އަތޮޅުތެރޭގައި މިހާރު ކުރިއަށް ދާ މަޝްރޫއުތައް ނިމި ހިދުމަތްތައް ފެށުމާ އެކު، ސިއްހީ ދާއިރާއަށް އިންގިލާބީ ބަދަލުތަކެއް އަންނާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ދުނިޔޭގެ ސިއްހަތު ދުވަސް ފާހަގަކުރުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވަނީ ރާއްޖެއިން ހާސިލްކޮށްފައިވާ ސިއްހީ ލަނޑުދަނޑިތަކުގެ މައްޗަށް އަލި އަޅުއްވައިލައްވައިފަ އެވެ.
އެގޮތުން، މުޅި ދުނިޔެއިން މެލޭރިއާ ނައްތާލި ފުރަތަމަ ގައުމަށް ރާއްޖެ ވެގެން ދިއުމާއި ދެކުނު އިރުމަތީ އޭޝިޔާއިން ފައިލޭރިއާ ނައްތައިލި ދެ ގައުމުގެ ތެރޭގައި 2016 ގައި ދިވެހިރާއްޖެ ހިމެނިގެން ދިއުން ފާހަގަކުރެއްވި އެވެ.
އަދި, ޑަބްލިޔުއެޗްއޯގެ އެހީތެރިކަމާ އެކު 2020 ގައި ހިމަބިހި ނައްތާލަން ހިފި ލަނޑުދަނޑި 2017 ގެ ތެރޭގައި ހާސިލުވެފައިވާ ކަމަށާއި މައިންގެ ފަރާތުން ތުއްތު ދަރިފުޅަށް އެޗްއައިވީ އާއި ސިފިލިސް ވާސިލުނުވާ ގައުމެއްގެ ގޮތުގައި 2019 ކަނޑައެޅި، ޖެހިގެން އައި އަހަރު ރުބެއްލާ ނައްތާލެވުނު ކަން ވެސް ފާހަގަކުރެއްވި އެވެ.
"އަޅުގަނޑުމެންގެ ލޯމަތިން ނުގެއްލި އޮތް އަނެއް ގޮންޖެހުމަކީ ކޮވިޑް-19ގެ ބަލިމަޑުކަން، މާތް ﷲގެ ވާގިފުޅާއެކު، އެ ވަބާއާ ދެކޮޅަށް އަޅުގަނޑުމެން ކުރި މަސައްކަތުން ވަރަށް ކުރު މުއްދަތެއްގައި ނަތީޖާ ހާސިލުކުރެވުނު،" ރައީސް ވިދާޅުވި އެވެ.
ރާއްޖޭގެ ސިއްހީ ދާއިރާ ކުރިއެރުވުމަށް ކުރަމުން އަންނަ ކަންކަމުގެ މައްޗަށް އަލިއަޅުއްވާލައި ރައީސް ވިދާޅުވީ ވަކި ވަކި ރަށްތަކެއްގެ މައްޗަށް އޮންނަ ރާއްޖޭގައި ސިއްހީދުމަތް ފަސޭހައިން ލިބޭނީ، ރާއްޖޭގެ ހުރިހާ ސަރަޙައްދެއްގައި ހިދުމަތްތައް ގާއިމް ކޮށްގެން ކަމަށެވެ.
"ރާއްޖޭގެ ފަސް ސަރަޙައްދެއްގައި ފަސް ޓާޝަރީ ހޮސްޕިޓަލް ތަރައްގީކުރުމުގެ މަސައްކަތް މިއަންނަނީ ކުރަމުން، އޭގެ ތެރެއިން ބައެއް ހޮސްޕިޓަލުތަކުގައި ކުރިން ނެތް ވަސީލަތްތައް ގާއިމުކޮށް މިހާރު އަންނަނީ އައު ހިދުމަތްތައް ދެމުން، އޭގެ ތެރޭގައި ސީ.ޓީ ސްކޭން، އެމް.އާރް.އައި، މެމޮގްރަފީ އަދި ލެބޯޓެރީގެ ހިދުމަތާއި ދަތުގެ ފަރުވާގެ ހިދުމަތްތައް ވެސް ހިމެނޭ،" ރައީސް ވިދާޅުވި އެވެ.
އޭގެ އިތުރުން ވެސް ގިނަ ރަށްތަކުގައި ހޮސްޕިޓަލުތައް ތަރައްގީ ކުރެވި، އާ ހިދުމަތްތައް ގާއިމް ކުރުމުގެ މަސައްކަތް ސަރުކާރުން ކުރަމުން އަންނަ ކަމަށް ރައީސް ވިދާޅުވި އެވެ.
"މީގެ ކުރިން މާލެއިން ނޫނީ ނުލިބޭ ސިއްހީ އެތައް ހިދުމަތެއް، މިދިޔަ ފަސް އަހަރުގެ ތެރޭގައި އަތޮޅުތަކުގައި ގާއިމުކުރެވިއްޖެ. އަދި މިހާރު ކުރިއަށްދާ ހިދުމަތްތަކާ އެކު، ސިއްހީ ދާއިރާއަށް އިންގިލާބީ ބަދަލުތަކެއް އަންނާނެކަން ޔަގީން،" ރައީސް ވިދާޅުވި އެވެ.
މި މަހުގެ ތެރޭގައި ސިއްހީ ހިދުމަތްތެރިންގެ މުސާރަ ބޮޑުކުރިކަން ފާހަގަކުރައްވައި ރައީސް އިތުރަށް ވަނީ އެ ދާއިރާތަކުން ތައުލީމު ހާސިލްކޮށް ގައުމަށް ހިދުމަތް ކުރުމަށް ގޮވައިލައިފަ އެވެ.
