ބިޑަކާ ނުލައި އިގްތިސާދީ ބޭނުންތަކަށް ފަޅުރަށް ކުއްޔަށް ދޫކުރެވޭނެ އުސޫލެއް ބަޔާންކޮށް ގަވާއިދެއް އެކުލަވާލައި އެއަށް އަމަލު ކުރަން ފަށައިފި އެވެ.
އިއްޔެ އިކޮނޮމިކް މިނިސްޓްރީން ގެޒެޓުކޮށްފައިވާ "އިގްތިސާދީ ބޭނުންތަކަށް ތަރައްގީކުރުމަށް ފަޅުރަށްރަށް ކުއްޔަށް ދިނުމާބެހޭ ގަވާއިދު" ގައިވާ ގޮތުން ފަޅު ރަށެއްގައި އިގްތިސާދީ މަސައްކަތެއް ކުރުމަށް އެ ރަށަކީ އިންޑަސްޓްރިއަލް ރަށެއްގެ ގޮތުގައި ކަނޑައަޅާނީ އިކޮނޮމިކް ކައުންސިލުގެ ލަފާގެ މަތިން ރައީސުލްޖުމްހޫރިއްޔާ ކަމަށެވެ.
އެފަދަ މަސައްކަތްތަކަށް ކަނޑައަޅާ ފަޅުރަށަކީ މީހުން ދިރިއުޅޭ ރަށެއްގެ ނުވަތަ ސިޓީއެއްގެ އިހްތިސާސްގައި ހިމެނޭ ރަށެއް ނަމަ އެ ފަޅު ރަށް އިހްތިސާސުން ވަކިކުރަންވާނެ ކަމަށް ގަވާއިދުގައިވެ އެވެ.
އިންޑަސްޓްރިއަލް ބޭނުމަށް ރައީސް ކަނޑައަޅާ ރަށްތައް ކުއްޔަށް ދޫކުރުމަށް ހަމަޖެހިފައި ވަނީ ދެ ގޮތަކަށެވެ. އެއީ
- ބީލަމުގެ އުސޫލުން އާންމުކޮށް އިއުލާނުކުރުމުން އެންމެ ރަނގަޅު ބިޑެއް ހުށަހަޅާ ފަރާތަކަށް ރަށް ދޫކުރުން.
- ބިޑަކާ ނުލައި ދެވޭ ސަރުކާރުގެ "އަންސޮލިސިޓަޑް ޕްރޮޕޯސަލް ޕޮލިސީ"ގެ ދަށުން އެ ރަށެއްގައި ކުރަން ބޭނުންވާ ކަމަކާ ބެހޭ ގޮތުން ތަފްސީލީ ޕްރޮޕޯސަލެއް ހުށަހެޅުމުން، އެ ޕޮލިސީގެ ދަށުން ހުއްދަދެވޭ ހުށަހެޅުމެއް ހުށަހަޅާ ފަރާތަކަށް ރަށް ދޫކުރުން.
ބިޑަކާ ނުލައި ދޫކުރާ ރަށްރަށުގައި، ކުރަން އުޅޭ މަސައްކަތާއި ސިނާއަތަށް ބެލުމަށްފަހު އެކަށީގެންވާ އިކިއުޒިޝަން ފީއެއް ސަރުކާރަށް ނެގިދާނެ އެވެ. އަދި ރަށުގެ ކުލި ކަނޑައަޅަން ޖެހޭނީ އަކަފޫޓަކަށް އަހަރަކަށް 10 ލާރިއަށް ވުރެ ދަށް ނުވާނެ ގޮތަކަށެވެ.
ސަރުކާރުން އެކި މަޝްރޫއު ހިންގާ ރަށްރަށާއި ދައުލަތުގެ ބޭނުންތަކަށް ކަނޑައެޅިފައިވާ ރަށްތަކާއި ސަރުކާރު ކުންފުނިތަކުގެ އެކިއެކި މަސައްކަތް ހިންގާ ރަށްރަށާއި ރާއްޖެއިން ބޭރުގެ ފަރާތްތަކާ ގުޅިގެން ސަރުކާރުން އެކި މަސައްކަތް ހިންގާ ރަށްރަށް އެފަދަ މަސައްކަތްތަކަށް ކުއްޔަށް ދޫކުރުމުން އިސްތިސްނާ ވާނެ އެވެ. އަދި މި ގަވާއިދު، ޓޫރިޒަމްއަށް ދޫކުރާ ރަށްރަށާއި މަސްވެރިކަމާއި ދަނޑުވެރިކަމަށް ދޫކުރާ ރަށްރަށް އަދި ވަރުވާއަށް ލިޔެދޭ ރަށްތަކުގެ މައްޗަށް ނުހިނގާނެ އެވެ.
ގަވާއިދުގައިވާ ގޮތުން 21 އަހަރުގެ މުއްދަތަކަށް އިގްތިސާދީ ބޭނުމަށް ރަށެއް ދެވިދާނެ އެވެ. މުއްދަތު ހަމަވާން ކައިރިވުމުން އިތުރު ކުރަން އެދިއްޖެ ނަމަ 50 އަހަރަށް ވުރެ ދިގުނުވާނެ މުއްދަތަކަށް އިތުރު ކުރުމުގެ ބާރު މިނިސްޓްރީއަށް ލިބިގެންވެ އެވެ.
އެގޮތަށް ދޫކުރާ ރަށެއްގައި ކުރާ އިންވެސްޓްމެންޓް ވިއްކާލާ ނަމަ ނުވަތަ ދެވަނަ ފަރާތަަކަށް ކުއްޔަށް ދޭ ނަމަ ފުރިހަމަ ކުރަން ޖެހޭ ކަންތައްތައް ވެސް ގަވާއިދުގައި ވަނީ ބަޔާންކޮށްފަ އެވެ.
އިގްތިސާދީ ބޭނުމަށް ދޫކުރާ ރަށްރަށުގެ އެއްބަސްވުން މުއްދަތު ހަމަވުމުގެ ކުރިން ބާތިލު ކުރެވޭނީ ދެ އަހަރު ދުވަހުގެ މުއްދަތަކަށް ކުއްޔަށް ދިނުމަށްފަހު އެވެ. އެކަމަކު، ކުއްޔަށް ދޫކުރުމުގެ އެއްބަސްވުމާ ހިލާފުވެއްޖެ ނަމަ އެ އެއްބަސްވުމެއްގައި ކަނޑައަޅާ ގޮތަކަށް އެއްބަސްވުން ބާތިލު ކުރެވިދާނެ އެވެ.
އެ ގަވާއިދުގައިވާ ގޮތުން އިގްތިސާދީ ބޭނުމަށް ރަށެއް ދޫކޮށްފައި އޮއްވާ ރާއްޖޭގެ ދިފާއަށް އެ ރަށެއް ބޭނުންވާ ނަމަ ނޯޓިހެއް ދިނުމަކާ ނުލައި ރަށް އަތުލެވިދާނެ އެވެ.
ގަވާއިދަށް އަމަލު ކުރަން ފަށާތާ 90 ދުވަހުގެ ތެރޭގައި އިންޑަސްޓްރިއަލް ރަށްތަކުގެ ދަފުތަރެއް އެކުލަވާލައި ގެޒެޓުކުރަން ވެސް ޖެހެ އެވެ. އަދި އޭގައި ރަށް ދޫކޮށްފައިވާ ފަރާތްތަކުގެ މައުލޫމާތާއި ކުރާ މަސައްކަތް ވެސް ހިމަނަން ޖެހެ އެވެ.
