ދިވެހިރާއްޖޭގެ މިލްކުވެރިކަމުގެ ދަށުގައި އޮތް ކަނޑުގެ ސަރަހައްދެއް ބޭރުގެ ބަޔަކަށް ދީ މި ސަރުކާރުން ގައްދާރުވެފައިވާ ކަމަށާއި އެ ސަރަަހައްދު އަނބުރާ ހޯދައިދެވޭނީ އިދިކޮޅު ލީޑަރު ޔާމީން އަބްދުލްގައްޔޫމަށް ކަމަށް ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.
ފޯޅަވަހި މައްސަލާގައި ސަރުކާރުގެ އާ ސިޔާސަތާ ދެކޮޅަށް ވަކާލާތު ކުރުމަށް އިދިކޮޅުން މިރޭ ބޭއްވި "ޗަ ގޯސް" ޖަލްސާގައި ވާހަކަ ދައްކަވަމުން އިދިކޮޅުގެ އެކްޓިން ލީޑަރު އަބްދުއްރަހީމް ވިދާޅުވީ ޖީއެމްއާރު އަތުން އެއާޕޯޓު އަތުލި ގޮތަށް، ދިވެހި ފަސްގަނޑުން ގެއްލިގެން ދިޔަ ބައި ރައީސް ޔާމީން އަނބުރާ ހޯދައިދެއްވާނެ ކަމަށެވެ.
"ބޮޑުތަކުރުފާނު ދިވެހިންނަށް އަނބުރާ ހޯދައިދިން ދިވެހިރާއްޖެ، ދޮންބަންޑާރައިންގެ ގުރުބާނީން އަޅުގަނޑުމެންނަށް ވާރުތަ ކޮށްދެއްވި މި ފަހުރުވެރި ދިވެހި ގައުމު، ހުސައިން އާދަމްގެ ލޭ ދިވެހި ބިމަށް އޮހޮރާލައިގެން އަޅުގަނޑުމެންނަށް ގާއިމްކޮށްދިން އަމާންކަން އަލުން އަނބުރާ ގެނެސް، މި ގައުމުގެ މިލްކުވެރިކަން ފުރިހަމަ ގޮތުގައި ހޯދައިދެވޭނެ ހަމައެކަނި ލީޑަރަކީ ރައީސް ޔާމީން،" އަބްދުއްރަހީމް ވިދާޅުވި އެވެ.
ރައްޔިތުން މާޔޫސް ނުވުމަށް އެދި، އަބްދުއްރަހީމް ވިދާޅުވީ އިދިކޮޅުން ތައްޔާރުވަނީ ވެރިކަމަށް އައުމަށް ކަމަށާއި އެ ހިތްވަރާއި ކެރުންތެރިކަމާއި ވަފާތެރިކަން ޔާމީންގެ ހުންނާނެ ކަމަށެވެ.
ދިވެހި ގައުމުގެ ސަލާމަތާއި ރައްކާތެރިކަން ބަލަހައްޓަން ހުވާކޮށްގެން ބަޔަކު ތިބި ކަމަށާއި އެ މީހުންގެ ޒިންމާ އަދާކުރަމުންދޭތޯ އާއި އެ ހުވަޔަށް ތެދުވެރިވާނީ ކޮން އިރަކުންތޯ އަބްދުއްރަހީމް ވަނީ ސުވާލު އުފައްދަވައިފަ އެވެ.
ގައުމުގެ ސިޔާދަތާއި އިސްތިގުލާލުން ބަޔަކު ގެއްލުވާލައި، ބަޔަކު ގައުމަށް ގައްްދާރުވެފައިވާ ކަމަށާއި ދިވެހި ސިފައިން އެކަމާ ދެކޮޅަށް ނިކުތުމަށް އޭނާ ވަނީ ގޮވައިލައްވައިފަ އެވެ.
"ހަތިޔާރާއެކީގައި މާލެއަށް އެރީމާ އެކަންޏެއް ނޫނޭ ނިކުންނަން ޖެހެނީ، ގައުމުގެ ވެރިން ގައުމަށް ގައްދާރުވީމާ ސިފައިން ނިކުންނަން ޖެހޭނީ ހަތިޔާރާއެކީ މަގުމައްޗަށް، ޖެހޭނީ ވެރިމީހާ ހިފައި ހައްޔަރުކުރަން، ޖެހޭނީ މި ގައުމު ކަލޭމެންގެ ބާރުގެ ދަށަށް ގެންނަން، ރައްޔިތުންގެ ވެރިކަމެއް ގާއިމް ކުރުމަށް ފުރުސަތު ދެއްވަން،" އަބްދުއްރަހީމް ވިދާޅުވި އެވެ.
އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި ހިނގަމުންދާ، ފޯޅަވަހި ހިމެނޭހެން ރާއްޖެ އާއި ޗާގޯސްގެ ކަނޑުގެ ސަރަހައްދު ފުށުއަރާ މައްސަލަ މަޑުޖައްސާލަދޭން އިދިކޮޅު ޕީޕީއެމް/ޕީއެންސީ ކޯލިޝަނުން އެ ޓްރައިބިއުނަލްގައި އެދި ސިޓީއެއް ވެސް ފޮނުވި އެވެ.
އެހެންނަމަވެސް އިޓްލޮސްއިން މިއަދު ނިންމި ނިންމުމުގައި ވަނީ ދެ ގައުމުގެ މެދުގައި ފުށުއަރާ 92،563 އަކަކިލޯމީޓަރުގެ ސަރަހައްދުގެ ތެރެއިން ރާއްޖެއަށް 47،232 ކިލޯމީޓަރު އަދި މޮރިޝަސްއަށް 45،331 ކިލޯމީޓަރު ސަރަަހައްދެއް ލިބިގެންވާ ކަމަށެވެ.
