ރ. ފުއްގިރި ކުއްޔަށް ދޫކުރުމުގެ ތެރެއިން ހިންގި ކަމަށް ބުނާ ހިޔާނާތުގެ މައްސަލާގައި, އުފުލާފައިވާ ދައުވާތައް މަދަނީ މިންގަނޑުން ކުރިއަށް ގެންދެވޭނެ ކަމާ މެދު ބަހުސް ކުރުމަށް ފުރުސަތު ނުދިނުމުން ކުރީގެ ރައީސް އަބްދުﷲ ޔާމީން ނުރުހުން ފާޅުކުރައްވައިފި އެވެ.
ޔާމީންގެ ވެރިކަމުގައި ހިންގި އެމްއެމްޕީއާރުސީ ބޮޑު ހިޔާނާތުގެ ތެރޭގައި ހިމެނޭ ފުއްގިރި މުއާމަލާތުގެ މައްސަލާގައި ޔާމީނާއި މއ.ކުރިކީލަހިޔާ އަހުމަދު ކްރިކް ރިޒާގެ އިތުރަށް ސަން ކޮންސްޓްރަކްޝަން އެންޑް އިންޖިނިއަރިން އަދި ސަން އިންވެސްޓްމަންޓުގެ މައްޗަށް ދައުވާކޮށްފައިވެ އެވެ.
ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އަދި ރިޝްވަތު ގަބޫލުކުރުމުގެ ދައުވާ އެވެ. ރިޒާގެ މައްޗަށް ކުރަނީ މަނީ ލޯންޑަރިންގެ ދައުވާ އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާ އެވެ. ސަންގެ ދެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލާފައިވެ އެވެ.
މިއަދު ކްރިމިނަލް ކޯޓުން އޮންލައިންކޮށް ކުރިއަށް ގެންދިޔަ އަޑުއެހުމުގައި ޔާމީންގެ އިސް ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވީ މަދަނީ މިންގަނޑުން ކުރިއަށް ގެންދެވޭނެ ކަމާ މެދު ވާހަކަ ދެއްކުމަށް ފުރުސަތު ދީފައި ނެތުމުން އެ ފުރުސަތު ދެއްވުމަށް އެދިވަޑައިގަންނަވާ ކަމަށެވެ.
މި މައްސަލަ ފުރަތަމަ ބެއްލެވީ ކްރިމިނަލް ކޯޓުގެ އޭރުގެ އިސް ގާޒީ މުހައްމަދު ޝަކީލެވެ. ޝަކީލް ނިންމަވާފައިވަނީ މަދަނީ މިންގަނޑުން މައްސަލަ ކުރިއަށް ގެންދެވޭނެ ކަމަށެވެ. އަދި، މިހާރު މައްސަލައާ ހަވާލުވެ ހުންނެވި ގާޒީ އަލީ ނަދީމް ނިންމަވާފައިވަނީ މައްސަލަ އޮތް ހިސާބުން ކުރިއަށް ގެންދިއުމަށެވެ.
ގާޒީ ނަދީމް އެ ގޮތަށް ނިންމެވުމުން ވާހަކަ ދެއްކުމުގެ ފުރުސަތަކަށް ރައީސް ޔާމީން އެދިވަޑައިގަތެވެ. އެ ފުރުސަތުގައި ޔާމީން ވިދާޅުވީ ދުނިޔޭގެ ކޮންމެ ކޯޓެއްގައި ވެސް މަދަނީ މިންގަނޑަށް ވެސް ދައުވާތައް ފެތޭތޯ ބަހުސް ކުރަން ދިފާއަށް ފުރުސަތު ދޭ ކަމަށެވެ.
"މަދަނީ މިންގަނޑުން ވެސް އަޅުގަނޑުގެ ކުށެއް ނެތް ސާބިތު ކުރަން ފުރުސަތު ދިނުމަކީ ވަރަށް ވެސް އަސާށީ ހައްގެއް، އެ ފުރުސަތު މި ކޯޓުން ވެސް އެބަ ހުރި ދީފަ، އެކަމަކު މި ފެންނަނީ އެކި ގާޒީން އެކި ގޮތަށް އަމަލުކުރާ ތަން،" ގާޒީ ނިންމެވުމާ މެދު ވަރަށް ބޮޑަށް ނުރުހިފައި ހުންނަވައި ޔާމީން ވިދާޅުވި އެވެ.
ޔާމީން ވިދާޅުވީ، ދައުލަތުގެ ބައެއް ހެކިތައް ސިއްރުކުރަން ނިންމާފައި ނިންމުން ވެސް މުރާޖައާ ކުރަން ޖެހޭ ކަމަށެވެ. ދިފާއަށް، ދައުލަތުން ކުރާ ދައުވާ އާއި ހުށަހަޅާ ހެކިތަކާއި ލިޔެކިޔުންތަކުގެ ފުރިހަމަ މައުލޫމާތު އަރުވަން ޖެހޭނެ ކަމަށް ވެސް ޔާމީން ވިދާޅުވި އެވެ.
ދައުލަތުގެ ބައެއް ހެކިތައް ސިއްރުކުރަން ދައުލަތުން އެދިގެން ކްރިމިނަލް ކޯޓުން ނެރެފައިވާ "ހެކި ރައްކާތެރިކުރުމުގެ އަމުރު" ހައި ކޯޓުގައި އިސްތިއުނާފު ކުރުމުން އެ ކޯޓުން ވެސް ވަނީ އެ އަމުރު ދަމަހައްޓައިފަ އެވެ.
ޔާމީންގެ ފަރާތުން އެ މައްސަލަ ސުޕްރީމް ކޯޓުގައި އިސްތިއުނާފު ކުރުމަށް މިހާރު ނިންމާފައިވެ އެވެ. ޔާމީންގެ ވަކީލުންގެ ތެރޭގައި ހިމެނޭ ވަކީލު އާދަމް ޝަމީމް ވިދާޅުވީ ގާނޫނުގައި ދީފައި އޮތް މުއްދަތުގެ ތެރޭގައި އިސްތިއުނާފަށް ހުށަހަޅުއްވާނެ ކަމަށެވެ.
މައްސަލައިގެ ފަސްފަހަތް
ދައުލަތުން ތުހުމަތުކުރާ ގޮތުގައި ނުފޫޒު ބޭނުންކުރައްވައިގެން ޔާމީން، މއ.ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައިވެ އެވެ.
އެމްއެމްޕީއާރްސީގެ ތެރެއިން ފުއްގިރި ކުއްޔަށް ދޫކުރީ ބިޑަކާ ނުލާ ދުބާއީ ކުންފުންޏެއް ކަމަށްވާ ކްލެސިކް ސިޓީ އައިލެންޑް ހޯލްޑިންގްސްއާ އެވެ. އެ ކުންފުންޏަށް ފުއްދިރި ދިނީ 1.55 މިލިއަން ޑޮލަރަށެވެ. ފުއްގިރި ކުއްޔަށް ދިނުމުގައި ރިޝްވަތުގެ ކަންތައްގަނޑެއް ހިންގާފައިވާއިރު, ޕެންޑޯރާ ޕޭޕާސްގައި ހާމަވި ގޮތުގައި އޭގެ ފަހަތުގައި ތިބީ އިންޑިއާގެ ނުޒޫފުގަދަ ވިޔަފާރިވެރިންތަކެވެ.
އެ ގޮތުން, ލީކްކޮށްލާފައިވާ ޕެންޑޯރާ ޕޭޕާސްއަށް ލިބިފައިވާ ލިޔުންތަކުން ދައްކާ ގޮތުގައި ކްލެސިކް ސިޓީ އައިލެންޑް ހޯލްޑިންގްސް ކުންފުންޏަކީ އިންޑިއާގެ ޕްރޮޕަޓީ ޑިވެލޮޕަރެއް ކަމަށްވާ އަވިނާޝް ބޮސާލޭގެ މަސްލަހަތު އޮންނަ ވިޔަފާރިއަކާއި ލޮޖިސްޓިކް ވިޔަފާރީގައި ނުފޫޒުގަދަ އިންޑިއާ މީހެއް ކަމަށްވާ އަމިތު ކުމާރު ގާންދީގެ ޕާޓްނަޝިޕް ކުންފުންޏެކެވެ.
އިދިކޮޅު ޕީޕީއެމްގެ ރިޔާސީ ކެންޑިޑޭޓް ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެއީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެއްޖެ ކަމަށް ކަނޑައެޅުމަށް ފަހުގަ އެވެ. އެ މައްސަލަ ވެސް ހައި ކޯޓުގައި އިސްތިއުނާފު ކޮށްފައިވެ އެވެ.
