ލަންޑަން (މެއި 5) - ސައުދީ އަރަބިއްޔާގެ އަލް ނަަސްރަށް ޕޯޗުގަލްގެ ތަރި ކްރިސްޓިއާނޯ ރޮނާލްޑޯ މިހާރު ކުޅެމުންދަނީ ދުނިޔޭގެ އެންމެ ބޮޑު އާމްދަނީއެއް ލިބޭ އެތުލީޓުގެ ގޮތުގައި ކަމަށް ފޯބްސް އިން ބުނެފި އެވެ.
އެންމެ ފަހުން ދުނިޔޭގެ އެންމެ މުސާރަ ބޮޑު އެތުލީޓުގެ ގޮތުގައި 2017 ވަނަ އަހަރު ހުރި ރޮނާލްޑޯ އަށް ފާއިތުވި 12 މަސް ދުވަހުގެ ތޭރޭގައި އާމްދަނީ ގޮތުގައި 136 މިލިއަން ޑޮލަރު ލިބިފައިވާ ކަމަށް ފޯބްސް އިން ބުނެ އެވެ.
މެންޗެސްޓާ ޔުނައިޓަޑް ދޫކޮށް ރޮނާލްޑޯ ،38، އަލް ނަސްރަށް ބަދަލުވީ އަހަރަކު 176.5 މިލިއަން ޑޮލަރަށް ވުރެ ބޮޑު މުސާރަ އަކަށް ކަމަށް ރިޕޯޓްތައް ބުނެ އެވެ.
އެންމެ މުސާރަ ބޮޑު ލިސްޓުގެ ދެ ވަނަ ލިބެނީ މިދިޔަ އަހަރުގެ ވޯލްޑް ކަޕް ކާމިޔާބުކުރި އާޖެންޓީނާ ޓީމުގެ ކެޕްޓަން ލިއޮނެލް މެސީ އަށެވެ. މެސީ އަށް އާމްދަނީ ގޮތުގައި 130 މިލިއަން ޑޮަލރު ލިބިފައިވާ ކަމަށް ފޯބްސް އިން ބުނެ އެވެ.
ފޯބްސްގެ އެންމެ މުސާރަ ބޮޑު އެތުލީޓުންގެ ގަދަ 10 ގައި ބާސްކެޓްބޯޅައިގެ ތަރި ލެބްރޯން ޖޭމްސް އާއި ބޮކްސިންގެ ތަރި ކަނޭލޯ އަލްވަރޭޒް ހިމެނެ އެވެ.
ރިޓަޔާކޮށްފައިވާ އެތުލީޓުންގެ ތެރޭގައި މި ލިސްޓުގައި ހިމެނޭ ހަމައެކަނި އެތުލީޓަކީ ޓެނިހުގެ ލެޖެންޑް ރޮޖާ ފެޑެރާ އެވެ. މި ލިސްޓުގައި ފެޑެރާ އަށް ލިބެނީ ނުވަ ވަނަ އެވެ.
އެތުލީޓުންގެ އާމްދަނީ ބެލުމުގައި އެ އެތުލީޓުގެ މުސާރަ އާއި ބޯނަސްތަކުގެ އިތުރުން، ސްޕޮންސަޝިޕްތަކާއި އެހެނިހެން ގޮތްގޮތުން ލިބޭ އާމްދަނި އަށް ބަލަ އެވެ.
