ވިޔަފާރި ކުރާއިރު ފިހާރަތަކުން ދޭ ކޮންމެ ޕްލާސްޓިކު ކޮތަޅަކަށް ގާނޫނުގެ ދަށުން ދެ ރުފިޔާ ނަގަން ފެށުމުން އެކަމުގެ ހިސާބުކިތާބު ބެލެހެއްޓުން ގަވާއިދެއްގެ ދަށުން މަޖުބޫރުކޮށްފި އެވެ.
ކުނި މެނޭޖް ކުރުމާ ބެހޭ ގާނޫނުގެ ދަށުން ޕްލާސްޓިކް ކޮތަޅުން ފައިސާ ނަގަން ފެށުމުން އޭގެ ހިސާބު ބަލަހައްޓަން އެންގީ މޯލްޑިވްސް އިންލެންޑް ރެވެނިއު އޮތޯރިޓީން އިއްޔެ ގެޒެޓު ކުރި ގަވާއިދެއްގެ ދަށުންނެވެ.
"ޕްލާސްޓިކް ކޮތަޅުގެ ފީގެ އަދަދު ކަށަވަރު ކުރުމަށް ރިކޯޑު ބެލެހެއްޓުމުގެ ގަވާއިދު" ގެ ދަށުން ކޮންމެ ދުވަހަކު ވެސް ވިއްކާ ކޮތަޅުގެ ހިސާބު ބަލަހައްޓަންވާނެ ކަމަށް އެ ގަވާއިދުގައި ބުނެފައިވެ އެވެ.
ކޮތަޅާ ގުޅޭ ޖުމްލަ ފަސް ކަމެއް އެ ގަވާއިދުގެ ދަށުން ޖުމްލަ ވިޔަފާރިވެރިން ބަލަހައްޓަންޖެހެ އެވެ. އެއީ ވިއްކާ ކޮތަޅުގެ އަދަދާއި އަގާއި ހިލޭ ދޫކުރާ ކޮތަޅާއި އޭގެ އަގާއި ހަލާކުވާ ކޮތަޅާއި އޭގެ އަގާއި ކަސްޓަމަރުން ރައްދު ކުރާ ކޮތަޅުގެ ހިސާބާއި ފިހާރައިގައި ބޭނުން ކުރާ އެހެނިހެން ކޮތަޅުގެ އަދަދެވެ.
އޭގެ އިތުރުން، އެ ވިޔަފާރިއަކުން ކޮތަޅު ގަންނަ ސަޕްލަޔަރުގެ ބައެއް މައުލޫމާތުތައް ވެސް ހިމެނެ އެވެ. އޭގެ ތެރޭގައި ގަތް ނުވަތަ ހިލޭ ލިބުނު ކޮތަޅުގެ އަދަދާއި ސަޕްލަޔަރުގެ ޓިން ނަމްބަރާއި އިންވޮއިސްގެ ކޮޕީއެކެވެ.
ޕްލާސްޓިކް ކޮތަޅުގެ ހިސާބުކިތާބު ބަލަހައްޓަންޖެހޭނީ އެ ވިޔަފާރިއެއްގެ އެހެނިގެން ރިކޯޑްސްތަކާ ހިލާފަށް މުޅިން ވަކިން ކަމަށް ވެސް އެ ގަވާއިދުގައި ބުނެ އެވެ.
