މިއަދު ރާއްޖޭގެ ބައެއް ހިސާބުތަކަށް އިހުސާސް ކުރެވުނު ފިނިހޫނުމިން 44 ޑިގްރީ ސެލްސިއަސްއަށް މަތިވެފައިވާ ކަމަށް މޫސުމާ ބެހޭ ގައުމީ އިދާ (މެޓް އޮފީސް)އިން ބުނެފި އެވެ.
މެޓް އޮފީހުން ބުނީ މިއަދު އެންމެ ހޫނު ގަދަވާނީ ލ. ކައްދޫއަށް ކަމަށެވެ. އެ ސަރަހައްދުގެ ފިނިހޫނުމިން 33 ޑިގްރީ ސެލްސިއަސްގައި ހުރި އިރުު އިހްސާސް ކުރެވެ ފިނިހޫނުމިނަކީ 44 ޑިގްރީ ސެލްސިއަސްކަމަށް މެޓް އޮފީހުން ބުނެފައި ވެއެވެ.
އިހްސާސް ކުރެވޭ ފިނިހޫނުމިނަކީ އެސަރަހައްދެއްދެއްގެ އަސްލު ފިނިހޫނުމިނާއި ވައިގެ ތެތްކަމަށް ބަލާ ނިސްބަތްކުރާ އެވްރެޖް އަދަަދެކެވެ.
ރާއްޖޭގެ އެހެން ހިސާބުތަކުގެ ފިނިހޫނުމިން ވެސް ވަނީ އިއްޔެއަށްވުރެ މައްޗަށް ގޮސްފަ އެވެ. އިއްޔެ އާންމުކޮށް ހުރިހާ ހިސާބެއްގެ އިހްސާސްކުރެވޭ ފިނިހޫނުމިން 40 ޑިގްރީ ސެލްސިއަސްއިން ދަށުގައި ހުރި ނަމަވެސް މިއަދު ވަނީ އެ އަދަދު މަތިވެފަ އެވެ.
އެގޮތުން ރާއްޖޭގެ އެންމެ އުތުރުން ހދ. ހަނިމާދޫގެ އިހްސާސްކުރެވޭ ފިނިހޫނުމިން 42 ޑިގްރީ ސެލްސިއަސްގައި ހުރި އިރު މާލެ ސަރަހަދުގެ ފިނިހޫނުމިން ހުރީ 43 ޑިގްރީ ސެލްސިއަސްގަ އެވެ. ހުވަދޫއަތޮޅު ކާޑެއްދޫގެ ފިނިހޫނުމިން 41.9 ޑިގްރީ ސެލްސިއަސްގައި ހުރި އިރުު ރާއްޖޭގެ އެންމެ ދެކުނުން އައްޑުއަތޮޅުގެ ފިނިހޫނުމިން ހުރީ 41 ޑިގްރީ ސެލްސިއަސްގަ އެވެ.
އިހުސާސް ކުރެވޭ ފިނިހޫނުމިން އެހައި މައްޗަށް މިދަވަސްވަރު ދަނީ، މިއީ ދެ މޫސުން ބެދޭ ދުވަސްވަރުކަމުން އެއްކޮށް ވައި ހިނދިފައި އޮތުމާ އެކު ވައިގެ ތެތްކަން ވެސް ދަށްވީމަ އެވެ.
ހޫނުގަދަވުމުގެ ސަބަބުން ލިބިދާނެ ގެއްލުމަކުން ސަލާމަތްވުމަށް އެ ސެންޓަރުން ވަނީ އިލްތިމާސްކޮށްފަ އެވެ. އެގޮތުން ހޫނުގަދަ ގަޑިތަކުގައި ކުޑަކުދިން ބޭރަށް ނުނެރުމާއި ކޮންމެހެން ބޭރަށް ދާންޖެހޭ ނަމަ، އަވި ކުޑައެއް ބޭނުން ކުރުމާއި ގިނައިން ދިޔާ އެއްޗެތި ބުއިން ފަދަ ކަންކަން ކުރުމަށް އެ ސެންޓަރުން ލަފާދެ އެވެ.
ރާއްޖޭގެ ހޫނު ގަދަވާތީ ސަމާލުވާަންވީ ކަންކަން -- އެޗްޕީއޭ
އޭޕްރިލް މަހަކީ ރާއްޖޭގައި ހޫނުމިން އަބަދުވެސް އެންމެ ބޮޑަށް މައްޗަށް ދާ ދުވަސްވަރެވެ. މި ދުވަސްވަރު ކަރަންޓު ބޭނުން ކުރުމުގައި ސަމާލުވުމަށް ސްޓެލްކޯއިން ވެސް ވަނީ އިލްތިމާސް ކޮށްފަ އެވެ.
ސްޓެލްކޯއިން އޭސީ ފަދަ ތަކެތި ބޭނުން ކުރާއިރު، ފިނިމިން 25 ޑިގުރީ ސެލްސިއަސް އަށްވުރެ ދަށް ނުވާ ގޮތަށް ބޭނުން ކުރުމަށާއި ކަރަންޓު ސާމާނު ގަންނައިރު، އިންވާޓާ އަށް އިސްކަންދިނުމަށް އިލްތިމާސް ކުރާ ކަމަށެވެ.
