ހެލްތު މިނިސްޓްރީން އަތޮޅުތެރޭގެ 112 ހެލްތް ސެންޓަރަކަށް ލޭ އަޅަން ބޭނުންވާ ސާމާނު ހަވާލުކޮށްފި އެވެ.
ހެލްތް މިނިސްޓްރީން ހަވާލުކުރި ތަކެތީގެ އަގު 119 މިލިއަން ރުފިޔާއަށް އަރަ އެވެ. ހަވާލު ކުރި ތަކެތީގެ ތެރޭގައި ބްލަޑް ބޭންކް ރެފްރިޖަރޭޓާ, ބްލަޑް ކަލެކްޝަން މޮނިޓާ, ޝޭކާ އަދި ޕްލެސެންޓާ އެކްސްޓްރެކްޓާ ހިމެނެ އެވެ.
"މި ތަކެތި ހަވާލުކުރީ މި ހިދުމަތް ދޭން އެކަށީގެންވާ ތަންތަނަށް. ތަކެތި ބަހާލުމުން, އެ ތަނުގެ [ހެލްތް ސެންޓަރުގެ] ސަބަބުން ކައިރި ރަށްތަކަށް ހިދުމަތް ލިބޭނެ," މިއާއެކު ރާއްޖޭގެ ހުރިހާ ސަރަަހައްދެއްގައި ވެސް ލޭ އެޅުމުގެ ހިދުމަތް ފަސޭހަ ކަމާއެކު ލިބިގެންދާނެކަން ފާހަގަ ކުރައްވާ ހެލްތް މިނިސްޓަރު އަހުމަދު ނަސީމް ވިދާޅުވި އެވެ.
ލޭ އަޅާ ތަކެތި މާފުށީ ހެލްތް ސެންޓަރާ ހަވާލުކުރުން; މާފުށީ ހެލްތް ސެންޓަރުގެ އެޑްމިނިސްޓްރޭޓަރު ސަލްމާން ރަޝީދު (ކ) އަދި ހެލްތް މިނިސްޓަރު އަހުމަދު ނަސީމް (ވ) -- ފޮޓޯ: ޝާބިން/ އަދަދު
ނަސީމް ވިދާޅުވީ މިތަކެތި ހަވާލުކުރުމުން ހެލްތް ސެންޓަރުތަކުގައި ބްލަޑް ޓްރާންސްފިއުޝަން ހެދުމަށް ހުރި ތަކުލީފުތައް ނިމުމަކަށް އަންނާނެ ކަމަށެވެ.
ހެލްތް ސެންޓަރުތަކަށް ލޭ އަޅަން ބޭނުންވާ ތަކެތި ހަވާލުކުރުމަށް މިއަދު ބޭއްވި ރަސްމިއްޔާތުގައި މާފުށީ ހެލްތް ސެންޓަރުގެ އެޑްމިނިސްޓްރޭޓަރު ސަލްމާން ރަޝީދު ހާމަކުރި ގޮތުގައި މިހާރު އެތަނުގައި ލޭ އެޅުމުގެ ހިދުމަތް ދެނީ ވަރަށް އުނދަގުލާއެކު އެވެ,
"އަޅުގަނޑުމެންގެ ޓެކްނީޝަނުން މަސައްކަތް ކުރަނީ ވަރަށް ހާލުގައި. ލޭ ނަގާއިރު, ޕެކެޓު ތަޅުވަނީ އަތުން. ލޭ ނަގާނިމޭއިރު އެއް އަތް ހުންނަނީ ވާޅުވެފައި. ކޮމްޕޯނެންޓުތައް ވަކިކުރަން ފޮނުވަން މި ޖެހެނީ އައިޖީއެމްއެޗަށް." ސަލްމާން ވިދާޅުވި އެވެ.
މިއަދު ހަވާލުކުރި ތަކެއްޗާއެކު ސިއްހީ މަރުކަރުތަކުގައި ލޭ އެޅުމުގެ ހިދުމަތް ދިނުމުގައި އައިޖީއެމްއެޗަށް ބަރޯސާވުން ކުޑަކުރެވިގެންދާނެ އެވެ. އަދި, އެ މަސައްކަތް ބޮޑުތަނުން ލުއިވެގެން ދާނެ އެވެ. ހަމައެއާއެކު, ލޭ ނެގުމަށްފަހު އެ ރައްކާ ކުރެވޭނެ އިންތިޒާމުވެސް ފަހިވެގެންދާނެ އެވެ.
