ހ. އަތިރީގޭގެ ބިމުގައި ޝީޓް ޕައިލްކޮށް, ބިމުގެ އަޑީގެ ފެން ދެމުމުގެ މަސައްކަތް ކުރުމުގެ ސަބަބުން އޭޑީކޭ ޓަވަރު އަރިއަޅާލާފައިވާ ކަމަށް ބުނެ، އިމާރާތް ކުރުމުގެ މަސައްކަތް ހުއްޓުވަން ސިވިލް ކޯޓަށް މިއަދު ހުށަހަޅައިފި އެވެ.
އޭޑީކޭ ގްރޫޕުގެ ޗެއާމަން އަދި ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ނާޝިދުގެ ގާނޫނީ ވަކީލު މުހައްމަދު ޔާމީން ވިދާޅުވީ އޭޑީކޭ ޓަވަރުގެ ހުޅަނގަށް އޮތް ބިމުގައި ކުރަމުންދާ މަސައްކަތްތައް ހުއްޓުވަން ވަގުތީ އަމުރަކަށް ހުށަހެޅީ ނާޝިދުގެ އަމިއްލަ ހައިސިއްޔަތުން ކަމަށެވެ.
މައްސަލަ ހުށަހެޅީ 15 ބުރިއަށް ހަދާ އެ އިމާރާތުގެ މުޅި މަސައްކަތް ހުއްޓުވުމުގެ ނިޔަތުގައި ނޫން ކަމަށާއި ބޭނުމަކީ ޑީވޯޓަކުރުމުގެ ސްޕީޑު މަޑުކޮށްލުމަށް ފަހު، އޭޑީކޭ ޓަވަރަށް ލިބިދާނެ ގެއްލުން ދަނެގަނެ، ދެ ފަރާތުގެ ތަޖުރިބާކާރުން މަޝްވަރާ ކުރެވި ގެއްލުން ނުވާނެ ގޮތަކަށް ކުރިއަށް ގެންދެވޭނެ ގޮތެއް ހޯދުން ކަމަށް ޔާމީން ވިދާޅުވި އެވެ.
އޭޑީކޭ ޓަވަރުގެ ހުޅަނގުން ހ. އަތިރީގޭގައި ހަދާ އިމާރާތުގެ ފައުންޑޭޝަން އެޅުމަށް ފެން ދެމުމުގެ މަސައްކަތް ކުރަނީ. -- ފޮޓޯ: މުހައްމަދު ޝާބިން/ އަދަދު
"އެ މައްސަލަ ކޯޓަށް ހުށަހެޅީ އެއްވެސް ހައްލެއް ނުލިބިގެން. ފެށުނީއްސުރެ އަޅުގަނޑުމެން މިދިޔައީ ހައްލެއް ހޯދަން މަޝްވަރާ ކުރަން އާދެބަލާށޭ ބުނަމުން. ނަމަވެސް މައްސަލަ ކޯޓަށް ހުށަހެޅި ފަހުން މިހާރު އެ އިމާރާތުގެ ކޮންޓްރެކްޓަރާ [އާރުސީސީ] ވާހަކަތަކެއް އެބަ ދެކެވޭ. އުއްމީދަކީ ހައްލުވެގެން ދިޔުން،" ޔާމީން ވިދާޅުވި އެވެ.
އިމާރާތުގެ މަސައްކަތް ފެށުމުގެ ކުރިން ވެސް އެސެސްމެންޓެއް ހަދައި، އެއްބަސްވުމެއްގެ ދަށުން ކުރިއަށް ގެންދާން ހުށަހެޅި ކަމަށާއި ނަަމަވެސް އެ އެސެސްމެންޓު ކޮންޓްރެކްޓަރު ނުހެދުމުން އޭޑީކޭގެ ފަރާތުން މިނިވަން އިންޖިނިއަރަކާ ހަވާލުކޮށްގެން އެސެސްމެންޓެއް ހަދާފައިވާ ކަމަށް ޔާމީން ވިދާޅުވި އެވެ.
"ޑީވާޓަކުރަން ފެށި ފަހުން އެސްޓާޒް ބިލްޑިން އާއި އޭޑީކޭ ޓަވަރާ ދެމެދު 95 މިލިމީޓަރުގެ ގެޕެއް މިހާރު އުފެދިއްޖެ. މާނައަކީ މިހާރު ވެލާނާގެއާ ދިމާއަށް މަޑުމަޑުން އަރިވަނީއޭ. އިމާރާތުގެ މައްޗަށް (ޓެރަސް) އަށް ފެން އަޅާލީމާ ފެންގަނޑު ވެސް ދަނީ އެ ދިމާއަށް (ހުޅަނގަށް). މިއީ އިންޑިޕެންޑެންޓް އިންޖިނިއަރުންގެ އޮބްޒަވޭޝަން،" ޔާމީން ވިދާޅުވި އެވެ.
އޭޑީކޭ ޓަވަރަށް ގެއްލުންވާ ގޮތަށް އިމާރާތް ކުރުމުގެ މަސައްކަތް ކުރާތީވެ، އެ މައްސަލަ އެންވަޔަރަމެންޓް މިނިސްޓްރީ އަދި ސިޓީ ކައުންސިލަށް ވެސް ވަނީ ހުށަހަޅައިފަ އެވެ.
