ހެލްތު ސެކްޓަރުގައި މަސައްކަތް ކުރާ މުވައްޒަފުންގެ މުސާރަ އަންނަ ހޯމަ ދުވަހުން ފަށައިގެން ބޮޑު ކުރަން ނިންމިއިރު، އިންޓާންޝިޕް އަދާކުރަން މަސައްކަތް ކުރާ ޑޮކްޓަރުންނަށް ވެސް އުޖޫރައެއް ދިނުމަށް ސަރުކާރުން ނިންމައިފި އެވެ.
"އަަދަދު" އަށް އެނގިފައިވާ ގޮތުގާ އިންޓާން ޑޮކްޓަރުންނަށް ދިނުމަށް ނިންމާފައި ވަނީ މަސައްކަތް ކުރާ ކޮންމެ ދުވަހަކަށް 400ރ. އެވެ. ދުވާލަކު 10 ވަރަކަށް ގަޑިއިރު އިންޓާން ޑޮކްޓަރުން މަސައްކަތް ކުރަންޖެހޭއިރު މީގެ ކުރިން އެއްވެސް އުޖޫރައެއް ނުދެ އެވެ.
ޑޮކްޓަރުކަން ކިޔަވަމުން އަންނަ މެޑިކަލް ސްޓޫޑެންޓުން އެމްބީބީއެސް ސެޓްފިކެޓު ހާސިލުކުރުމަށް ފަހު އެއް އަހަރު ދުވަހުގެ މުއްދަތަށް މަސައްކަތުގެ ތަޖުރިބާ ބޭނުންވެ އެވެ. އެފަރާތްތަކަށް ރެސިޑެންސީ ނުވަތަ ވަކި ދާއިރާއަކުން ހާއްސަވުމުގެ ފުރުސަތު ގިނަ ފަހަރު ދެނީ އެ ތަމްރީނަށްފަހެވެ.
މިއަހަރުގެ ފެބްރުއަރީ 6، ރައްޔިތުންގެ މަޖިލީހުގައި ރިޔާސީ ބަޔާން ދެއްވަމުން ރައީސުލްޖުމްހޫރިއްޔާ އިބްރާހިމް މުހައްމަަދު ސޯލިހް ވިދާޅުވީ ސަރުކާރުގެ ޕޭ ހާމަނައިޒޭޝަން ސިޔާސަތުގެ ދަށުން ސިއްހީ ދާއިރާގެ މަސައްކަތްތެރިންގެ މުސާރަ މިއަހަރުގެ މެއި މަހުން ފެށިގެން ބޮޑުވާނެ ކަމަށެވެ.
މިހާރު ސަރުކާރުން ވަނީ ތައުލީމީ ދާއިރާގެ މުސާރަތައް ބޮޑުކޮށްފަ އެވެ. އަދި ދާދި ފަހުން ޔުނިވާސިޓީ ލެކްޗަރާއިންގެ މުސާރަ ވެސް ބޮޑުކޮށްފަ އެވެ. ރައީސް ވިދާޅުވީ ޕޭ ހާމަނައިޒޭޝަންގެ މަސައްކަތުގެ ތެރެއިން ސިވިލް ސާވިސް ހުރިހާ މުވައްޒަފުންގެ މުސާރައަށް ވެސް ބަދަލު އަންނާނެ ކަމަށެވެ.
