މިމަހުގެ 11 ވަނަ ދުވަހު މާލެ ސަރަހައްދުގައި ރެކޯޑް މިންވަރަކަށް ކަރަންޓް ބޭނުންކޮށްފައިވާ ކަމަށް ސްޓެލްކޯއިން ބުނެފި އެވެ.
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފު މިރޭ ކުރެއްވި ޓްވީޓެއްގައި ވިދާޅުވި ގޮތުގައި މިމަހުގެ 11 ވަނަ ދުވަހު މާލެ ސަރަހައްދުގައި 92.5 މެގަވޮޓްގެ ކަަރަންޓް ބޭނުންކުރި އެވެ. އެއީ އޭނާ ވިދާޅުވި ގޮތުގައި މާލެ ސަރަހައްދުގައި މިހައިތަނަށް އެންމެ ގިނައިން ކަރަންޓް ބޭނުންކުރި ދުވަހެވެ.
މާލެ ސަރަހައްދުގައި ކަރަންޓް ބޭނުންކުރާ މިންވަރު ކުރިއަށް އޮތް ދުވަސްތަކުގައި އިތުރުވާނެ ކަމަށް ލަފާކުރާ އިރު، ޝަރީފު ވިދާޅުވި ގޮތުގައި މާލެ ސަރަހައްދުގައި ސްޓެލްކޯއަށް ދުވާލަކު އުފެއްދެނީ 120 މެގަވޮޓްގެ ކަރަންޓެވެ.
"ސްޓެލްކޯގައި 120 މެގަވޮޓްގެ ކަރަންޓް އުފެއްދުމުގެ ގާބިލުކަން ހުރި ނަމަވެސް ކަރަންޓް އިގުތިސާދުކުރައްވާ،" އޭނާ ވިދާޅުވި އެވެ.
ސްޓެލްކޯއިން މިއަދު ކުރި ޓްވީޓެއްގައި ބުނީ ފިނިކުރަން ބޭނުންކުރާ އާލާތްތައް (އެއާކޮންޑިޝަނާތައް) ބޭނުންކުރުމުގައި އިތުރަށް ސަމާލުވާން އިލްތިމާސްކުރާ ކަމަށެވެ. އެއާކޮންޑިޝަނާތައް 25 ޑިގްރީއަށް ވުރެ ދަށް ނުކުރަން ވެސް އެކުންފުނިން އިލްތިމާސްކުރި އެވެ.
"...ހާއްސަކޮށް، ފިނި ކުރުމަށް ގެންގުޅޭ އޭސީ ފަދަ އާލާތްތަށް ބޭނުން ކުރުމުގައި އިތުރަށް ސަމާލުވެ، 25 ޑިގްރީއަށްވުރެ ދަށް ނުވާނެހެން ޓެމްޕަރޭޗަރ ބެހެއްޓުމަށާއި، އިލެކްޓްރޯނިކް އާލާތްތައް ގަންނަ އިރު އިންވާޓާ އަށް އިސްކަންދިނުމަށް އިލްތިމާސް ކުރަން،" ސްޓެލްކޯގެ ޓްވީޓްގައި ބުންޏެވެ.
މިދުވަސްވަރު ރާއްޖޭގެ ހުރިހާ ހިސާބެއްގައި ވެސް އިހުސާސްކުރެވޭ ފިނިހޫނުމިން ވަރަށް މައްޗަށް ދާނެ ކަމަށް މޫސުމާ ބެހޭ އިދާރައިން ވަނީ ލަފާކޮށްފަ އެވެ. އެގޮތުން މާލެ ސަރަހައްދުގައި މިއަދު އިހުސާސްކުރެވޭ ފިނިހޫނުމިން ހުރީ 39 ޑިގްރީ ސެލްސިއަސްގައި ކަމަށް އެ އިދާރާއިން މިއަދު އާއްމުކުރި މައުލޫމާތުގައި ވެ އެވެ.
ރާއްޖޭގައި ހޫނުގަދަވެފައި ވާތީ ސިއްހީ ގޮތުން ސަމާލުވާން ޖެހޭ ކަންތައްތަކުގެ އިރުޝާދެއް ވެސް މެޓުން މިއަދު އާއްމުކުރި އެވެ.
