އީކުއަލް ރައިޓްސް އިނީޝިއޭޓިވް (އީއާރްއައި) އާއި ވިލާ ކޮލެޖު ގުޅިގެން އިމްޕްލިމެންޓިން ޕީޕަލް ފޯކަސްޑް އެކްސެސް ޓު ޖަސްޓިސްގެ ނަމުގައި ބައިނަލްއަގްވާމީ ކޮންފަރެންސެއް އިފްތިތާހުކޮށްފި އެވެ.
އިންޑިއާ ނާގްޕޫރުގެ ސިމްބައޮސިސް ލޯ ސްކޫލާ ގުޅިގެން، މި ކޮންފަރެންސް ކުރިއަށް ދާނީ މިއަދާއި މާދަމަ އެވެ. މިއީ ޔޫއެސްއެއިޑާއި ނެޝަނަލް ޑިމޮކްރެޓިކް އިންސްޓިޓިއުޓް (އެންޑީއައި)ގެ އެހީގައި ކުރިއަށް ގެންދާ ކޮންފަރެންސެކެވެ.
މި ކޮންފަރެންސްގައި އެމެރިކާ، އިނގިރޭސިވިލާތް، ޖަރުމަން، ޗައިނާ އަދި ޕާކިސްތާނު ހިމެނޭހެން 15 ގައުމެއްގެ މަންދޫބުން ބައިވެރިވެ އެވެ. އަދި މި ކޮންފަރެންސަށް ވަނީ ރާއްޖެއާއި ރާއްޖެއިން ބޭރުގެ ދަރިވަރުންނާއި އެކަޑެމިކްސްގެ ފަރާތުން 60 އަށްވުރެ ގިނަ ރިސާޗް ޕޭޕަރު ހުށަހަޅާފަ އެވެ.
ވިލާ ކޮލެޖުގެ މެނޭޖްމަންޓުން ހާމަކޮށްފައިވާ ގޮތުގައި މި ކޮންފަރެންސަށް ހުށަހަޅާ ޕޭޕަރުތައް އެ ކޮލެޖުން ޗާޕު ކުރަނީ ފެކަލްޓީ އޮފް ޝަރީއާ އެންޑް ލޯ އިން އެޑިޓު ކޮށްފައިވާ ތިން ފޮނުގެ ޒަރިއްޔާގަ އެވެ. އޭގެ ތެރެއިން އެއް ފޮތަކީ ބައިނަލްއަގްވާމީ ފެންވަރުގައި ޗާޕު ކުރެވޭ ފޮތަކަށް ވާއިރު، އަނެއް ދެ ފޮތް ޗާޕު ކުރާނީ ރާއްޖޭގެ ޝަރުއީ ދާއިރާގެ އަދަބިއްޔާތަށް ކުރާ ހިއްސާއެއްގެ ގޮތުގައި ވިލާ ކޮލެޖުންނެވެ.
މި ކޮންފަރެންސް އިފްތިތާހު ކުރުމުގެ ރަސްމިއްޔާތުގައި ވާހަކަދައްކަވަމުން ބާ ކައުންސިލުގެ ރައީސް އިސްމާއިލް ވިޝާމް ވަނީ މިފަދަ ކޮންފަރެންސްތަކުގެ މުހިންމު ކަމުގެ މައްޗަށް އަލިއަޅުއްވާލައްވާފަ އެވެ. އެގޮތުން މިއީ ގައުމުގެ ކުރިއެރުމަށް ފައިދާ ކުރާނެ ކަމެއްކަން ފާހަގަކުރައްވާ އޭނާ ވަނީ މިކަމުގައި ޝާމިލްވި ހުރިހާ މުއައްސަސާއަކަށް ޝުކުރު އަދާކުރައްވާފަ އެވެ.
ހައިބްރިޑް މޯޑުގައި ކުރިއަށް ގެންދާ މި ކޮންފަރެންސްއި 2019 އިން 2023 އަށް ނެޝަނަލް ސްޓްރެޓެޖިކް އެކްޝަން ޕްލޭންގައި ޝަރުއީ ދާއިރާ އިސްލާހުކުރުމަށް ދައުލަތުން ވެފައިވާ ވައުދުތައް ފުއްދުމާއި ދައުލަތުގެ ޖަވާބުދާރީކުރުން އަދި އާންމު މައުލޫމާތު ހޯދުމާއި ކޯޓުތަކުގައި އިންސާފުވެރިކަން ކަށަވަރުކުރުމާބެހޭ ގޮތުން މަޝްވަރާކޮށްފައި ވެއެވެ.
