ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރަށް ފަހު ނެގި ޗުއްޓީ ނިމި، މި ހަފުތާގެ ބުރާސްފަތި ދުވަހު މިއަހަރުގެ ދެ ވަނަ ދައުރު ފަށަން ތައްޔާރުވެފައި ވަނިކޮށް ވެރިކަން ކުރާ މޯލްޑިވިއަން ޑިމޮކްރަޓިކް ޕާލިމެންޓަރީ ގްރޫޕާއި, ރައީސް އިބްރާހިމް މުހައްމަދު ސޯލިހު ބައްދަލުކުރައްވައިފި އެވެ.
ރައީސް މިފަދަ ބައްދަލުވުމެއް ބާއްވާފައި މިވަނީ އެމަނިކުފާނު ވެރިކަމާ ހަވާލުވުމަށް ފަހު މަޖިލީހުގެ ތެރެއިން އެންމެ ބޮޑެތި ގޮންޖެހުންތަކާ ކުރިމަތިލާން ޖެހިފައިވާ ދުވަސްވަރު އެވެ. އެމަނިކުފާނުގެ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލައެއް މަޖިލީހަށް އިދިކޮޅުން ވަނީ ވައްދާފަ އެވެ. އަދި, ފޮރިން މިނިސްޓަރު ޝާހިދުގެ މައްސަލައެއް ވެސް ހުށަހަޅަން ދަނީ ތައްޔާރުވަމުންނެވެ.
ހުދު އެމަނިކުފާނުގެ އިތުބާރު ނެތް ކަމަށް ހުށަހެޅުމަށް އިދިކޮޅުން މަސައްކަތް ކުރަމުންދާ ދަނޑިވަޅެއްގައި މިފަދަ ބައްދަލުވުމެއް މުލިއާގޭގައި ކުރިއަށްގެންދިޔަކަން ރައީސްގެ ތަރުޖަމާނު މިއުވާން މުހައްމަދު ވެސް ވަނީ "އަދަދު" ނޫހަށް ޔަގީންކޮށްދީފަ އެވެ.
"މަޖިލިސް އަވަހަށް ހިންގުމަށާއި އަދި އިތުބާރު ނެތް ކަމުގެ މައްސަލަތަކާ ގުޅޭގޮތުން [އެ ބައްދަލުވުމުގައި] މަޝްވަރާ ކުރެވުނު," މިއުވާން މިއަދު ވިދާޅުވި އެވެ.
އޭގެ އިތުރުން, ލެޖިސްލޭޓިވް އެޖެންޑާގައި ކުރަން ހުރި މަސައްކަތްތައް އަންނަ ދައުރުގައި ބާރަށް ކުރިއަށްގެންދިޔުމާ ގުޅޭގޮތުން ވެސް ރައީސް މަޝްވަރާ ކުރެއްވި ކަމަށް މިއުވާން ވިދާޅުވި އެވެ.
މަޖިލީހުގައި ހުރި މައްސަލަތައް އަވަސް ކުރުމަށާއި މަޖިލީހުގެ ރިޔާސަތުން ގަވާއިދާ ހިލާފަށް ކަންކަން ކުރާ ނަމަ މަޖިލީހުގެ ގަވާއިދުގައި އޮތް ގޮތަށް ކަންކަން ކުރިއަށް ގެންދިޔުމަށް ރައީސްގެ އެއްބާރުލުން ފުރިހަމައަށް ލިބޭނެ ކަމަށް ރައީސް ވިދާޅުވި ކަމަށް އެ ބައްދަލުވުމުގެ މައުލޫމާތު އެނގޭ ބޭފުޅަކު މި ނޫހަ ވާހަކަ ދައްކަވަމުން ވިދާޅުވި އެވެ.
އެމަނިކުފާނު އިޝާރާތް ކުރެއްވީ މަޖިލީހަށް ހުށަހަޅާފައިވާ އިތުބާރު ނެތް ކަމުގެ މައްސަލަތަކަށް ކަމަށް މި ބައްދަލުވުމާ ގުޅޭގޮތުން ވާހަކަ ދެއްކެވި އެމްޑީޕީ ޕީޖީ ގްރޫޕްގެ ބައެއް މެމްބަރުން ވިދާޅުވި އެވެ.
މެދު ހެންވޭރު ދާއިރާގެ މެމްބަރު އަލީ އާޒިމް ވަކިކުރުމުން އެމްޑީޕީގެ ޕާލިމެންޓަރީ ގްރޫޕުގައި މިހާރު ތިއްބަވަނީ 67 މެމްބަރުންނެވެ. އޭގެ ތެރެއިން އިދިކޮޅު ފަރާތްތަކާއެކު މަސައްކަތްކުރާ ރައީސް މުހައްމަދު ނަޝީދުގެ ފެކްޝަނުގައި އެމަނިކުފާނު ހިމެނޭހެން ތިއްބަވަނީ 14 މެމްބަރުންނެވެ. ރައީސްއަށް ތާއިދުކުރައްވާ 53 މެމްބަރުން ތިއްބަވަ އެވެ.
ގާނޫނު އަސާސީ އިސްލާހުކުރުން ފިޔަވައި އެހެން ހުރިހާ ކަމަކަށް ބޭނުންވާ ވަރަށް މަޖިލީހުގެ އަގުލަބިއްޔަތު ކޮންޓްރޯލް ކުރައްވަނީ ރައީސް ސޯލިހު އެވެ.
މި ދައުރު ފެށުމާ އެކު ކުރިއަށް ގެންދާނެ ކަމަށް ބެލެވޭ ބޮޑު އަނެއް ކަމަކީ މަޖިލީހުގެ ސުޕަމެޖޯރިޓީ އޮންނަ އެމްޑީޕީގެ ތެރެއިން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކުރައްވާ "ފިކުރެއްގެ ދިރުން" ފެކްޝަނުގެ މެމްބަރުންނަށް ފިޔަވަޅު އެޅުމެވެ.
މިހާރު ވެސް ކޮމިޓީތައް ބަދަލުކުރުމުގައި މައްސަލާގައި ދެ ފެކްޝަނުން އަންނަނީ އަރައިރުންވަމުންނެވެ. ރައީސްގެ ކޮންޓްރޯލް އޮތް ފެކްޝަނުން ނަޝީދުގެ މެމްބަރުން ކޮމިޓީތަކުން ބަދަލުކުރަން ހުށަހެޅުމުން އެކަން އެގޮތަށް ވިޔަނުދޭނެ މޭރުމަކުން ރިޔާސަތުގައި އިންނަވާ ނަޝީދު ވަނީ ވާހަކަ ދައްކަވާފަ އެވެ.
