ހދ. ހަނިމާދޫއިން ދޫކުރި ބަންޑާރަ ގޯތިތައް ސާފުނުކޮށް، އިންވަކި ކުރަން ކަންމުޑި ނުޖަހާ ނަމަ އެ ގޯތިތައް އަތުލާނެކަމުގެ އިންޒާރު ހދ. ހަނިމާދޫ ކައުންސިލުން ދީފި އެވެ.
ހަނިމާދޫއިން 3000 އަކަފޫޓުގެ 200 ގޯތި ދޫކުރި ޑިސެމްބަރު، 2022 ގަ އެވެ. ގޯތި ދޫކުރީ އެއާޕޯޓު މަޝްރޫއު ކުރިއަށް ގެންދަން ސަރުކާރުން ނިންމުމުންނެވެ.
އެ ކައުންސިލުން އިއްޔެ ކުރި އިއުލާނެއްގައި އެންގީ ދޫކުރި ބަންޑާރަ ގޯތިތަކުގެ ކަންމުޑި ޖެހުމުގެ އިތުރުން ގޯތި ތެރެ ސާފުކޮށް އެ ގޯއްޗަކަށްވާ މަގުގެ ދެ ބައިކުޅަ އެއްބައި ޖޫން، 2023 ގެ ކުރިން ސާފު ކުރުމަށެވެ.
"މި މުއްދަތަށް ގޯއްޗާއި އެގޯއްޗަކަށްވާ މަގުގެ ދެބައިކުޅަ އެއްބައި ސާފުނުކުރާ ފަރާތްތަކުގެ ވަގުތީ ރަޖިސްޓަރީ ބާތިލް ކުރުމުގެ އިޙްތިޔާރު މިކައުންސިލަށް ލިބިގެންވާ ކަމުގައި ދެންނެވިން،" ހަނިމާދޫ ކައުންސިލުން ބުނެފައިވެ އެވެ.
ހަނިމާދޫއިން މިދިޔަ ޑިސެމްބަރުގައި ގޯތި ދޫކުރީ އެންމެފަހުން ގޯތި ދޫކުރިތާ 12 އަހަރަށްފަހެވެ. ބޮޑުމިނުގައި 305 ހެކްޓަރު ހުންނަ ހަނިމާދޫގައި އުޅެނީ 2100 ވަރަކަށް މީހުންނެވެ.
ހަނިމާދޫ އެއާޕޯޓު ސަރުކާރުން ތަރައްގީ ކުރަނީ 136 މިލިއަން ޑޮލަރު ނުވަތަ ދެ ބިލިއަން ރުފިޔާގެ ލޯނެއް އިންޑިއާ ސަރުކާރުން ނަގައިގެނެވެ. އެ އެއާޕޯޓު ތަރައްގީކޮށް ނިންމުމުން ހަނިމާދޫގެ އިތުރުން މުޅި އެ ސަރަހައްދު ވެސް ތަރައްގީވާނެ ކަމަށް ސަރުކާރުން ގަބޫލު ކުރެ އެވެ.
