީސް ޔާމީނަށް އަޅުގަނޑު ވެސް މަސައްކަތް ކޮށްދެއްވަނީ، އ ކަމަށް ނެތް ދެބަސްވުމެއް، ސަތޭކަ ޕަސެންޓު ގެރެންޓީ، މުޅި ޕާޓީގެ ފޯކަސްއަކީ އެއީ،" ޖަމީލު ވިދާޅުވި އެވެ.
ޕީޕީއެމްގެ ސްޕެޝަލް އެޑްވައިޒަރެއްގެ މަގާމުގައި ވެސް ހުންނެވި ޖަމީލު ވިދާޅުވީ ޕާޓީގެ ރިޔާސީ ކެންޑިޑޭޓުކަމަށް ވެސް އޭނާގެ ޝައުގެއް ނެތް ކަމަށެވެ. އެ ކަމުގެ ޔަގީންކަން ޕާޓީގެ ސަޕޯޓަރުންނާއި ލީޑާޝިޕަށް ވެސް އޮންނާނެ ކަމަށް ޖަމީލު ވިދާޅުވި އެވެ.
"އަޅުގަނޑު ނޫޅެން ކެންޑިޑޭޓު ކަމަކާ ވެސް، އެ ކަން އެނގޭނެ މުޅި ޕާޓީއަށް، އެ ކަމާ އުޅޭނަމަތާ އިތުބާރުގެ ސުވާލު އަންނާނީ ވެސް، ދެން އެކި ގޮތަށް އެ ވާހަކަ ދައްކާ ބަޔަކު އެ ދައްކަނީ ނުކިއްސަރު ވިސްނުމެއް ދުއްވާލަން،" ޖަމީލު ވިދާޅުވި އެވެ.
