ޗާގޯސް އަކީ މޮރިޝަސްގެ ބައެއްގެ ގޮތުގައި ބަލައިގެން އެ ޖަރީޒާތަކާއި ރާއްޖެއާ ދެެމެދު ކަނޑުގެ ސަރަހައްދީ ރޮނގު ބެހުމުގައި ސަރުކާރުން ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލި ކަމަށް ކުރާ ތުހުމަތުގައި ޖުމްހޫރީ ޕާޓީ އާއި އެމްއާރްއެމް މިއަދު އިދިކޮޅު ފަރާތްތަކާއެކު އެއް މޭޒަކަށް އަތުވެއްޖެ އެވެ.
ސަރުކާރު ހިންގާ ކޯލިޝަންގައި ހިމެނޭ އެ ދެ ޕާޓީން ވެސް އެ މައްސަލާގައި އިދިކޮޅު ފަރާތްތަކާ ގުޅިގެން މިއަދު ގުޅިފައިވާ ނޫސްވެރިންގެ ބައްދަލުވުމެއް ބޭއްވި އިރު ދެ ޕާޓީން ވެސް ބުނީ އެއީ ސިޔާސީ ކަމެއް ނޫން ކަމަށެވެ.
"މިތަނުގައި މިތިބަ ސިޔާސީ މީހުންނަކީ ހުރިހާ ކަމެއްގައި އަޅުގަނޑުމެން އެކައްޗެއް ކިޔައި، އެއް ގޮތަކަށް ވާހަކަ ދައްކާ މީހުންނެއް ނޫން. ތަފާތު ފިކުރުގެ މީހުން. އަޅުގަނޑުމެން މިތަނަށް އެއްވީ ޑރ. މުނައްވަރު ވިދާޅުވި ފަދައިން ބައެއް ކަންތަކަކީ އަޅުގަނޑުމެން ސިޔާސީ ނުކުރާ ކަންތައްތައް އެއީ މި ދިވެހި އުއްމަތުގެ ދިވެހި ގައުމުގެ އިގުތިސާދީ ސަރަހައްދު އެއީ އަޅުގަނޑުމެން ސިޔާސީ ނުކުރާނެ ކަމެއް،" މިއަދުގެ ބައްދަލުވުމުގައި ޖޭޕީގެ ފަރާތުން ބައިވެރިވެވަޑައިގެންނެވި، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވި އެވެ.
އޭނާ ވިދާޅުވީ ސިޔާސީ ގޮތުން ތަފާތު ހިޔާލުގެ މީހުން އެއް ތަނަކަށް އައިސް އެެއް ވާހަކައެއް ދައްކަން ތިބީ އެހެންވެ ކަމަށެވެ.
އިދިކޮޅު ޕީޕީއެމްޕީއެންސީ އާއި އެމްއެންޕީ އަޑި ކުރީގެ ބަންޑާރަނައިބުން ކަމަށްވާ ޑރ. މުހައްމަދު މުނައްވަރާއި އާޒިމާ ޝުކޫރު ވެސް ބައިވެރިވެވަޑައިގެންނެވި އެ ބައްދަލުވުމުގައި އެމްއާރްއެމްގެ ފަރާތުން ވާހަކަ ދައްކަވަމުން، އެމްއާރްއެމްގެ ނައިބު ރައީސާ އާމިނަތު ނާދިރާ ވެސް ވިދާޅުވީ އެމްއާރްއެމް، ސަރުކާރު ކޯލިޝަންގައި އޮވެމެ، ޗާގޯސް މައްސަލާގައި ކަންބޮޑުވުން ފާޅުކޮށް ސިޓީއެއް ފޮނުވާފައި ވާނެ ކަމަށެވެ.
އެ މައްސަލާގައި ކަންބޮޑުވުން ފާޅުކޮށް މިދިޔަ އަހަރުގެ އޮކްޓޯބަރު މަހު އެ ޕާޓީން ބަޔާނެއް ވެސް ނެރެފައި ވާނެ ކަމަށް އޭނާ ވިދާޅުވި އެވެ.
"މި ދެންނެވި ސިޓީއަށް އަދި މިހައިތަނަކަށް ސަރުކާރަކުން އަޅުގަނޑުމެންނަށް ޖަވާބެއް ދެއްވައިފައެއް ނުވޭ. ދެން މީގެ އިތުރުން ދަންނަވައިލަން އޮތީ މި ނިންމުމުގެ ސަބަބުން އުނިވެގެން ދިޔައީ ދިވެހި މަސްވެރިން މަހަށް ނިކުމެ އުޅޭ، ކަނޑުގެ ބައެެއް ކަމުން މިއީ އިއާދަނުކުރެވޭ ވަރުގެ ދެރަކަމެއް ކަމަށް،" ނާދިރާ ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވި ހުރިހާ ބޭފުޅުން ވެސް ތުހުމަތުކުރެއްވި ގޮތުގައި އިންޓަނޭޝަނަލް ޓްރައިބިއުނަލް އޮފް ދަ ލޯ އޮފް ދަ ސީސް (އިޓްލޮސް) އިން ރާއްޖެއާ ޗާގޯސްއާ ދެމެދު، އިގުތިސާދީ ސަރަހައްދު ބެހި އިރު ރާއްޖޭގެ ބައެއް ވަނީ ގެއްލިފަ އެވެ. އެކަން އެގޮތަށް ވިޔަ ނުދޭން ސަރުކާރުން މަސައްކަތް ކޮށްފައި ނުވާ ކަމަށް ވެސް އެންމެ ބޭފުޅުން ތުހުމަތުކުރެއްވި އެވެ.
