ރައްޔިތުންގެ މަޖިލީހުގެ މެމްބަރުކަން އީވާ އަބްދުﷲ ވަކި ކުރަން އެމްޑީޕީގެ ޕާލިމެންޓަރީ ގްރޫޕުގެ އިއްތިފާގުން މިއަދު ނިންމައިފި އެވެ.
އެމްޑީޕީގެ ސުޕަ މެޖޯރިޓީގެ ތާއީދާއެކު ނައިބު ރައީސްގެ މަގާމަށް ވަޑައިގެންނެވި ގަލޮޅު އުތުރު ދާއިރާގެ މެމްބަރު އިވާގެ އިތުބާރު ނެތް ކަމުގެ މައްސަލަ ވެއްދުމުގެ މަސައްކަތް ފަށާފައި ވަނީ އިއްޔެ އެވެ.
"އަދަދު"އަށް ކަށަވަރުވެފައިވާ ގޮތުގައި މިއަދު ބޭއްވި އެމްޑީޕީގެ ޕީޖީ ގްރޫޕުގެ ބައްދަލުވުމުގައި އީވާ ވަކި ކުރަން ހުށަހަޅަން އެމްޑީޕީގެ ޕީޖީ ގްރޫޕުގެ އިއްތިފާގުން ވަނީ ނިންމައިފަ އެވެ.
މިހާރު ކުރިއަށްދަނީ މެމްބަރުން ސޮއި ކުރުމެވެ. އޭގެ އިތުރުން ވެސް ކުރަން ހުރި އިދާރީ މަސައްކަތްތައް ނިމުނުހާ އަވަހަށް މައްސަލަ ވައްދާނެކަން މި ނޫހަށް ވަނީ ކަށަވަރުވެފަ އެވެ.
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ.
ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް ދެބައިކުޅަ އެއްބައި މެންބަރުންގެ ވޯޓުން ފާސްވާނެ އެވެ. އެއީ 43 މެންބަރުންނެވެ. އެ އަދަދަށް އެމްޑީޕީގެ ޕީޖީގައި މެމްބަރުން ތިއްބަވާނެ އެވެ.
އީވާ ހިމެނޭހެން ކުރީގެ ރައީސް މުހައްމަދު ނަޝީދު ފިޔަވައި އެމަނިކުފާނުގެ "ފިކުރެއްގެ ދިރުން" ފެކްޝަންގައި ހަރަކާތްތެރިވާ ރައްޔިތުންގެ މަޖިލީހުގެ މެންބަރުން ވަނީ އެމްޑީޕީން ވަކިވެފަ އެވެ. އަދި އާ ޕާޓީއެއް އުފައްދަން އުޅޭކަން ވަނީ އިއުލާނުކޮށްފަ އެވެ. އެމްޑީޕީއިން ވަކިވި މެމްބަރުންގެ ތެރޭގައި އީވާ ހިމެނޭހެން 12 މެމްބަރަކު ހިމެނެ އެވެ.
އިއްޔެ ބޭއްވި ނޫސްވެރިންގެ ބައްލުވުމުގައި މަޖިލީހުގެ ނައިބު ރައީސްގެ މަގާމާ ބެހޭގޮތުން އަމާޒުވި ސުވާލަކަށް ޖަވާބުދެއްވަމުން އީވާ ވިދާޅުވެފައި ވަނީ އެއްވެސް މަގާމެއް އޭނާއަށް މުހިންމު ނޫން ކަމަށެވެ. އަދި މަގާމު ގެއްލިދާނެތީ ބިރު ނުގަންނަ ކަމަށް ވެސް އޭނާ ވިދާޅުވި އެވެ. މަގާމުން އިސްތިއުފާ ނުދެއްވާނެ ކަމަށް ވެސް އޭނާ ވިދާޅުވި އެވެ.
އީވާއަކީ އެމްޑީޕީ އުފެދުނީއްސުރެ އެ ޕާޓީގެ އިސް ސަފުގައި ހަރަކާތްތެރިވަމުންދާ ބޭފުޅެކެވެ. މަޖިލީހަށް ތިން ދައުރަށް އިންތިހާބުވެވަޑައިގަތީ ވެސް އެ ޕާޓީގެ ޓިކެޓުގަ އެވެ.
ރައީސް އިބްރާހިމް މުހައްމަދު ސޯލިހުގެ ބައެއް ސިޔާސަތުތަކާއި ހިތްހަމަޖެހިވަޑައިނުގެން ސަރުކާރަށް އޮތް ތާއިދު ރައީސް މުހައްމަދު ނަޝީދު ގެންދެވުމާ އެކު އެމަނިކުފާނު މަސައްކަތް ކުރެއްވީ ވަކި ފެކްޝަނެއް އުފައްދައިގެންނެވެ.
