ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ހިޔާނާތުގެ ދައުވާތަކަށް ސަރުކާރުގެ ނުފޫޒު ފޯރާ ފަދަ މޭރުމަކުން ޕްރޮސެކިއުޓާ ޖެނެރަލް ހުސައިން ޝަމީމް ވާހަކަ ދައްކަވާފައިނުވާ ކަމަށް އެ އޮފީހުން ބުނެފި އެވެ.
ޔާމީންގެ މައްޗަށް ކުރާ ދައުވާތައް އަނބުރާ ގެންދިއުމަށް އެދި އިދިކޮޅު ލީޑަޝިޕުން ވަނީ މިއަދު ޕީޖީ އާ ބައްދަލުކުރައްވައިފަ އެވެ. މި ބައްދަލުވުމަށްފަހު އިދިކޮޅުގެ އެކްޓިން ލީޑަރު އަބްދުއްރަހީމް އަބްދުﷲ ވިދާޅުވީ ޕީޖީ ޝަމީމްގެ ވާހަކައިން ޔާމީންގެ މައްސަލައިގައި ގޯސްތަކެއް ހަދާފައިވާ ކަން އެނގޭ ކަމަށެވެ.
"އަދި ހަމައެއާއެކީގައި ހައިކޯޓުގައި އޮތް މައްސަލައާ މެދު ވެސް ޝަމީމްގެ ވިސްނުން ހުރި ގޮތަށް ބަލާއިރު ސަރުކާުރުގެ ނުފޫޒު ނުފޯރުވައިފިއްޔާ މައްސަލަ ނިމިގެންދާނީ ރައީސް ޔާމީނާ އެއްކޮޅަށް ކަމަށް ދޭހަވާ އިބާރާތުން ވާހަކަ ދެއްކެވި، އެއަށް ބާރު ދެއްވާ ގޮތަށް،" އަބްދުއްރަހީމް ވިދާޅުވި އެވެ.
އެހެންނަމަވެސް މި ވާހަކަތައް ދޮގުކޮށް ޕީޖީ އޮފީހުން މިއަދު ބުނީ ރައީސް ޔާމީންގެ ފަރާތްޕުޅުން ހުށަހަޅުއްވާފައިވާ އިސްތިއުނާފު މައްސަލަ އަވަހަށް ނިމުމަކީ ޕީޖީ އޮފީހުންވެސް އެދޭ ގޮތްކަމަށް ޕީޖީ ވެސް ވިދާޅުވެފައިވާ ކަމަށެވެ.
"ސަރުކާރުގެ ނުފޫޒާބެހޭ ގޮތުން ދެއްކެވި ވާހަކަފުޅަކީ، ޕީޕީއެމް/ޕީއެންސީގެ މެމްބަރުން އަމިއްލަފުޅަށް ފައުޅުކުރެއްވި ޝުއޫރެކެވެ. އެކަމަކީ މިއޮފީހުގެ މަސައްކަތުގެ ދާއިރާގައި ހިމެނޭ ކަމަކަށް ނުވާތީ، އެ ޝަކުވާއާ ގުޅިގެން މި އޮފީހުން ކޮށްދެވޭނެ ކަމެއް ނެތްކަމަށް [ޕީޖީ ޝަމީމް] ދެންނެވި އެވެ." ޕީޖީ އޮފީހުން މީޑީއާތަކަށް ފޮނުވި މެސެޖެއްގައި ބުނެފައިވެ އެވެ.
ނަމަވެސް, މި މައްސަލަ މިހާތަނަށް ވެސް ލަސްވެފައި އޮތީ ރައީސް ޔާމީންގެ ފަރާތްޕުޅުން ކުރަން ޖެހޭ ކަންކަމުގައި ކަމަށް ވެސް ޕީޖީން އިދިކޮޅު ލީޑަރު ގާތުގައި ބުނެފައިވާނެ ކަމަށް ވެސް ބުނެފައިވެ އެވެ.
"މައްސަލައިގެ އަޑުއެހުންތައް ވީހާ ވެސް އަވަހަކަށް ގެންގޮސް، މައްސަލައިގައި އަވަހަށް ހުކުމެއް ކުރުމަށް، ޕީޖީ އޮފީހުން އެއްބާރުލުން ދޭންޖެހޭ ހަމަ ކޮންމެ ކަމެއްގައި އެއްބާރުލުން ދޭނެކަމަށް ދެންނެވި އެވެ،" ޕީޖީ އޮފީހުން ބުނެފައިވެ އެވެ.
އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކަނޑައެޅުމަށް ފަހު، 11 އަހަރަށް ޖަލަށްލުމަށް ހުކުމް ކުރީ ޑިސެމްބަރު 25, ގަ އެވެ. އެ މައްސަލަ މިހާރު ވަނީ ހައި ކޯޓުގައި އިސްތިއުނާފު ކޮށްފަ އެވެ.
ކްރިމިނަލް ކޯޓުގައި އެމަނިކުފާނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަކުރުމުގެ ދައުވާގެ އިތުރު މައްސަލައެއް ވެސް އެބަ އޮތެވެ. ރ. ފުއްގިރި ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލަ ކްރިމިނަލް ކޯޓުގައި އަދި އޮތީ ޝަރީއަތުގެ ވަރަށް ކުރީކޮޅުގެ މަރުހަލާއެއްގަ އެވެ.
