މާލެ އާއި ވ. އަތޮޅާއި މ. އަތޮޅާ ދެމެދު ދަތުރުކުރާ މުދާ އުފުލާ ބޯޓެއް ހަބަރެއް ނުވެގެން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން މިއަދު ފަށައިފި އެވެ.
"މ. ސާވާރީ" ނަމަކަށް ކިޔާ އެ ބޯޓުގެ ހަބަރެއް ނުވެގެން އެ ކަން މިއަދު ހެނދުނު 6:30 ހާއިރު އެމްއެންޑީއެފަށް ރިޕޯޓްކޮށްފައިވާ ކަން އެ އިދާރާއިން ކަށަވަރުކޮށްދެ އެވެ.
އެމްއެންޑީއެފުން ބުނީ އެ އިދާރާއަށް މައުލޫމާތު ލިބިފައިވަނީ އެ ބޯޓު ދަތުރު ކުރަމުން އައީ ދެ ބިދޭސީއާއެކު ކަމަށެވެ.
މ. ދިއްގަރު ކައުންސިލްގެ ރައީސް އަހުމަދު ނިޝާން "އަދަދު" ނޫހަށް މައުލޫމާތު ދެއްވަމުން ވިދާޅުވީ އެ ބޯޓުގެ ކައްޕިއަކީ އެ ރަށު މީހެއް ކަމަށެވެ. އަދި ބޯޓުގެ ކައްޕިއަށް ނުގުޅޭ ކަމަށް އޭނާ ވިދާޅުވި އެވެ.
"ކައްޕިގެ ހަބަރެއް ނުވާތީ އަޅުގަނޑުމެން ފޮލޯމީ އެޕްލިކޭޝަނުން ވެސް ބެލިން، އެ އެޕުން ވެސް ފެންނަނީ މީގެ ފަސް ގަޑިިއިރު ކުރިން ބޯޓު އޮތް ސަރަހައްދު،" ނިޝާން ވިދާޅުވި އެވެ.
ނިޝާން ވެސް ވިދާޅުވީ ހެނދުނު ހަތެއް ޖަހާކަށް ހާއިރު އެ ކައުންސިލްގެ ފަރާތުން ވެސް ބޯޓުގެ ހަބަރެއް ނުވާ ކަމަށް އެމްއެންޑީއެފަށް ރިޕޯޓްކޮށްފައިވާ ކަމަށެވެ.
"ވ. އަތޮޅު ރަށްރަށުން ވެސް އަޅުގަނޑުމެން ކައިރި ބުނި، އެ ބޯޓުގެ ހަބަރެއް ނުވާ ކަމަށް، ކައްޕިއަށް ވެސް ނުގުޅޭ ކަމަށް،" ނިޝާން ވިދާޅުވި އެވެ.
އެ އެޕްލިކޭޝަނުން ދައްކާ ގޮތުގައި އެންމެ ފަހުން ބޯޓުގެ ކަނެކްޝަން ލިބިފައި ވަނީ ރޭ މެންދަމު 1:30 ހާއިރެވެ.
ފޮލޯމީ އެޕްލިކޭޝަން އިން މ. ސާވާރީ ބޯޓު އެންމެ ފަހުން ލޮކޭޓްވެފައިވާ ސަރަހައްދު - ގްރެފިކްސް؛ ރައްޔާން މުހައްމަދު / އަދަދު
އެނގިފައިވާ ގޮތުގައި އެމްއެންޑީއެފުން ދަނީ ހެލިކޮޕްޓަރު ވެސް ބޭނުންކޮށްގެން ބޯޓު ހޯދުމުގެ މަސައްކަތް ކުރަމުންނެވެ.
މުދާ އުފުލާ ބޯޓެއްގެ ހަބަރު ނުވެގެން އެމްއެންޑީއެފަށް ރިޕޯޓްކޮށްފައިވާއިރު، މިއީ މޫސުން ގޯސްވެ ކަނޑު ގަދަ ދުވަސްވަރެކެވެ. ކަނޑުދަތުރު ކުރާ ފަރާތްތަކުން ސަމާލުވުމުގެ އިލްތިމާސްއާއެކު މޫސުމާ ބެހޭ ގައުމީ އިދާރާއިން ރާއްޖޭގެ ބޮޑު ބަޔަކަށް ރީނދޫ ސަމާލު ވެސް ނެރެފައިވެ އެވެ.
