މަދުވެގެން ތިން މާއްދާއިން އޭ ސްޓާ ހޯދާ ދަރިވަރުންނަށް, "މެރިޓް ސްކޮލާޝިޕް"ގެ ނަމުގައި އާ ސްކޮލާޝިޕެއް ތައާރަފުކުރަން ނިންމައިފި އެވެ.
ރޭ ބޭއްވި ރައީސްގެ ހާއްސަ އެވޯޑައި ހައި އެޗީވާސް ސްކޮލާޝިޕް ދިނުމުގެ ހާއްސަ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހު ވިދާޅުވީ މަތީ ތައުލީމު ހާސިލު ކުރުމަށް އިތުރު ފުރުސަތުތައް ފަހިކޮށްދިނުމަށްޓަކައި, މެރިޓް ސްކޮލާޝިޕުގެ ނަމުގައި މި އަހަރު ތެރޭގައި އާ ސްކޮލާޝިޕް ސްކީމެއް ފަށަން ނިންމާފައިވާ ކަމަށެވެ.
އޭގެ ތަފްސީލު ހަޔާ އެޑިއުކޭޝަން މިނިސްޓްރީން ވަރަށް އަވަހަށް އާންމު ކުރާނެ ކަމަށް ރައީސް ވިދާޅުވި އެވެ.
ހަޔާ އެޑިއުކޭޝަން މިނިސްޓްރީގެ މީޑިއާ އޮފިޝަލް ތަހާރަތު ވަހީދު މިއަދު 'އަދަދު' އަށް ބުނީ ރައީސް ވިދާޅުވީ މެރިޓް ސްކޮލާޝިޕުގެ މަސައްކަތް މިހާރު އެ މިނިސްޓްރީން ކުރަމުންދާ ކަމަށެވެ.
"މެރިޓް ސްކޮލާޝިޕްގެ އުސޫލު ހެދުމުގެ މަސައްކަތް މިހާރު ކުރިއަށް ދަނީ. އެ ސްކޮލާޝިޕްގެ މަސައްކަތް ކުރިއަށް އެބަދޭ" ތަހާރަތު ވިދާޅުވި އެވެ.
ރޭގެ ރަސްމިއްޔާތުގައި ރައީސް ވިދާޅުވީ މެރިޓް ސްކޮލަރޝިޕް ލިބޭނީ، ރައީސްގެ ހާއްސަ އެވޯޑާއި ހައި އެޗީވާސް ސްކޮލާޝިޕުގައި ނުހިމެނޭ ދަރިވަރުންނަށް ކަމަށެވެ.
"އެއީ އެ ދަރިވަރަކު ޔުނިވާސިޓީގައި ފުރިހަމަކުރަން ބޭނުންވާ ޕްރޮގްރާމްގައި ބައިވެރިވުމަށްޓަކައި ފާސްވާންޖެހޭ މާއްދާތަކުގެ ތެރެއިން މަދުވެގެން ތިން މާއްދާއަކުން، އޭ ސްޓާ ހޯދާ ދަރިވަރުންނަށް ހާއްސަކުރާ ސްކޮލާޝިޕެއް" ރައީސް ވިދާޅުވި އެވެ.
ރައީސް ވިދާޅުވީ މިފަދަ ފުރުސަތުތައް ފަހިކޮށްދީގެން ސަރުކާރުން މަސައްކަތް ކުރަނީ ދިވެހި ދަރިވަރުގެ ސިކުނޑިތައް ޒަމާނީ ތައުލީމުން ތަރައްގީކުރަން ކަމަށެވެ. އަދި ސްކޮލާޝިޕްތަކާއި ލޯނު ސްކީމްތަކާއި އެވޯޑްތަކުގެ ހަގީގީ މަގްސަދަކީ އެއީ ކަމަށް އެމަނިކުފާނު ވިދާޅުވި އެވެ.
